Featured Media Centre News Sri Lanka tour of Australia 2019

පාකිස්තානයට ගිය සිව්දෙනෙක් ඕස්ට්‍රේලියානු සංචාරයෙන් හැළෙයි

මෙම මස 27 වැනිදා ආරම්භ වීමට නියමිත ශ්‍රී ලංකා ක්‍රිකට් කණ්ඩායමේ ඔස්ට්‍රේලියානු තරග සංචාරය සඳහා නම් කරන ලද ලසිත් මාලිංගගේ නායකත්වයෙන් යුතු ශ්‍රී ලංකා විස්සයි-20 කණ්ඩායමට නිමාවුණු පාකිස්තානු තරග සංචාරයේදී දස්කම් දැක්වූ තරුණ ක්‍රීඩකයින් කිහිප පළක්ම ඇතුළත් කිරීමට ශ්‍රී ලංකා ක්‍රිකට් තේරීම් කමිටුව පියවර ගෙන තිබේ.

අසන්ත ද මෙල් මහතාගේ ප්‍රධානත්වයෙන් යුතු තේරීම් කමිටුව විසින් නම් කරන ලද ශ්‍රී ලංකා විස්සයි-20 කණ්ඩායමට පාකිස්තානයට එරෙහිව ක්‍රීඩා කළ සංචිතයෙන් වෙනස්කම් 4 ක් පමණක් සිදුකිරීමට වග බලාගෙන තිබේ. ආරක්ෂක හේතූන් නිසා එම තරගාවලියට සහභාගිත්වයෙන් වැළැකී සිටි ලසිත් මාලිංග, නිරෝෂන් දික්වැල්ල, කුසල් මෙන්ඩිස් සහ කුසල් පෙරේරාට යළිත් කණ්ඩායමට එක් කර තිබේ.

මොවුන් සිව්දෙනා කණ්ඩායමට පැමිණීමේදී පාකිස්තානු තරග සංචාරයට සහභාගිවූ ක්‍රීඩකයන් අතරින් දක්ෂතා අතරට පැමිණීමට සමත්වූ මිනෝද් භානුකටද ස්ථානය අහිමිවී තිබීම කැපී පෙනෙයි. මිනෝද් භානුකට අමතරව ආරම්භක පිතිකරු ලෙසින් කණ්ඩායමට එක්වූ සධීර සමරවික්‍රම, ඇන්ජලෝ පෙරේරා සහ ළහිරු මධුසංකට සිය ස්ථාන අහිමිවී තිබේ. කෙසේ වෙතත් පාකිස්තානු තරග සංචාරයට පෙර හෙවත් නවසීලන්තයට එරෙහිව පැවැති විස්සයි-20 තරගාවලියට ඇතුළත් වුණු ළහිරු මදුසංක ද නම් කරන ලද නව කණ්ඩායමට ඇතුළත් නොවීම කැපී පෙනෙයි.

මෙම ක්‍රීඩකයින් සහිතව ලොව අංක 1 විස්සයි-20 කණ්ඩායම වූ පාකිස්තානයට එරෙහිව පැවැති තරග 3 කින් සමන්විත විස්සයි-20 තරගාවලිය 3-0 ක් ලෙස ජය ගැනීමට දසුන් ශානකගේ නායකත්වයෙන් යුතු ශ්‍රී ලංකා කණ්ඩායම සමත්විය.

විස්සයි-20 තරග 3 ක් පමණක් ඇතුළත් මෙම තරගාවලියේ පළමු තරගය මෙම මස 27 වැනිදා ඇඩිලේඩ්හිදී ආරම්භ වන අතර දෙවැනි තරගය 30 වැනිදා බ්‍රිස්බේන්හිදීද තෙවැනි තරගය නොවැම්බර් 01 වැනිදා මෙල්බර්න්හිදීද පැවැත්වෙනු ඇත.

මීළඟ විස්සයි-20 ලෝක කුසලාන තරගාවලිය ලබන 2020 වසරේ ඔස්ට්‍රේලියාවේදීම පැවැත්වෙන බැවින් මෙම තරගාවලිය ශ්‍රී ලංකා කණ්ඩායමට ඉතාමත් වැදගත් තරගාවලියක් බවට පත්ව තිබේ. ශ්‍රී ලංකා කණ්ඩායම අවසන් වරට ඔස්ට්‍රේලියාවේදී විස්සයි-20 තරගාවලියකට සහභාගිවී ඇත්තේ ඉකුත් 2017 වසරේදී වේ. උපුල් තරංගගේ නායකත්වය යටතේ එම තරගාවලියට සහභාගිවූ ශ්‍රී ලංකා විස්සයි-20 පිල 2-1 ක් ලෙස ඔස්ට්‍රේලියාවට එරෙහිව ජය වාර්තා කිරීමට සමත්විය.

ශ්‍රී ලංකා විස්සයි-20 පිල – ලසිත් මාලිංග (නායක), කුසල් ජනිත්, කුසල් මෙන්ඩිස්, ධනුෂ්ක ගුණතිලක, අවිශ්ක ප්‍රනාන්දු, නිරෝෂන් දික්වැල්ල, දසුන් ශානක, ශෙහාන් ජයසූරිය, භානුක රාජපක්ෂ, ඕෂධ ප්‍රනාන්දු, වනිඳු හසරංග, ලක්ෂාන් සඳකැන්, නුවන් ප්‍රදීප්, ළහිරු කුමාර, ඉසුරු උදාන, කසුන් රජිත.

කණ්ඩායමට පැමිණි ක්‍රීඩකයින් – ලසිත් මාලිංග, කුසල් පෙරේරා, කුසල් මෙන්ඩිස්, නිරෝෂන් දික්වැල්ල

ඉවත් වුණු ක්‍රීඩකයින් – මිනෝද් භානුක, ළහිරු මධුසංක, ඇන්ජලෝ පෙරේරා, සධීර සමරවික්‍රම .

Related posts

පැතුම් නිස්සංකගේ නව වසරේ බලාපොරොත්තුව

Chamila Karawita

SL Emerging and Hampshire settle for a draw

Web Admin

39 players placed in two bio-bubbles | Player preparations for the upcoming tours

Web Admin