Featured Media Centre News West Indies Tour of Sri Lanka 2020

ශ්‍රී ලංකාව තරගාවලි ජයකට සැරසෙද්දී කොදෙව්වෝ ඉතිහාසය වෙනස් කිරීමට මාන බලති

Chamila Karawita reporting from Hambantota

එස්. එස්. සී. ක්‍රීඩාංගණයේ පැවැති පළමු තරගය ජයගනිමින් තරගාවලි ජයග්‍රහණයේ අභිමුවට පැමිණ සිටින ශ්‍රී ලංකා කණ්ඩායම තරගයක් ඉතිරිව තිබියදීම තරගාවලිය ජය ගැනීමට සැලසුම් සකස් කරද්දී 2014 වසරේ සිට ලොව ප්‍රධාන රටකට එරෙහිව එක්දින තරගාවලි ජයග්‍රහණය යක් නොමැති කොදෙව් කණ්ඩායම එම පරාජිත ගමන නවතා ගැනීමේ අරමුණ ඇතිව හම්බන්තොට මහින්ද රාජපක්ෂ ක්‍රීඩාංගණයට හෙට (26 දා) අවතීර්ණ වනු ඇත. තරග 3 කින් සමන්විත දෙරට අතර එක්දින තරගාවලියේ දෙවැනි තරගය ලෙසින් පැවැත්වෙන මෙම තරගය ශ්‍රී  ලංකා වේලාවන් ප.ව. 2.30 ට ආරම්භ වනු ඇත.

කණ්ඩායම් දෙකටම මහින්ද රාජපක්ෂ ක්‍රීඩාංගණයේදී සිය පුහුණුවීම් සඳහා අද දිනයේදී සහභාගිවී සිටියහ. එහිදී ශ්‍රී ලංකා කණ්ඩායම උදෑසන කාලයේත් බටහිර ඉන්දීය කොදෙව් පිල පස්වරුවේදී හෙවත් ආලෝක ධාරා මධ්‍යයේ පුහුණුවීම් වල නිරත වූහ. අද දිනය ශ්‍රී ලංකා කණ්ඩායමේ ක්‍රීඩකයින්ට අනිවාර්යය පුහුණු සැසියක් නොවූ බැවින් ක්‍රීඩකයින් කිහිප දෙනෙකුම ක්‍රීඩාංගණයට පැමිණ සිටීමෙන් වැළකී සිටියහ. එහෙත් ඊට පෙර දින රාත්‍රියේ ආලෝක ධාරා මධ්‍යයේ පැවැති පුහුණු සැසිය සඳහා සියල්ලෝම සහභාගිවෙමින් තුන් ඉරියව්වෙන්ම සිය පුහුණුවීම් වල නිරත වූහ.

සත්කාරකත්වයේ සියළු වාසීන් ශ්‍රී ලංකා කණ්ඩායම සතු වුවද හෙට තරගය පැවැත්වෙන මහින්ද රාජපක්ෂ ක්‍රීඩාංගණයේදී ශ්‍රී ලංකා කණ්ඩායමක් ද තරගයකට සහභාගිවනු ලබන්නේ වසර 4 ආසන්න කාලයකින් පසුව වේ. මෙහි අවසන් වරට ශ්‍රී ලංකා පිලක් එක්දින තරගයකට සහභාගිව ඇත්තේ 2017 වසරේ ජුලි මස සිම්බාබ්වේට එරෙහිව පැවැති තරගයට වන අතර එම තරගයෙන්ද ශ්‍රී ලංකාව කඩුලු 3 ක පරාජයක් අත්වින්දේය.

බටහිර ඉන්දීය කොදෙව් 

බටහිර ඉන්දීය කොදෙව් කණ්ඩායමක් හම්බන්තොටදී එක්දින තරගයකට සහභාගිවනු ලබන පළමු තරගය වන්නේ හෙට පැවැත්වෙන තරගය වේ. පූර්විකාවේ සඳහන් කළාක් මෙන් මෑතකදී ටෙස්ට් වරම් දිනා ගන්නා ලද ඇෆ්ගනිස්තානය සහ අයර්ලන්තයට එරෙහිව පැවැති එක්දින තරගාවලි ජය ගැනීමට සමත්වීම හැරුණු කොට 2014 වසරේ සිට මේ දක්වා සහභාගිව ඇති එකම එක්දින තරගාවලියක් හෝ ජය ගැනීමට බටහිර ඉන්දීය කොදෙව් කණ්ඩායම අසමත්ව සිටියි. 

