Sinhala Column

තරුණ ක්‍රීඩකයනට 20-20 සංචිතයට ඇතුලුවීමට අවස්ථාවක් – දේශීය ක්‍රිකට් අංශ ප්‍රධානී කියයි

ශ්‍රී ලංකා ක්‍රිකට් ආයතනයේ මෙහෙයවීමෙන් මේ දිනවල පැවැත්වෙන අන්තර් සමාජ ආරාධිත 2019-20 මේජර් 20-20 ක්‍රිකට් තරගාවලිය සංවිධානය කිරීමේ මෙවර මූලික පරමාර්ථය වී ඇත්තේ ලබන ඔක්තෝබරයේ ඕස්ට්‍රේලියාවේ පැවැත්වෙන මීළග 20-20 ලෝක කුසලාන ක්‍රිකට් තරගාවලියට ප්‍රබල ශ්‍රී ලංකා කණ්ඩායමක් තෝරා ගැනීම යැයි ක්‍රිකට් ආයතනයේ දේශීය ක්‍රිකට් අංශ ප්‍රධානී චින්තක එදිරිමාන්න සඳහන් කරයි.

          විශේෂයෙන්ම තරුණ ක්‍රීඩකයනට තම උපරිම දක්ෂතා පෙන්වා ශ්‍රී ලංකා 20-20 ලෝක කුසලාන සංචිතයට ඇතුළුවීමට මෙහිදී අවස්ථාව සළසා තිබෙනවා. 20-20 ජාතික කණ්ඩායම ඉන්දියාවේදී නියෝජනය කළ ක්‍රීඩකයනුත් මීට අයත්වනවා. උපරිම දක්ෂතා පෙන්වන ක්‍රීඩකයනට අනිවාර්යෙන්ම ලෝක කුසලාන තරගාවලියේ දී ශ්‍රී ලංකාව නියෝජනය කිරීමට අවස්ථාව සැළසෙනු ඇතැයිද චින්තක එදිරිමාන්න පවසයි.

          මේ 20-20 තරගාවලිය ශ්‍රී ලංකා ක්‍රිකට් ආයතනයේ වාර්ෂික දින දර්ශනයට ඇතුළත් තරගාවලියක් වුවත් දක්ෂ ක්‍රීඩකයනට ජාතික සංවිධානයට ඇතුළත්වීමට මෙය හොඳ අවස්ථාවක් යැයි කී චින්තක එදිරිමාන්න පසුගියදා නිමාවට පත්වූ මේජර් අන්තර් සමාජ ඕවර 50 තරගාවලියත් මේ මස ඇරැඹෙන තෙදින තරගාවලියත් ක්‍රිකට් ආයතනය සංවිධානය කරනුයේ ක්‍රීඩක දක්ෂතා ඔපමට්ටම් කරගෙන ජාත්‍යන්තර තලයට යාමට අත්වැලක් දීමට යැයිද කීය.

          මේ දිනවල ක්‍රියාත්මක වන මේජර් 20-20 ආරාධිත තරගාවලිය කොටස් හතරකට බෙදා වෙන්කර ඇති අතර ‘ඒ’ කොටසට ගාල්ල ක්‍රිකට් සමාජය, මුවර්ස්, කෝල්ට්ස්, පානදුර, බදුරලිය, බ්ලුම්ෆීල්ඩ් සහ යුනිචෙලා කණ්ඩායම් ද  ‘බී’ කොටසට එන්.සී.සී.ටැමිල් යූනියන්, සරසන්ස්, එස්.එස්.සී.නාවික හමුදාව සහ පොලීසියත් ‘සී’ කොටසට යුද හමුදාව හලාවත මේරියන්ස්, මීගමුව ගුවන් හමුදාව කුරුණෑගල තරුණ හා කලුතර කණ්ඩායම්ද ‘ඩී’ කොටසට රාගම,ලන්කන්, බී.ආර්.සී.වරාය අධිකාරිය, මහනුවර රේගුව හා නුගේගොඩ කණ්ඩායම් අයත්වේ.

          මේ තරගාවලියේ මූලික තරග ජනවාරි 15 වැනිදා නිමාවට පත්ව අර්ධ අවසාන පූර්ව තරග හතර ජනවාරි 17වැනිදා කටුනායකදී සහ සරවනමුත්තු පිටියේදී පවත්වන බව සදහන් කරන චින්තක එදිරිමාන්න අවසාන පූර්ව තරග දෙක 19 වැනිදා කටුනායකදීත් අවසාන මහා තරගය 21 වැනි අගහරුවාදා එස්.එස්.සී.පිටියේදීත් පැවැත්වෙනු ඇතැයිද කීවේය.

          ජයග්‍රාහී කණ්ඩායමට හා තරගාවලියේ දක්ෂම ක්‍රීඩකයනට ත්‍යාගද පිරිනැමෙනු ඇත.

බන්දුල මොල්ලිගොඩ

-The opinions expressed here are the views of the writer and do not necessarily reflect the views and opinions of Sri Lanka Cricket-

Related posts

ලංකා ක්‍රිකට් ක්‍රීඩිකාවනට අත්දැකීම් රැසක්, ඕස්ට්‍රේලියාව 3-0කින් ජයගනී

Web Admin

21 වැනි සියවසේ විශිෂ්ඨයාගේ සම්මානය ‘මුරලි’ට

Web Admin

යොවුන් පුහුණුකරුගෙන් අනාවැකියක්…

Web Admin