England Test Tour of Sri Lanka 2021 Featured Media Centre News

රමේෂ් මෙන්ඩිස්ට ටෙස්ට් වරම්

Chamila Karawita reporting from Galle

එංගලන්තයට එරෙහිව එරෙහිව පැවැත්වෙන තරග 2 කින් සමන්විත ටෙස්ට් ක්‍රිකට් තරගාවලිය යටතේ අද (22 දා) ගාල්ල ජාත්‍යන්තර ක්‍රීඩාංගණයේ පැවැත්වෙන දෙවැනි ටෙස්ට් තරගයේදී ශ්‍රී ලංකා කණ්ඩායම වෙනුවෙන් දකුණත් පිට දඟ පන්දු යවන තුන් ඉරියව් ක්‍රීඩක රමේෂ් මෙන්ඩිස් ටෙස්ට් වරම් දිනා ගැනීමට සමත්විය. පිට පිටම දෙවැනි වතාවටත් කාසියේ වාසිය දිනූ ශ්‍රී ලංකා නායක දිනේෂ් චන්දිමාල් ප්‍රථමයෙන් පන්දුවට පහර දීමට තීරණය කළේය.

කාසියේ වාසිය දිනා ගැනීමත් සමඟ ප්‍රථමයෙන් පන්දුවට පහර දීමට තීරණය කර ඇති ශ්‍රී ලංකා කණ්ඩායමට ක්‍රීඩා කරන ලද තුන් ඉරියව් ක්‍රීඩකයාගේ භූමිකාව රමේෂ්ට හිමිව තිබේ. අම්බලන්ගොඩ ධර්මාශෝක විදුහලින් ක්‍රිකට් ක්‍රීඩාවට ප්‍රවිශ්ඨව සිටින රමේෂ් කණ්ඩායමට පැමිණීමත් සමඟඑම ස්ථානයේ ක්‍රීඩා කළ වනිඳු හසරංගට කණ්ඩායමේ ස්ථානය අහිමිව තිබේ. කෙසේ වෙතත් ශ්‍රී ලංකාව වෙනුවෙන් ටෙස්ට් වරම් දිනා ගත් 154 වැනි ක්‍රීඩකයා බවට පත් වුණු රමේෂ් දේශීය ක්‍රීඩා සමාජ තරගාවලියේදී ත්‍රිත්ව ශතකයක් පවා වාර්තා කිරීමට සමත් වුණු පිතිකරුවෙකි.

පළමු පෙළ තරග 45 කට ක්‍රීඩා කර ඇති රමේෂ්ගේ ඉනිමක ලකුණු ලබා ගැනීමේ සාමාන්‍ය 43.46 ක් ලෙස සටහන් වේ. ශතක 5 ක් සහ අර්ධ ශතක 11 කට හිමිකම් කියන දකුණත් පිතිකරුවා, පන්දු යවමින් කඩුලු 83 ක් බිඳ හෙළීමට සමත්ව සිටියි. ඔහුගේ කඩුල්ලක් දවා ගැනීමේ සාමාන්‍ය 38.26 ක් වේ.

රමේෂ්ට අමතරව පළපුරුදු ඩිල්රුවන් පෙරේරා සහ ලසිත් ඇඹුල්දෙණියද දඟ පන්දුවෙන් කණ්ඩායම ශක්තිමත් කරති. ශ්‍රී ලංකා පිල මෙම තරගය සඳහා ප්‍රධාන පන්දු යවන්නන් සිව් දෙනෙකුගෙන් සමන්විතව ක්‍රීඩා කිරීමට තීරණය කළ ඇති බැවින් සුරංග ලක්මාල් සහ අසිත ප්‍රනාන්දු වේග පන්දු යවන්නන් ලෙසින් කණ්ඩායමට ක්‍රීඩා කරති.

පළමු තරගයට ක්‍රීඩා කළ කුසල් මෙන්ඩිස් දෙවැනි තරගය සඳහා නම් කරන ලද සංචිතයට ඇතුළත් නොවුණු අතර ඔහුට අමතරව පළමු තරගය ක්‍රීඩා කළ ක්‍රීඩකයින් අතුරින් දසුන් ශානක සහ වනිඳු හසරංගට සිය ස්ථානය අහිමිව තිබේ.

එංගලන්තය කණ්ඩායම එක් වෙනස්කමක් සිදුකරමින් අද තරගයට අවතීර්ණව සිටින අතර පළමු තරගයට ක්‍රීඩා කල ස්ටුවර්ට් බ්‍රෝඩ් වෙනුවට ජේම්ස් ඇන්ඩර්සන් කැඳවා තිබේ.

ශ්‍රී ලංකාව – 1. ළහිරු තිරිමාන්න, 2. කුසල් පෙරේරා, 3. ඕෂද ප්‍රනාන්දු, 4. ඇන්ජලෝ මැතිව්ස්, 5. දිනේෂ් චන්දිමාල් (නායක), 6. නිරෝෂන් දික්වැල්ල, 7. රමේෂ් මෙන්ඩිස්, 8. ඩිල්රුවන් පෙරේරා, 9. ලසිත් ඇඹුල්දෙණිය, 10. සුරංග ලක්මාල්, 11. අසිත ප්‍රනාන්දු

එංගලන්තය. – 1. ඩොම් සිබ්ලේ, 2. සැක් ක්‍රෝලි, 3. ජොනී බෙයාර්ස්ටෝ, 4. ජෝ රූට්, 5. ඩෑන් ලෝරන්ස්, 6. ජොස් බට්ලර්, 7. සෑම් කරන්, 9. ඩොම් බෙස්, 9. මාක් වුඩ්, 10. ජැක් ලීච්, 11. ජේම්ස් ඇන්ඩර්සන්.

Related posts

හඹා යෑමේ අභියෝගය ගැන දික්වැල්ල කතා කරයි

Web Admin

නවසීලන්ත ඉනිම් සංඛ්‍යා වැඩිපුරම බේරාගත් රොස් ටේලර්

Web Admin

පිතිකරණ පුහුණුකරුට කොවිඩ් අසාධනය වෙයි

Chamila Karawita