Featured LPL Media Centre News

යාපනයේ විජයකාන්ත්ට අපූරු උපන්දින තෑග්ගක්

“My11Circle ලංකා ප්‍රිමියර් ලීග්” පන්දුවාර විස්සයි-20 ලීග් ක්‍රිකට් තරගාවලියේ 11 වැනි තරගය ලෙසින් කලම්බු කිංග්ස් පිලට එරෙහිව පැවැත්වෙන තරගයේදී ජැෆ්නා ස්ටැලියන්ස් කණ්ඩායම වෙනුවෙන් යාපනය නියෝජනය කරමින් තරගාවලියට පැමිණ සිටින විජයකාන්ත් වියස්කාන්ත් සිය මංගල තරග වරම් දිනා ගත්තේය. තවත් හෝරා කීපයකින් හෙවත් හෙට දිනය (05 වැනිදා) උදාවත්ම සිය 19 වැනි උපන්දිනය සමරන විජයකාන්ත්ට සැබැවින්ම මෙය අපූරුම උපන්දින තෑග්ගකි.

විජයකාන්ත් අද තරගයට ක්‍රීඩා කිරීම විශේෂත්වයක් වන්නේ යාපනය ප්‍රදේශය නියෝජනය කරමින් මේ වන තෙක් ජාතික කණ්ඩායමට එකම ක්‍රීඩකයකු හෝ බිහිව නොමැති බැවිනි. යාපනය ප්‍රදේශය නියෝජනය කරමින් ශ්‍රී ලංකාව නියෝජනය කරන ලද ආසන්නතම ක්‍රීඩකයා වන්නේ මෙම තරගාවලියේ විස්තර විචාරකයකු ලෙස කටයුතු කරන හිටපු තුන් ඉරියව් ක්‍රීඩක රසල් ආනල්ඩ් පමණි. ඔහු යාපනයේ ඉපිද ඇතත් ඔහු හැදී වැඩී ඇත්තේ කොළඹ, දෙහිවල ප්‍රදේශයේ බැවින් විජයකාන්ත්ගේ ආගමනය යාපනය ජනතාවට ආඩම්බරයකි. 

යාපනය මධ්‍ය මහ විදුහල නියෝජනය කරමින් ක්‍රිකට් ක්‍රීඩාවට අවතීර්ණ ව සිටින විජයකාන්ත් දකුණත් පා දඟ පන්දු යවන්නකු ලෙසින් කටයුතු කරන්නේය. ඉකුත් 2018 සහ 2019 වසර වලදී ශ්‍රී ලංකා වයස අවුරුදු 19 න් පහළ කණ්ඩායම නියෝජනය කිරීමට වරම් ලැබූ විජයකාන්තා ඔස්ට්‍රේලියා සහ ඉන්දියානු වයස අවුරුදු 19 න් පහළ කණ්ඩායම්වලට එරෙහිව පැවැති නිල නොවන ටෙස්ට් තරග 2 කට ක්‍රීඩා කර තිබේ. එම තරගව ලදී කඩුලු 2 ක් බිඳ හෙළීමට විජයකාන්ත් සමත්ව සිටියි.

විජයකාන්ත්ට අමතරව අද තරගය සඳහා ජැෆ්නා ස්ටැලියන්ස් පිල තවත් වෙනස් කම් 3 ක් සිදු කරමින් කලම්බු කිංග්ස් පිලට එරෙහි තරගයට අවතීර්ණ වී සිටියි. අවසන් තරගයට සහභාගි වුණු ටොම් මුවර්ස්, උස්මාන් ශින්වාරි, සුරංග ලක්මාල් සහ ඩුවෑන් ඔලිවර් විවේක ගන්වමින් ඒ සඳහා ජොන්සන් චාල්ස්, කයිල් ඇබොට් සහ බිනුර ප්‍රනාන්දුව අවසන් 11 දෙනාට එක් කර තිබේ. කලම්බු කිංග්ස් කණ්ඩායමද වෙනස් කම් 2 ක් සිදුකරමින් තරගයට අවතීර්ණ වී සිටින අතර එහිදි ජෙෆ්රි වැන්ඩර්සි සහ ධම්මික ප්‍රසාද් වෙනුවට ඩැනියෙල් බෙල් සහ තරිඳු කෞෂාල් කැඳවා තිබේ.

Related posts

සුළු අඩුපාඩු ශ්‍රී ලංකාවේ ජයග්‍රහණය වළකයි

Web Admin

බංග්ලාදේශ යොවුන් පිල 2-0 ක් ලෙස තරගාවලියේ ඉදිරියට එති

Web Admin

ආසියානු කුසලාන තරගාවලියේ සත්කාරකත්වය ශ්‍රී ලංකාවට

Web Admin