Featured News Sinhala Column

අන්තර් පළාත් කාන්තා ක්‍රිකට් තරගාවලියෙන් දක්ෂ ක්‍රීඩිකාවන් බිහිවේවි – තරගාවලි කමිටුවේ සභාපති කියයි

ශ්‍රී ලංකා ක්‍රිකට් ආයතනයේ මෙහෙයවීමෙන් මේ මස 24 සිට 29 දක්වා පැවැත්වෙන අන්තර් පළාත් කාන්තා ක්‍රිකට් තරගාවලිය මගින් දක්ෂතම කාන්තා ක්‍රිකට් ක්‍රීඩිකාවනට දස්කම් පෙන්වා ජාතික සංචිතයට ඇතුලුවීමේ අවස්ථාවත් මීළග ලෝක කුසලාන තරගාවලියට දක්ෂ කණ්ඩායමක් ඉදිරිපත් කිරීමේ අවස්ථාවත් යන ප්‍රධාන කරුණු දෙකම ඉටුවන බව ශ්‍රී ලංකා ක්‍රිකට් ආයතනයේ තරගාවලි කමිටුවේ සභාපති බන්දුල දිසානායක මහතා සදහන් කරයි.

දිස්ත්‍රික්ක මට්ටමෙන් කාන්තා ක්‍රිකට් ක්‍රීඩිකාවන්ටත් ජ්‍යෙෂ්ට සහ කණිෂ්ඨ (වයස් මට්ටමින්) තරගාවලි සංවිධානය වනවා. එම තරගාවලියන්හි උපරිම දක්ෂතා දැක්වූ ක්‍රීඩිකාවන් මේ අන්තර් පළාත් කරගාවලියට සුදුසුකම් ලබා සිටිනවා මේ ක්‍රමයෙන් දක්ෂම ක්‍රීඩිකාවනට ජාතික තලයට යාමට අවස්ථාව සැලසෙන අතර දක්ෂ අය මග හැරෙන්නේ නැතැයි දිසානායක මහතා කියයි.

තරගාවලියට සහභාගි වන කොළඹ, මහනුවර, දඹුල්ල සහ ගාල්ල කණ්ඩායම්වලට අයත් ක්‍රීඩිකාවන් හැටදෙනාම තෝරාගෙන ඇත්තේ ජාතික තේරීම් කමිටුව මගිනුයි. මේ තරගාවලියට අයත්වන තරග හතරේදී උපරිම දස්කම් දක්වන ක්‍රීඩිකාවනට අනිවාර්යෙන්ම ජාතික සංචිතයට ඇතුලුවීමටත් පසුව ජාත්‍යන්තර තරගවලට සහභාගිවීමටත් අවස්ථාව උදාවේවි. විශේෂයෙන්ම තරුණ ක්‍රීඩිකාවනට දස්කම් පෙන්වා ජාතික හා ජාත්‍යන්තරයට යාමට මෙය විශාල පිටුවහලක් වනු ඇතැයි ද ඒ මහතා සදහන් කරයි.

ඕෂදී රණසිංහ (කොළඹ) චමරි අතපත්තු (දඹුල්ල) හර්ෂිකා මාධවී (මහනුවර) සහ නිලක්ෂි ද සිල්වා (ගාල්ල) කණ්ඩායම් හතරේ නායිකාවන් ලෙස ක්‍රියා කරන අතර මූලික තරග මේ මස 24,25 සහ 27 දිනවලද අවසාන තරගය 29 වැනිදා එස්.එස්.සී.පිටියේදී පැවැත්වීමට නියමිතය.

ක්‍රිකට් ආයතනය දිවයිනේ දක්ෂම ක්‍රීඩිකාවන් හැටදෙනා සහභාගි වන මෙවැනි තරගාලියක් සංවිධානය කිරීම මගින් කාන්තා ක්‍රිකට් ක්‍රීඩාවේ සංවර්ධනයට විශාල පිටුවහලක් ඇතිවනු ඇතැයි පවසන බන්දුල දිසානායක මහතා ලැබුණු මේ අනගි අවස්ථාවෙන් උපරිම ප්‍රයෝජන අත්කර ගැනීම ක්‍රීඩිකාවන් වගබලා ගතයුතුව ඇතැයි ද කීය.

බන්දුල මොල්ලිගොඩ.

Related posts

Appointment of New Selection Committee

Web Admin

වනිදු අංක 1 ට එයි

Chamila Karawita

ICC Chairman Mr. Shashank Manohar to arrive in Sri Lanka tonight

Web Admin