Featured Media Centre News Under 19

යොවුන් ටෙස්ට් තරගයේ ශ්‍රී ලංකා පිලට වැඩි ගෞරවය

දින දෙකහමාරකට අධික කාලයක් වර්ෂාවෙන් බාධා ඇතිවුණු සංචාරක ශ්‍රී ලංකා වයස අවුරුදු 19 න් පහළ කණ්ඩායම සහ බංග්ලාදේශ යොවුන් කණ්ඩායම අතර බරිසාල්හි පැවැති පළමු යොවුන් ටෙස්ට් තරගය ශ්‍රී ලංකා පිලට වැඩි ගෞරව අත්කර දෙමින් අද (29 දා) නිමාවට පත්විය.

තරගයේ සිව්වැනි සහ අවසන් දිනය වූ අද දිනයේදී තරගය අවසන් වන විට සිය පළමු ඉනිම සඳහා පන්දුවට පහර දෙමින් සිටි බංග්ලාදේශ යොවුන් පිල ලකුණු 145 ක් ඇතුළත කඩුලු 6 ක් දැවී අසීරු තත්ත්වයක පසුවිය.

බංග්ලාදේශ යොවුන් පිල වෙනුවෙන් වැඩිම ලකුණු ලාභියා වූ ඇල්වි හක් ලකුණු 54 ක් ලබා ගත්තේය. පන්දු 100 කට මුහුණ දුන් හක් සිය ඉනිම සඳහා හයේ පහරක් සහ හතරේ පහර 7 ක් එල්ල කළේය. බංග්ලාදේශ යොවුන් පිලේ දැවී ගිය කඩුලු 6 න් 5 ක්ම මතීෂ පතිරණ සහ ලක්ෂාන් ගමගේ අතර බෙදී ගියේය. එහිදී මතීෂ ලකුණු 13 කට කඩුලු 3 ක්ද ලක්ෂාන් ලකුණු 12 කට කඩුලු 2 ක්ද දවා ගනිමින් බංග්ලාදේශ පිල අසීරුතාවයට ඇද දැමූහ.

කඩුලු 3 කට ලකුණු 155 ක් ලෙසින් සිට සිව්වැනි දින ඇරඹූ ශ්‍රී ලංකා පිල අද දිනයේදී ලකුණු පුවරුව ලකුණු 331 ක දක්වා ඉහළ දමා ගනු ලැබුවේ කඩුලු 7 ක් පමණක් දැවී ගොස් තිබියදීය. ශ්‍රී ලංකා යොවුන් පිල වෙනුවෙන් නායක නිපුන් ධනංජය වැඩිම ලකුණු ලාභියා වෙමින් ලකුණු 67 ක් ලබා ගත්තේය. ඔහුට අමතරව සොනාල් දිනූෂ සහ දුලිත් වෙල්ලාලගේ අර්ධ ශතක වාර්තා කරමින් ශ්‍රී ලංකා ඉනිම ලකුණු 300 එහාට රැගෙන යෑමට දායකත්වයක් දැක්වූහ.

තෙවැනි දිනයේදී ලකුණු 46 ක් ලබා සිටි සොනාල් දිනූෂ පන්දු 110 කට මුහුණ දෙමින් ලකුණු 58 දක්වා සිය ඉනිම ඉහළ දමා ගත්තේය. හයේ පහරක් සහ හතරේ පහර 7 ක් දිනූෂගේ ඉනිමට ඇතුළත් වද්දී ඔහු සමඟ සිව්වැනි කඩුල්ල වෙනුවෙන් ලකුණු 113 ක් එක් කළ නායක නිපුන් ධනංජය තම ලකුණු 67 ක ඉනිම සඳහා හයේ පහර 3 ක් සහ හතරේ පහර 6 ක් එල්ල කර තිබුණි.

ශ්‍රී ලංකා ඉනිම හමාර වන විටත් සිය අර්ධ ශතකය සම්පූර්ණ කරගෙන සිටි දුලිත් වෙල්ලාලගේ පන්දු 85 කට මුහුණ දී තිබුණේය. තම ඉනිම හතරේ පහර 5 කින් පමණක් අලංකාර කර ගත් දුලිත් ලක්ෂාන් ගමගේ සමඟ (46) එක්ව 7 වැනි කඩුල්ල වෙනුවෙන් ලකුණු 93 ක සම්බන්ධතාවයක් පැවැත්වීය. මෙම තරගයේ ආරම්භක පිතිකරුවා ලෙස කටයුතු කළ කුෂාන් වික්‍රමසිංහ ලකුණු 45 ක් රැස් කළේය.

දෙරට අතර පැවැත්වෙන මීළඟ සිව්දින ටෙස්ට් තරගය ලබන නොවැම්බර් මස 02 වැනිදා සිට 05 වැනිදා දක්වා කුල්නාහිදී පැවැත්වෙන අතර අනතුරුව තරග 5 කින් සමන්විත එක්දින තරගාවලිය ආරම්භ වනු ඇත.

Related posts

Sri Lanka squad for the limited overs series against India

Web Admin

Dinesh Chandimal 74, underlines that class is permanent

Web Admin

වාර්තා අලුත් කරමින් ශ්‍රී ලංකාව හමුවේ පාකිස්තානය පරදියි

Web Admin