Featured Media Centre News Sri Lanka Tour of South Africa 2020-21

දෙවැනි ටෙස්ට් තරගයට පෙර කාගිසෝ රබඩා දකුණු අප්‍රිකානු පිලට

ආබාධයක් හේතුවෙන් ශ්‍රී ලංකාවට එරෙහි බොක්සිං දින ඇරැඹි පළමු ටෙස්ට් තරගයට ක්‍රීඩා කිරීමට අවස්ථාව නොලද දකුණු අප්‍රිකානු පිලේ ප්‍රධානම වේග පන්දු යවන්නා වන කගිසෝ රබඩා දෙවැනි ටෙස්ට් තරගයට ක්‍රීඩා කිරීමේ අපේක්ෂාවෙන් දකුණු අප්‍රිකානු කණ්ඩායමට එක් කර තිබේ. ඒ අනුව දෙවැනි ටෙස්ට් තරගය ආරම්භයට පෙර කණ්ඩායම රැඳී සිටින ජෛව ආරක්ෂණ පරිසරයට ඇතුළුවීම සඳහා අනුගමනය කළ යුතු සියලු ආරක්ෂක පිළිවෙත්වලින් අනතුරුව ඔහු කණ්ඩායමට එකතුවනු ඇත.

රබඩා කණ්ඩායමට එකතුවීම යනු එළැඹෙණ 2021 වසර ආරම්භයේ පැවැත්වෙන පළමු ටෙස්ට් තරගය සඳහා වන දකුණු අප්‍රිකානු කණ්ඩායමේ වේග පන්දු බල ඇණිය තවත් හොඳින් සන්නද්ධවීම වේ. මේ වනවිටත් ලුන්ගි න්ගිඩි, එන්රිච් නෝර්ට්ජ් සහ ලුතෝ සිපම්ලා මෙන්ම මඳ වේග පන්දු යවන තුන් ඉරියව් ක්‍රීඩක වියෑන් මෝල්ඩර් පළමු ටෙස්ට් තරගයට ක්‍රීඩා කරමින් සිටින අතර, ග්ලෙන්ටන් ස්ටර්මන්, මිගෙල් ප්‍රිස්ටෝරියස් සහ ඩ්වේන් ප්‍රිටෝරියස්ද වේග පන්දු යවන්නන් ලෙසින් දකුණු අප්‍රිකානු සංචිතයේ පසුවෙති.

දෙවැනි ටෙස්ට් තරගය පැවැත්වෙන්නේද වේග පන්දු යවන්නන්ට සහයෝගයක් දක්වනු ලබන වොන්ඩරස් තණතීරුවේ බැවින් රබඩා කණ්ඩායමට එක්වීමේදී එම තරගයට දකුණු අප්‍රිකානු පිල වේග පන්දු යවන්නන් පස් දෙනෙකුගෙන් සමන්විත අවතීර්ණ වුවද එය පුදුමයට කරුණක් නොවනු ඇත.

ඉකුත් ජනවාරි මසදී එංගලන්තයට එරෙහිව පෝර්ට් එලිසබෙත්හි පැවැති තරගයට ක්‍රීඩා කිරීමෙන් පසු මේ වන තෙක් රබඩා ටෙස්ට් තරගයකට ක්‍රීඩා කර නොමැත. දකුණු අප්‍රිකාව වෙනුවෙන් ටෙස්ට් තරග 43 කට ක්‍රීඩා කර ඇති රබඩා ඉනිම 78 කට ක්‍රීඩා කරමින් කඩුලු 197 ක් බිඳ හෙළීමට සමත්ව සිටියි. කඩුල්ලක් දවා ගැනීමේ සාමාන්‍ය 22.95 ක් රඳවාගෙන සිටින රබඩාගේ හොඳම පන්දු යැවීම ලෙස එංගලන්තයට එරෙහිව ලකුණු 112 කට දවා ගන්නා ලද කඩුලු 7 සටහන් වේ.

Related posts

Sripali Weerakkody Retires from International Cricket

Web Admin

ධනංජයගේ ඉනිමෙන් ශ්‍රී ලංකාව හිස ඔසවයි

Web Admin

ඉන්දියාව පරදවන්න ශ්‍රී ලංකා ක්‍රීඩිකාවන්ගෙන් වෙනමම සැලසුමක්

Chamila Karawita