Media Centre News Under 19

පස්වැනි කඩුල්ලේ වේගවත් සම්බන්ධතාවය යොවුන් පිලේ ජය වළකයි

පස්වැනි කඩුල්ල වෙනුවෙන් පන්දු 37 කදී ගොඩනංවන ලද ලකුණු 108 ක වේගවත් ලකුණු සම්බන්ධතාවය හේතුවෙන් බටහිර ඉන්දීය කොදෙව් දූපත්හි පැවැත්වෙන වයස අවුරුදු 19 න් පහළ යොවුන් තුන්කොන් ක්‍රිකට් තරගාවලියේ මූලික වටයේ අවසන් තරගයෙන් ශ්‍රී ලංකාවට එරෙහිව ලකුණු 44 ක ජයක් වාර්තා කිරීමට එංගලන්ත කණ්ඩායම සමත්විය. මෙම තරගයට පෙර කණ්ඩායම් දෙකම අවසන් මහ තරග වරම උදා කර ගැනීමට සමත්ව සිටි අතර අවසන් මහ තරගය හෙට (21 දා) කූලිජ්හිදී පැවැත්වෙනු ඇත.

ප්‍රථමයෙන් පන්දුවට පහර දුන් එංගලන්ත යොවුන් පිතිකරුවෝ නියමිත පන්දුවාර 50 අවසනදී කඩුලු 4 කට ලකුණු 292 ක් ලබා ගැනීමට සමත්වූහ. සුපිරි පිති ප්‍රහාරයක් දියත් කළ ජෝර්ඩන් කොක්ස් පන්දු 127 කදී ලකුණු 105 ක් රැස් කරන ලද්දේ එංගලන්ත ඉනිම හමාර වන තෙක්ම සිය කඩුල්ල ආරක්ෂා කර ගනිමිනි.

එංගලන්ත ඉනිමේ 44 වැනි පන්දුවාරය තෙක් සිය පාලනයට නතු කර ගැනීමට ශ්‍රී ලංකා පන්දු යවන්නන් සමත් වුවත් අංක 6 පිතිකරුවා ලෙසින් පිටියට පිවිස ජෝයි එවිෂන් පන්දු 18 කදී රැස් කරන ලද වේගවත් ලකුණු 50 ක ඉනිම හේතුවෙන් අවසන් පන්දු 37 ඇතුළත ලකුණු 108 ක් රැස් කර ගැනීමට එංගලන්ත යොවුන් පිලට හැකියාව ලැබිණ. එම සම්බන්ධතාවය ප්‍රධාන කොට 44 වැනි පන්දුවාරය අවසානයේ ලකුණු 184 කඩුලු 4 ක් ලෙසින් සටහන් වුණු එංගලන්ත ඉනිම නියමිත පන්දුවාර 50 අවසනදී ලකුණු 292 කට කඩුලු 4 ක් ලෙසින් සටහන් විය.

එංගලන්ත සමස්ථ ඉනිමේ පන්දුවට පහර දීමට පැමිණි සියළුම පිතිකරුවන් ලකුණු 20 සීමාව ඉක්මවා ලීමට සමත් වුවත් සියල්ල වෙනස් වූයේ එවිෂන්ගේ ඉනිම හේතුවෙනි. හයේ පහර 6 කින් සහ හතරේ පහර 2 කින් එවිසන් සිය ඉනිම වර්ණවත් කරද්දී අනෙක් අන්තයේ රැඳී සිටි ශතක ලාභී කොක්ස් හයේ පහර 3 ක් සහ හතරේ පහර 7 ක් සිය ඉනිමට එක් කර ගත්තේය.

පිළිතුරු ඉනිම ක්‍රීඩා කළ ශ්‍රී ලංකා කණ්ඩායමට පළමු කඩුල්ල වෙනුවෙන් පන්දු 92 කදී ලකුණු 103 ක් එක් කිරීමට නවෝද් පරණවිතාන සහ කමිල් මිශාර සමත්වූහ. රවිදු රසාන්ත සහ සොනාල් දිනූෂ අර්ධ ශතක රැස් කිරීමට සමත්වීමට හැරුණු කොට සෙසු පිතිකරුවන් කිසිවකු සැලකිය යුතු ලකුණු සංඛ්‍යාවන් ලබා ගැනීමට අපොහොසත් විය. මැද පෙළින් ලකුණු අතරට ආ රවිඳු රසාන්ත පන්දු 46 කට මුහුණ දෙමින් ලකුණු 52 ක්ද සොනාල් දිනූෂ පන්දු 64 කදී ලකුණු 51 ක්ද රැස් කර ගත්හ. මෙම තරගාවලියේ ශූරයින් තීරණය කිරීම වෙනුවෙන් වූ අවසන් මහ තරගය හෙට (21 දා) කූලිජ් හි පැවැත්වෙනු ඇත.

ලකුණු සාරාංශය

එංගලන්තය පන්දුවාර 50 කදී කඩුලු 4 ට ලකුණු 292 – (ජෝර්ඩ්න් කොක්ස් 105*, ජෝ එවිසන් 50*, ජැක් හයින්ස් 39, සෑම් යංග් 33, ටොම් ක්ලාක් 22, ලුක් හොල්මන් 24, ළහිරු ගමගේ 71/1, සොනාල් දිනූෂ 41/1, චමිදු විජේසිංහ 51/1, නවීන් ප්‍රනාන්දු 32/1)

ශ්‍රී ලංකාව පන්දුවාර 50 කදී කඩුලු 9 ට ලකුණු 248 යි – (නවෝද් පරණවිතාන 73, කමිල් මිශාර 40, රවිඳු රසාන්ත 52, සොනාල් දිනූෂ 51, ළහිරු ගමගේ 12, ලුක් හොල්මන් 50/2, ලුවිස් ගෝල්ඩ්වර්ති 37/2)

Related posts

ශ්‍රී ලංකා යොවුන් පිලට දැවැන්ත ජයක්

Chamila Karawita

මිනෝද් භානුක ඉනිමක වැඩිම ලකුණු ලාභියා වෙයි

Chamila Karawita

Major Club League tournament to resume

Web Admin