Featured LPL News Sinhala Column

තරගාවලියේ අඩක් නිමවද්දී ජැෆ්නා ස්ටැලියන්ස් අපරාජිතව පෙරමුණේ

සූරියවැව මහින්ද රාජපක්ෂ ජාත්‍යන්තර ක්‍රිකට් ක්‍රීඩාංගනයේ පැවැත්වෙන ප්‍රථම ලංකා ප්‍රිමියර් ලීග් තරගාවලියේ මූලික තරග 20න් අඩක් (10) නිම වන විට ඉදිරියෙන්ම සිටින්නේ තරග හතරකට සහභාගී වී එම තරග හතරම ජයගෙන අපරාජිතව සිටින ජැෆ්නා ස්ටැලියන්ස් කණ්ඩායම වේ.

තුන් ඉරියව්වේම දක්ෂතා දක්වන  තිසර පෙරේරා  නායකත්වය දරණ  ජැෆ්නා ස්ටැලියන්ස් කණ්ඩායම දැනට ලකුණු  අටක් ලබා ලකුණු රැස් කිරීමේ සාමාන්‍ය දළවේගය +1.662 ක් ලෙසට පහසුවෙන් ම ඉදිරියෙන් පසුවේ. සහභාගි වූ තරග හතරෙන් තුනක්ම ජයගෙන තරගයක් පමණක් පරාජය වී ලකුණු හයක් හිමිකරගෙන (දළවේගය  – 0.394) දෙවැනි ස්ථානයේ පසුවන්නේ දඹුල්ල වයිකින්ග් කණ්ඩායමය. තරගාවලිය ආරම්භයේදී ඉදිරියෙන් පසුවු කළම්බු කින්ග්ස් කණ්ඩායම තරගාවලිය අඩක් ගත්වන විට තරග තුනකදී තරග දෙකක් ජයගෙන තරගයක් පරාජය වී ලකුණු හතරක් ලබා (දළවේගය – 0.132) මේ වන විට පසු වුයේ තෙවන ස්ථානයේ ය.

කැන්ඩි ටස්කර්ස් තරග පහකට සහභාගි වී ඉන් හතරක්ම පරාජය වී තරගයක් ජය‍ගෙන ලකුණු 2ක් ලබා (දළවේගය – 0.448) සිව්වන ස්ථානයෙත් ගෝල් ග්ලැඩියේටර්ස් සහභාගි වූ තරග හතරම පරාජය වී ජයග්‍රාහණ ලකුණු නොලබා දළවේගය – 1.113 ක් ලෙස පස්වන හෙවත් අවසාන ස්ථානයේ පසුවේ.

ගෝල් ග්ලැඩියේටර්ස් තරගාවලියේ  අඩක් නිමාවන විට අවසාන ස්ථානයේ පසුවුවත් ඔවුනගේ ආරම්භක පිතිකරු ධනුෂ්ක ගුණතිලක සහභාගි වූ තරග හතරෙදී වරක් නොදැවී ඉනිම හතරේදී  ලකුණු 206ක් ලබා ඉනිමක සමාන්‍යය 68.66 ලබා පිතිකරුවන් අතුරින් ඉදිරියෙන්ම පසුවීම විශේෂත්වයකි. අර්ධ ශතක දෙකක් ලබා ගත් ධනුෂ්ක මේ වන විට ඉනිමක රැස්කළ වැඩිම ලකුණු සංඛ්‍යාව 82කි.

පිතිකරුවන් අතර  දෙවන ස්ථානයේ පසුවන දසුන් ශානක තරග හතරක දී (ඉනිම හතරකදී ) ලකුණු 197ක් ( සාමාන්‍යය 49.25 ) ක් ලබා සිටින අතර කුසල් මෙන්ඩිස් තෙවන ස්ථානයේ පසුවෙමින් තරග පහකදී ( ඉනිම 5යි) ලකුණු 188ක් (නොදැවී 1යි වැඩිම ලකුණු 55යි) සමඟ ඉනිමක සාමාන්‍යය 47ක් ද රැස් කරගෙන සිටි.