දීර්ඝ කාලයක් එක්දින තරගාවලි ජයග්‍රහණයක පහස විඳ නැති බටහිර ඉන්දීය කොදෙව් කණ්ඩායම මෙම තරගාවලියේ පළමු තරගයද පරාජයට පත්වී තරගාවලිය 0-1 ක් ලෙස පසුපසින් සිටිමින් හෙට තරගයට අවතීර්ණ වීම ඔවුන්ට මානසික වශයෙන් බලපෑමක් එල්ල නොකරනවාම නොවේ. කෙසේ වෙතත් ඔවුන් සතුව සතුටට පත්විය හැකි කාරණා අතර ඉදිරි පෙළ පිතිකරුවන් සියලු දෙනා පාහේ ලකුණු අතරට පැමිණ සිටීම සඳහන් කළ හැක. 

පළමු තරගය පරාජයට පත් වුවත් කොදෙව් පන්දු යැවීමේ අංශය ගෙන බැලීමේදී ජේසන් හෝල්ඩර්, අල්සාරි ජෝෂප් සත්කාරක කණ්ඩායමේ පිතිකරුවන්ව කිසියම් පාලනයකට නතර කර ගැනීමට සමත් වුවද අනෙක් වේග පන්දු යවන්නා වන ෂෙල්ඩන් කෝට්‍රල්ට රිද්මය ගොඩ නගා ගැනීමට තවමත් අපොහොසත් වී සිටියි. ඔහුගේ පන්දුවාර 10 දී ලකුණු 69 ක් ලබා ගැනීමට ශ්‍රී ලංකා පිතිකරුවන් සමත්විය.

එමෙන්ම පළමු තරගයේදී කොදෙව් කණ්ඩායම අතින් අතිරේක ලකුණු 26 ක් ශ්‍රී ලංකා පිල වෙත ලබා දීම එම ජයග්‍රහණයේදී ශ්‍රී ලංකාවට අතිරේක වාසියක් විය. එම අතිරේක ලකුණු 26 අතරින් 14 ක්ම වයිඩ් පන්දු බවට පත්වීම නිසා මෙම තරගයේදී ඔවුහු මේ පිළිබඳව අවධානය යොමු කරමින් තරග වදිනු ඇත.

ශ්‍රී ලංකාව

පළමු තරගය ජය ගැනීමට සමත්වීමත් සමඟ කණ්ඩායම තුළ වඩා වැඩි විශ්වාසයක් ගොඩ නඟා ගනිමින් හෙට තරගයට අවතීර්ණ වන ශ්‍රී ලංකා කණ්ඩායම දෙසින් දක්නට ඇති සතුටුදායකම කරුණ වන්නේ පන්දු රැකීමේ අංශයෙන් ලබා ඇති ශීඝ්‍ර දියුණුවයි. පසුගිය වසර කීපයේදී මෙන් නොව එම තරගයේදී ශ්‍රී ලංකා ක්‍රීඩකයින් අතින් එකම උඩ පන්දුවකි හෝ ගිලිහී නොගිය අතර දුවද්දී දවා ගැනීම් දෙකක් ලබා ගැනීමට සමත්වීම කැපී පෙනෙයි. පන්දු රැකීමට අමතරව සමස්ථයක් ගෙන බැලීමේදී කණ්ඩායමේ තුන් ඉරියව් දක්ෂතා වල කැපී පෙනෙන වෙනසක් සිදුවී තිබෙන බව පෙර තරගයේදී පැහැදිළිවම දැක ගත හැකි විය. මෙහිදී කණ්ඩායමක් ලෙස සෙමෙන් සෙමෙන් දියුණුවක් ලබන බව මේ කරුණු පිළිබඳව අවධානය යොමු කිරීමේදී අනුමාන කළ හැක. 

නිකොලොස් පූරාන්ට අමතරව පළමු තරගයේදී පිත්තෙන් කැපී පෙනුණු ෂායි හෝප් ප්‍රතිවාදී කඳවුරෙන් ශ්‍රී ලංකාවට අභියෝගයක් එල්ල විය හැකි දෙවැනි පිතිකරුවා වේ. හේ පළමු තරගයේදී සිය එක්දින තරග දිවියේ 9 වැනි ශතකය රැස් කර ගන්නා ලද්දේ ඉන් 7 ක්ම ආසියානු තණතීරුවලදී වාර්තා කරගනිමිනි.

