Featured Media Centre News Sri Lanka tour of Pakistan 2019

අබීඩ් සහ මසූඩ් වාර්තාගත සම්බන්ධතාවයක

Chamila Karawita reporting from Karachi

සංචාරක ශ්‍රී ලංකා කණ්ඩායමට එරෙහිව කරච්චි ජාතික ක්‍රීඩාංගණයේ පැවැත්වෙන දෙවැනි ටෙස්ට් තරගයේ තෙවැනි දිනය වූ අද (21 දා) තම පිති මුවහත් කරගත් පාකිස්තානු ආරම්භක පිතිකරුවෝ දිවා ආහාරය සඳහා නතර කරන විට පාකිස්තානු ලකුණු පුවරුව 175 ක් දක්වා ඉහළ දමා ගන්නා ලද්දේ ශ්‍රී ලංකා පන්දු යවන්නන්ට කඩුලු දවා ගැනීමේ අවස්ථාව අහිමි කරමිනි. ඒ අනුව පාකිස්තානු පිල සිය කඩුලු 10 ම අතැතිව දැන් සිටින්නේ සංචාරක කණ්ඩායමට වඩා ලකුණු 95 ක් ඉදිරියෙනි.

අබීඩ් සහ මසූඩ් දෙදෙනා විසින් රැස් කරන ලද මෙම ලකුණු සංඛ්‍යාව ශ්‍රී ලංකාවට එරෙහිව කරච්චි ක්‍රීඩාංගණයේදී පිතිකරුවන් යුගලයක් ඕනෑම කඩුල්ලක් වෙනුවෙන් රැස් කරන ලද ඉහළම ලකුණු සංඛ්‍යාවේ පැරණි වාර්තාවද බිඳ වැටීම දිනයේ සුවිශේෂී සිදුවීම බවට පත්විය. මීට පෙර එම වාර්තාවට හිමිකම් කියන ලද්දේ යුනිස් ඛාන් සහ ෆයිසාල් ඉක්බාල් එක්ව 2009 වසරේදී 5 වැනි කඩුල්ල වෙනුවෙන් රැස් කරන ලද ලකුණු 174 ක සම්බන්ධතාවය විය.

පළමු දින දෙකේදී වේග පන්දු යවන්නන්ට සහයෝගය හිමි වුණත් අව් රශ්මිය පැමිණීමත් සමඟ ක්‍රමයෙන් පිතිකරුවන්ගේ රජ දහනක් බවට පත්ව තිබෙන කරච්චි තණතීරුවේදී රිසි සේ තම පිතිහැසිර වූ අබීඩ් අලී පන්දු 124 කදී ලකුණු 93 ක්ද ශාන් මසූඩ් පන්දු 116 කදී ලකුණු 78 ක් ද ලබා ශතක පෙනෙන මායිමට පැමිණීමට සමත්ව සිටියහ.

ලකුණු 53 ක් ලබමින් තෙවැනි දින ඇරඹූ පාකිස්තානුවෝ තරග ආරම්භයේ සිට දිවා ආහාරය දක්වා වූ කාල සීමාවේදී යවනු ලැබූ පන්දුවාර 26 ඇතුළත ලකුණු 118 ක් රැස් කර ගත්තේ ශ්‍රී ලංකා පන්දු යවන්නන්ට කිසිම අවස්ථාවක් ලබා නොදෙමිනි. ඒ අතර තුර කිසියම් සිදුවූ එකම කැපී පෙනෙන සිදුවීම වූයේ 31 වැනි පන්දුවාරය ක්‍රියාත්මක කරන ලද ළහිරු කුමාරගේ පන්දුවක් අබීඩ් අලීගේ පසු පාදයේ වැදීම මත කරන ලද ඉල්ලීම පමණි. ප්‍රධාන විනිසුරු එය නිෂ්ප්‍රභා කර සිටියද ඉන් සෑහීමකට පත් නොවුණු ශ්‍රී ලංකා නායකයා තෙවැනි විනිසුරුගේ සහාය අපේක්ෂා කළ නමුදු එය කඩුල්ලට ඉහළින් යන පන්දුවක් බවට පුණරූපණ වලින් පෙනී ගියේය. ඉන් සිදුවූයේ තෙවැනි විනිසුරු විමසීම සදහා ශ්‍රී ලංකාවට හිමි අවස්ථා 2 න් එක් අවස්ථාවක් අහිමි වීම පමණි.

ශාන් මසූඩ් ට අද දිනය විශේෂත්වයක් ගෙන දුන්නේ ටෙස්ට් තරග අංශයේ ලකුණු 1000 සීමාව ඉක්මවා යෑමට සමත්වීමය. ළහිරු කුමාරගේ පන්දුවකට ලකුණු 2 ක් ලබා ගනිමින් සිය ටෙස්ට් තරග දිවියේ 7 වැනි අර්ධ ශතකය සම්පූර්ණ කරගත් වමත් පිතිකරුවා ළහිරු ක්‍රියාත්මක කරන ලද ඊළඟ පන්දුවාරයේදී ලකුණක් ලබා ගනිමින් ලකුණු 1000 සීමාව ඉක්මවා ගියේය.

Related posts

England U19 Tour of Sri Lanka 2021

Web Admin

Sri Lanka Cricket Awards Night in a riot of Colour

Web Admin

‘ග්‍රේස්’ අපරාජිතව අවසන් සටනට

Chamila Karawita