තරගාවලියේ මූලික වටයේ තරග 20න් 10 ක් නිමවන විට පන්දු යවන්නන් අතුරින් ඉදිරියෙන්ම සිටින්නේ විදේශිකයින් වීමද විශේෂත්වයකි. මෙහි ඉදිරියෙන්ම සිටින කැන්ඩි ටස්කර්ස් කණ්ඩයමේ නවීන් උල්හක් ඉනිම පහකදී පන්දුවාර 18ක් යවා ලකුණු 183කදී කඩුලු අටක් දවා තිබේ. දෙවැනි ස්ථානයේ පසුවන උස්මාන් ශිවාරි සහ තෙවැනි ස්ථානයේ පසුවන වනිදු හසරංග යන පන්දු යවන්නන් දෙදෙනාම අයත් වනුයේ ජැෆ්නා ස්ටැලියන්ස් කණ්ඩායමටය.

ශිවාරි තරග තුනකදී පන්දු වාර 11ක් යවා ලකුණු 7කට කඩුලු හතක්ද වනිදු හසරංග තරග හතරකදී පන්දු වාර 16ක් යවා ලකුණු 82කට කඩුලු 7ක්ද දවා සිටිති.

ඵෙතිහාසික එල්.පී.එල් තරගාවලියේ ප්‍රථම තරගයේ කළම්බු කින්ග්ස් සහ කැන්ඩි ටස්කර්ස් තරගයේ කණ්ඩායම් දෙකම ලකුණු 219 බැගින් සමවීම ජාත්‍යන්තර 20-20 තරගාවලියක ආරම්භක තරගය සමවූ ප්‍රථම අවස්ථාව මෙය වේ. ජයග්‍රාහකයන් තේරීමට සුපිරි ඕවරය බැගින් ප්‍රදානය කළ අවස්ථාවේ කොළඹ කණ්ඩායම ලකුණු 16ක්ද මහනුවර කණ්ඩායම ලකුණු 12ක් ලබා ගැනීමෙන් ජයග්‍රහණය අත්වූයේ කොළඹ කණ්ඩායමටය.

මූලික වටයේ ප්‍රථම තරග දහයේ ඉනිමක වැඩිම ලකුණු ලැබූ පිතිකරුවන් දෙදෙනාවූයේ ජැෆ්නා ස්ටැලියන් නායක තිසර පෙරේරා සහ එම කණ්ඩායමේම ආරම්භක පිතිකරු අවිශ්ක ප්‍රනාන්දුය. දඹුල්ල සමග තරගයේදී තිසර පන්දු 44කදී හයේ හතක් හතරේ අටක් සමග නොදැවී ලකුණු 97ක්ද ගාල්ල සමග තරගයේදී ආරම්භක පිතිකරු අවිශ්ක ප්‍රනාන්දු පන්දු 53කදී හයේ හතක් හතරේ පහක් සමග නොදැවී ලකුණු 91ක්ද ලබා ඉනිමක වැඩිම ලකුණු සංඛ්‍යාව වාර්තා කළහ.

යාපනය කණ්ඩායමේ ඩුවේන් ඔලිවර් ගාල්ල සමඟ ලකුණු 44කට කඩුලු හතරක් දවාලීම පන්දු යවන්නෙකු මෙතෙක් ඉනිමක ලබා ගත් වැඩිම කඩුලු සංඛ්‍යාවයි.

බන්දුල මොල්ලිගොඩ

Related posts

ශ්‍රී ලංකා කාන්තා ක්‍රිකට් කණ්ඩායම ඕස්ට්‍රේලියාවේ තරගාවලි දෙකකට

Web Admin

Antonian Avishka Tharindu reaches the Mt. Everest for highest schoolboy record score of 350

Web Admin

මෑත කාලයක බිහිවු හොදම 19න් පහළ කණ්ඩායම මෙයයි – නිපුන් ධනංජය කියයි

Web Admin