Featured Media Centre News Sri Lanka tour of Australia 2019

වෝටර් බෝයි විදියට පිට්ටනියට ආ රටම අඳුරන ‘අමුත්තා’

ශ්‍රී ලංකා ක්‍රිකට් කණ්ඩායම සහ ඔස්ට්‍රේලියානු අගමැතිවරයාගේ කණ්ඩායම අතර අද (24 දා) කැන්බරාහි මනුකා ඕවල් ක්‍රීඩාංගණයේ පැවැති පුහුණු විස්සයි-20 තරගය අතරතුරදී සුවිශේෂී සිදුවීමක් සිදුවිය. ඒ එරට අගමැතිවරයා විසින් ක්‍රීඩාංගණයට සිසිල් පැන් රැගෙන ඒමට කටයුතු කිරීමය. ඔස්ට්‍රේලියානු පිල පන්දු රකිමින් සිටින අවස්ථාවේදී ඩැනියල් ෆෝලින්ස් විසින් දසුන් ශානක දවා ගැනීමත් සමඟ එරට අග්‍රාමාත්‍යවරයා වන ස්කොට් මොරිසන් මහතා බෝතල් 6 කින් යුත් සිසිල් පැන් බඳුනක් කැටිව ක්‍රීඩාංගණයට පැමිණියේය.

ඔස්ට්‍රේලියානු අගමැතිවරයා විසින් සිදුකරන ලද එම ක්‍රියාව ඡායාරූපයක් හරහා සමාජ ජාලා අතර ප්‍රසිද්ධියට පත් වීමත් සමඟ ඒ පිළිබඳව ලෝකය පුරා ක්‍රීඩා ලෝලීන් අතර විශේෂ මාතෘකාවක් බවට පත්ව තිබේ. ඔස්ට්‍රේලියානු ක්‍රිකට් කණ්ඩායමේ නිල කැප් තොප්පියද පැළඳ ගනිමින් ක්‍රීඩාංගණයට පිවිසි එරට අග්‍රාමාත්‍යවරයා පන්දු රකිමින් සිටි ඔස්ට්‍රේලියානු පිලේ පන්දු රකින්නන්ට අතට අත දී (Cheers) සතුටු ප්‍රකාශ කිරීමට කටයුතු කිරීමද සිත්ඇද ගන්නා සුළු සිදුවීමක් විය.

කෙසේ වෙතත් මොරිසන් අග්‍රාමාත්‍ය වරයා තරගයක් පැවැත්වෙන අතරතුරදී ක්‍රීඩාංගණය තුළට ගිය පළමු අවස්ථාව මෙය නොවන බව එරට මාධ්‍ය වාර්තා සඳහන් කර සිටියි. මේ මස මුලදී ඔස්ට්‍රේලියාව සහ ෆීජි දූපත් අතර පැවැති සුහද රග්බි තරගයක් අතරතුරදීද ක්‍රීඩකයින්ට හිමි නිල ඇඳුම් සහ සිසිල් පැන් බෝතල් පිටිය තුළට ගෙනවිත් භාර දී තිබෙන බව කියැවේ. තරගයක් පැවැත්වෙන අතරතුරදී ප්‍රේක්ෂකයින් ක්‍රීඩාංගණය තුළට පැමිණෙන අවස්ථාව ඕනෑ තරම් ක්‍රිකට් ක්‍රීඩාව තුළ දැක ගැනීමට හැකි වුවත්, අග්‍රාමාත්‍යවරයකු ක්‍රීඩාංගණයකට සිසිල් පැන් ගෙන ඒමේ සිදුවීමක් පිළිබඳව නම් මීට පෙර වාර්තා වූ අවස්ථාවක් නොමැති තරම්ය.  සෑම වසරකම ඔස්ට්‍රේලියාවේ ජාත්‍යන්තර ක්‍රිකට් වසන්තය උදාවන්නේ ඔක්තෝබර් මාසයේ වන අතර එය ඔස්ට්‍රේලියානු අගමැතිවරයාගේ කණ්ඩායම සමඟ තරගයෙන් ආරම්භ වීමද කැපී පෙනෙයි.

Related posts

SL WOMEN’S TOUR OF AUSTRALIA: Separate ODI and T20 captains

Web Admin

A highly secure Bio-Bubble System in place for LPL

Web Admin

A nostalgic tear and pride as Shashikala bows out in style with Player of the Match Award

Web Admin