හෙට තරගය පිළිබඳව අදහස් දක්වා සිටි ප්‍රධාන පුහුණුකරු මිකී ආතර්, “කණ්ඩායම් හැඟීම නම් ඉතා ඉහළයි. ක්‍රීඩකයින් සියල්ලම මේ වන කොට යෙහාඳ සංකලනයකින් සිටිනවා. ඔවුන් ඔවුන්ට හිමි භූමිකාවල් වල ඉතා හොඳින් කටයුතු කරනවා. වැදගත්ම දේ ඔවුන් එක පොකරට දක්ෂතා අතර ඉන්නවා දැකීම. ඒක තමයි තරගයක් ජය ගැනීමට වැදගත් වන්නේ”යි පවසයි.

අවසන් XI

දෙවැනි තරගය අවසානයේදී බටහිර ඉන්දීය කොදෙව් නායක කිරන් පොලාර්ඩ් මෙන්ම හෙට තරගයට පෙර පැවැති මාධ්‍ය හමුවේදී ශ්‍රී ලංකා පිලේ ප්‍රධාන පුහුණුකරු මිකී ආතර් පවසන අන්දමට හෙට තරගය සඳහා පළමු තරගය ක්‍රීඩා කරන ලද කණ්ඩායමේ ක්‍රීඩකයින් 11 දෙනාම තරග කරනු ඇත. 

ශ්‍රී ලංකා කණ්ඩායම – 1. දිමුත් කරුණාරත්න, 2.අවිශ්ක ප්‍රනාන්දු, 3. කුසල් පෙරේරා, 4. කුසල් මෙන්ඩිස්, 5. ඇන්ජලෝ මැතිව්ස්, 6. ධනංජය ද සිල්වා, 7. තිසර පෙරේරා, 8. වනිඳු හසරංග, 9. ඉසුරු උදාන, 10. ලක්ෂාන් සඳකැන්, 11. නුවන් ප්‍රදීප්. 

කොදෙව් කණ්ඩායම – 1. සුනිල් අම්බ්‍රිස්, 2. ෂායි හෝප්, 3. ඩැරන් බ්‍රාවෝ, 4. රොස්ටන් චේස්, 5. නිකොලොස් පූරාන්, 6. කිරන් පොලාර්ඩ් (නායක), 7. ජේසන් හෝල්ඩර්, 8. හේඩ්න් වෝල්ෂ්, 9. කීමෝ පෝල්, 10. අල්සාරී ජෝසප්, 11. ශෙල්ඩන් කෝට්‍රල්.

මුහුණුට මුහුණ

තරග     59

ශ්‍රී ලංකාව ජය ලබා ඇති තරග     28

බටහිර ඉන්දීය කොදෙව් ජය ලබා ඇති තරග     28

නොවිසඳුණු    03

මහින්ද රාජපක්ෂ ක්‍රීඩාංගණය

2011 වසරේදී ප්‍රථමයෙන් භාවිතයට ගෙන ඇති මහින්ද රාජපක්ෂ ක්‍රීඩාංගණයේදී මෙතෙක් එක්දින තරග 20 ක් පවත්වා තිබේ. ඒ සියළු අවස්ථාවන් වලදී ප්‍රථමයෙන් පන්දුවට පහර දුන් කණ්ඩායම් ලබා ඇති ලකුණු අතර සාමාන්‍ය 288 ක් වශයෙන් සටහන් වන අතර ලකුණු හඹා යමින් අවස්ථා 10 කදී ජයග්‍රහණ වාර්තා කිරීමට කණ්ඩායම් සමත්ව තිබේ. අවස්ථා 7 කදී පරාජයට පත්ව තිබෙන බැවින් මෙහි හඹා යෑමේදී කිසියම් ජයග්‍රහණය සඳහා කිසියම් දායකත්වයක් දක්වනු ඇතැයි අනුමාන කළ හැක. 

Related posts

කාන්තා ක්‍රීඩිකාවන් 35 කට කොන්ත්‍රාත් පිරිනමයි

Web Admin

Bangladesh beat Afghanistan by 7 wkts. to set up final with Pakistan

Web Admin

SLC President’s XI Squad against West Indies

Web Admin