Featured Media Centre News Sri Lanka tour of Pakistan 2019

එක්දින සහ විස්සයි/20 තරගාවලියකට ශ්‍රී ලංකාව සැප්තැම්බරයේ පාකිස්තානයට යයි

ටෙස්ට් ලෝක ශූරතාවය යටතේ පැවැත්වීමට නියමිත ටෙස්ට් තරග 2 ට පෙර තරග 3 කින් සමන්විත එක්දින සහ විස්සයි/20 තරගාවලියකට සහභාගිවීම සඳහා ශ්‍රී ලංකා ක්‍රිකට් කණ්ඩායම ලබන සැප්තැම්බර් මස අගදී පාකිස්තානය බලා යෑමට නියමිතය.

සැප්තැම්බර් මස 27 වැනිදා සිට ඔක්තෝම්බර් 09 වැනිදා දක්වා පැවැත්වෙන මෙම තරගාවලිය යටතේ එක්දින තරග 3 ක් සහ විස්සයි-20 තරග තුනක් පැවැත්වීමට නියමිතය. ඒ අනුව එක්දින තරග සියල්ලම කරච්චි නුවරදී පැවැත්වෙන අතර විස්සයි/20 තරග 3 ලාහෝර්හිදීද පැවැත්වෙනු ඇත.

 ටෙස්ට් ලෝක ශුරතාවය යටතේ පාකිස්තානයේ පැවැත්වීමට නියමිතව තිබූ ටෙස්ට් තරග 2 ට සහභාගිවීම සඳහා සුදුසු ආරක්ෂක තත්ත්වයක් තිබේද යන්න පරික්ෂා කිරීම සඳහා ශ්‍රී ලංකා ක්‍රිකට් ආයතන ලේකම් මොහාන් ද සිල්වා මහතාගේ ප්‍රධානත්වයෙන් යුතු සිව් දෙනෙකුගෙන් සමන්විත නිලධාරීන් පිරිසක් ඉකුත්දා පාකිස්තානයේ සංචාරයක නිරත විය. එම සංචාරය සාර්ථක වීමේ ප්‍රතිඵලයක් ලෙසින් මෙම එක්දින සහ විස්සයි/20 තරගාවලිය ස්ථීර වී තිබේ.

කෙසේ වෙතත් දෙරට අතර පැවැත්වීමට නියමිතව තිබෙන තරග 2 කින් සමන්විත ටෙස්ට් තරගාවලිය ලබන දෙසැම්බර් මස දක්වා කල් දැමීමටද දෙපාර්ශ්වයව එකඟ වී තිබේ. පාකිස්තානයට ජාත්‍යන්තර තරගාවලියකට ක්‍රීඩා කිරීමට පැමිණිම පිළිබඳව අදහස් දක්වා සිටින පාකිස්තානු ක්‍රිකට් ආයතන ප්‍රධානී එෂාන් මානි මහතා, පාකිස්තානයට යළිත් ජාත්‍යන්තර ක්‍රිකට් වරම් ලබාදීම සඳහා ශ්‍රී ලංකා ක්‍රිකට් ආයතනය ලබාදෙන සහයෝගය පිළිබඳව තමන් ශ්‍රී ලංකා ක්‍රිකට් ආයතනයට ස්තූතිවන්ත වන බවයි.

මේ පිළිබඳව අදහස් දක්වන ශ්‍රී ලංකා ක්‍රිකට් ආයතන සභාපති ශම්මි සිල්වා මහතා,  තරගාවලියට සහභාගිවන ක්‍රීඩකයින්ගේ ආරක්ෂාව සම්බන්ධ පූර්ණ වගකීම ශ්‍රී ලංකා ක්‍රිකට් ආයතනය ගන්නා බව සඳහන් කර සිටියි. වැඩිදුරටත් අදහස් දක්වා සිටින ශම්මි සිල්වා මහතා, “ක්‍රීඩකයින්ගේ ආරක්ෂාව සහ සුරක්ෂිත භාවයේ වගකීම ශ්‍රී ලංකා ක්‍රිකට් ආයතනය භාරගන්නවා වගේම ඒ පිළිබඳව වඩාත් අවධානයකින් සලකනවා. මේ පිළිබඳව කිසියම් සැකයක් පැවැතියේ නම් මේ තරගාවලිය පැවැත්වීම සම්බන්ධව ඉදිරි කටයුතුවලට සම්බන්ධ වන්නේ නෑ” යි පවසයි.

Related posts

Angelo Mathews to return home

Web Admin

‘කුසල්’ලා අතර තරගයෙන් මෙන්ඩිස්ලා ජය ලබති

Chamila Karawita

ලීග් ශූරයින් සොයන ප්‍රධානතම දේශීය තරගාවලිය ඇරඹෙයි

Web Admin