Featured Media Centre News Sri Lanka tour of Zimbabwe 2020

මෙන්ඩිස්ගේ 7 වැනි ටෙස්ට් ශතකයෙන් සිම්බාබ්වේ බලාපොරොත්තු බිඳ වැටෙයි

පන්දුවට පහර දීමට අසීරු පස්වැනි දිනයේදී පන්දුවාර 96 කදී කඩුලු ආරක්ෂා කර ගැනීම හෝ ජයග්‍රහණය සඳහා ලකුණු 361 ක ඉලක්කයක් හඹා යෑමේ අභියෝගය කර මත තබා ගනිමින් පන්දුවට පහර දුන් කුසල් මෙන්ඩිස් ප්‍රමුඛ ශ්‍රී ලංකා පිතිකරුවෝ සිම්බාබ්වේ පිලට එරෙහිව හරාරේහි හරාරේහි නිමාව දුටු දෙවැනි ටෙස්ට් තරගය ජය පැරදුමෙන් තොරව අවසන් කර ගැනීමට අද (31 දා) සමත්වූහ. ඒ අනුව තරය නිමා කරන විට සිය දෙවැනි ඉනිම ක්‍රීඩා කරමින් සිටි ශ්‍රී ලංකා කණ්ඩායම කඩුලු 3 කට ලකුණු 204 ක් රැස් කරගෙන සිටියහ.

කෙසේ වෙතත් පළමු ටෙස්ට් තරගය ජය ගැනීමට ශ්‍රී ලංකා පිල සමත් වූ බැවින් තරග 2 කින් සමන්විත දෙරට අතර ටෙස්ට් තරගාවලිය 1-0 ක් ලෙස පෙරමුණ ගනිමින් ජය ගැනීමට සංචාරක ශ්‍රී ලංකා කණ්ඩායමට හැකියාව ලැබිණ.

තරගය නිමා වන විටත් මිනිත්තු 291 ක් පුරා කඩුල්ලේ රැඳී සිටි කුසල් මෙන්ඩිස් පන්දු 233 කට මුහුණ දෙමින් ලකුණු 116 ක්ද පැයකට වැඩි වේලාවක් කඩුල්ලේ රැදී සිටි දිනේෂ් චන්දිමාල් ලකුණු 13 ක්ද ලබා සිටියහ.

කුසල් මෙන්ඩිස් අද වාර්තා කර ගන්නා ලද්දේ ඔහුගේ ටෙස්ට් තරග දිවියේ 7 වැනි ශතකය විය. ඉනිම 20 කට පසු ලබාගත් මෙම වටිනා ශකතය සඳහා මෙන්ඩිස් හයේ පහරක් සහ තවත් හතරේ පහර 13 ක් ඇතුළත් කර තිබුණි. කුසල්ගේ මෙම වටිනා ඉනිම හේතුවෙන් ටෙස්ට් තරග අංශයේ ලකුණු 3000 ආසන්නයට පැමිණීමටද මෙන්ඩිස්ට අද අවස්ථාව ලැබිණ. ශ්‍රී ලංකාව වෙනුවෙන් ටෙස්ට් ලකුණු 3000 සීමාව ඉක්මවා යන 14 වැනි පිතිකරුවා බවට පත්වීම සඳහා මෙන්ඩිස්ට තවත් අවශ්‍ය වන්නේ ලකුණු 05 ක් පමණි.

ආරම්භයේ සිටම මනා සැලසුමක් සහිතව පන්දුවට පහර දුන් ශ්‍රී ලංකා පිතිකරුවෝ ජය පැරදුමෙන් තොර තරගයක් වෙනුවෙන් පන්දුවට පහර දෙනු දැකීම කැපී පෙනුණි. පෙර තරගාවලි මෙන් නොව දිනූ දේ රැක ගැනීමේ අදිටනින් පන්දුවට පහර දුන් ශ්‍රී ලංකා පිතිකරුවන් අතරින් මෙන්ඩිස් සහ ඕෂධ දෙවැනි කඩුල්ල වෙනුවෙන් ලකුණු 81 ක සම්බන්ධතාවක් පවත්වා ශ්‍රී ලංකා පිල ස්ථාවරත්වයක් කරා රැගෙන ගියහ. එහිදී මෙන්ඩිස්ට පසු වැඩිම ලකුණු ලාභියා වූ ඕෂධ ප්‍රනාන්දු දෙවැනි ඉනිමේදීද අර්ධ ශතකයට ලකුණු 3 ක් තිබියදී සිකන්දර් රාසාගේ ගොදුරක් ලෙසින් දැවී ගියේය.

පෙර දිනයේදී ලකුණු 47 ක් ලබා සිටි ෂෝන් විලියම්ස්ට අර්ධ ශතකය ලබා ගැනීම සඳහා ඉඩ පහස සලසාලීම වෙනුවෙන් අද දිනයේදීද සිම්බාබ්වේ පිල පන්දුවට පහර දුන් අතර ලක්මාල් විසින් යවන ලද පළමු පන්දුවටම හයේ පහරක් එල්ල කරමින් එය සපුරා ගැනීමට සිම්බාබ්වේ නායකයා සමත්විය. ඒ සැනින් ඉනිම අත්හිටුවා පන්දුවට පහර දීම සඳහා ශ්‍රී ලංකාවට අවස්ථාව ලබා දුන්නේ කෙසේ හෝ ඉතිරිව තිබෙන පන්දුවාර 96 දී සංචාරකයින්ව අමාරුවේ දැමීමේ අභිප්‍රායෙනි.

ඒ අනුව දිවා ආහාරය සඳහා තරගය නිමා කරන විට ශ්‍රී ලංකා පිල එක් කඩුල්ලක් අහිමි කර ගනිමින් ලකුණු 105 ක් රැස් කරගත්තේය. කෙසේ වෙතත් දිවා ආහාරයත් තේ පානයත් අතර කාලයේදී ඕෂධ සහ ඇන්ජලෝ මැතිව්ස් දෙදෙනාම දැවී යෑමත් ඒ අතරතුර කාලයේදී ලකුණු 51 ක් පමණක් ලකුණු පුවරුවට එක්වීම නිසා ඉලක්කය හඹා යෑමට අසීරු කරුණක් විය. මෙම තත්ත්වය මත අවසන් පැය 2 ක ඇතුළත ලකුණු 205 ක් ලබා ගැනීමේ අභියෝගය ශ්‍රී ලංකාව හමුවේ පැවැතිණ.

කෙසේ වෙතත් ශ්‍රී ලංකා පිතිකරුවන් කඩුලු ආරක්ෂා කර ගනිමින් පන්දුවට පහර දීම මත අවසන් හෝරාව එළැඹෙත්ම දෙපිළේම නායකයන්ගේ කැමැත්ත ඇතුව නතර කර දැමීමට විනිසුරුවෝ කටයුතු කළහ. ඒ අවස්ථාව වන විටත් ශ්‍රී ලංකාවට ලකුණු 157 ක් අවශ්‍යව තිබූ අතර කඩුලු 7 ක් අත ඉතිරිව තිබිණ. 

සිම්බාබ්වේ පළමු ඉනිම 406 යි

ශ්‍රී ලංකාව පළමු ඉනිම 293 යි

Related posts

මඩුගල්ලේ සහ ධර්මසේන ලෝක කුසලාන නිලධාරී මඬුල්ලට

Chamila Karawita

‘ග්‍රේස්’ පිට පිටම දෙවැනි ජයත් ලබයි

Chamila Karawita

කාන්තා ආසියානු කුසලාන කාලසටහනෙහි යළි වෙනසක්

Web Admin