News Sinhala Column Womens Cricket

හර්ෂිතා මාධවී නොදැවී 106ක් ලබා ගනී

නේපාලයේ පැවැත්වෙන සාග් ක්‍රීඩා උළලේ කාන්තා අවුරුදු 23න් පහළ (නැගීඑන) තරගාවලියට සහභාගිවන ශ්‍රී ලංකා කණ්ඩායමේ නායිකාව හර්ෂිතා මාධවි මාලදිවයින සමග තරගයේදී නොදැවී ලකුණු 106ක් ලබා ගැනීමට සමත්වූවාය.

    මේ තරගයේදී ශ්‍රී ලංකාව ඕවර 20 අවසානයේ කඩුලු දෙකකට ලබාගත් ලකුණු 279ට පිළීතුරු ලෙස මාලදිවයින ඕවර 14.5කදී සියලු ක්‍රීඩිකාවන් දැවී ලබාගත්තේ ලකුණු 30කි. මේ අනුව ශ්‍රී ලංකාවට ලකුණු 249ක පහසු ජයක් අත්විය.

    ශ්‍රී ලංකා ඉනිමේදී හර්ෂිතා මාධවී සහ සත්‍යා සංදීපනී තෙවන කඩුල්ලට ඕවර 15කදී නොදැවී එක්කළ ලකුණු සංඛ්‍යාව 221කි. එය ඕවරයකට සාමාන්‍ය ලකුණු 14.7කි. හර්ෂිතා මාධවී පන්දු 47කදී හතරේ 15ක් හයේ තුනක් සමග නොදැවී 106ක්ද සත්‍යා සංදීපනී පන්දු 48කදී හතරේ 11ක් හයේ තුනක් සමග නොදැවී ලකුණු 96ක්ද ලබාගත්හ. දැවීගිය පිතිකාරිණියන් වූයේ උමේෂා තිමේෂිණි (18) සහ ජනාදි අමාලිය (32)

    මාලදිවයිනේ පිතිකාරිණියන් පස්දෙනෙකුම දැවී ගියේ එකම ලකුණක්වත් නොලබාමය. වැඩිම ලකුණු ලාභිනිය සාජා ෆාතිමා ලබාගත්තේ ලකුණු හයකි. ජේ.අමාලි ලකුණු දෙකකට කඩුලු තුනක්ද සත්‍යා සංදීපනි ලකුණු 13කට කඩුලු 02ක් ද දවාලූහ. 

    මේ අතර දෙසැම්බර් 03 වැනිදා ශ්‍රී ලංකාව සහ බංග්ලාදේශය අතර තරගයෙන් බංග්ලාදේශය තියුණු තරගයකින් ජය ලැබීය. ශ්‍රී ලංකාව ඕවර 20කදී කඩුලු 6කට ලකුණු 122ක් ලැබූ අතර බංග්ලාදේශය ඕවර 18.3කදී කඩුලු 3කට ලබාගත් ලකුණු ප්‍රමාණය 126කි. මෙය මූලික වටයේ තරගයක් වූ අතර මේ කණ්ඩායම් දෙකම දෙසැම්බර් 08වැනිදා අවසාන තරගයකට සුදුසුකම් ලබතැයි අපේක්ෂිතය.

    ශ්‍රී ලංකා – බංග්ලාදේශය මූලික වටයේ තරගයේදී උමේෂා තිමේෂිණි ලකුණු 56ක්ද හර්ෂිතා මාධවී ලකුණු 33ක්ද රැස්කළහ.බංග්ලාදේශය සජිඩා ඉස්ලාම් පන්දු 45කදී ලබාගත් ලකුණු 51ක මත ඔවුනට ජය අත්විය. උමේෂා තිමාෂිණි ලකුණු 13කට කඩුල්ලක් බිද දැමුවාය.

බන්දුල මොල්ලිගොඩ

Related posts

කොරෝනාවට එරෙහි සටනට ශ්‍රී ලංකා ක්‍රිකට් වෙතින් ලක්ෂ 250 ක්

Web Admin

කැන්ඩි ආරම්භක පිතිකරුවෝ ශක්තිමත් පදනමක් එක් කරති

Chamila Karawita

මංගල තරගයේදීම වාර්තාවක් පිහිටවූ ප්‍රවීන් අවුරුදු 7 දී අම්මට කිව්ව දේ

Chamila Karawita