Sinhala Column

වේග පන්දුවෙන් දස්කම් දක්වන දුෂ්මන්ත චමීර

බන්දුල මොල්ලිගොඩ

බටහිර ඉන්දීය කොදෙව් දූපත්හි තරගකර ලත් අත්දැකීම් තමාට බංග්ලාදේශයේ ක්‍රීඩාකර දස්කම් දැක්වීමට බෙහෙවින් දායක වූ බව ශ්‍රී ලංකා – බංග්ලාදේශ තෙවන එක්දින තරගයේ හොදම ක්‍රීඩකයා සම්මානයෙන් පිදුම් ලද දුෂ්මන්ත චමීර ප්‍රකාශ කරයි.

දුෂ්මන්ත මේ තරගයේදී කඩුලු පහක් දවාලමින් තමාගේ පෞද්ගලික හොදම පන්දු යැවීම වාර්තා කළේ පන්දු ඕවර නවයක් යවා ලකුණු 16ක්පමණක් ලබාදෙමිනි.

මේ එක්දින තරගාවලියේ තරග තුනේදී දුෂ්මන්ත චමීර දවාගත් කඩුලු සංඛ්‍යාව නවයකි. එම තරග තුනේ ඔහුගේ දක්ෂතාවයන් වූයේ ප්‍රථම තරගයේදී (මැයි 23) ලකුණු 39කට කඩුල්ලක්ද දෙවන තරගයේදී (මැයි 25) ලකුණු 44කට කඩුලු තුනක්ද තෙවන තරගයේදී (මැයි 28) ලකුණු 16කට කඩුලු පහක්ද දවාලීමය. මෙහිදී තරගයෙන් තරගයට ඔහුගේ දක්ෂතා වැඩිවූ අතරම සෑම තරගයකදීම ප්‍රථම පන්දු වාරයේම කඩුල්ලක් දවාලීම විශේෂත්වයකි.

ප්‍රථම ඕවරයේදීම ඔහු අතින් දැවීගිය පිතිකරුවන් වූයේ ආරම්භක පිතිකරුවන් ලෙස පිටියට පිවිසි ලින්ටන් දාස් (ලකුණු 00යි පන්දු 03යි) ටමීම් ඉක්බාල් (ලකුණු 13යි පන්දු හයයි) සහ මොහොමඩ් නයිම්ය (ලකුණු 1යි පන්දු 2යි) වශයෙනි. ආබාධ මත මට මාස හතක්ම ක්‍රීඩා පිටියෙන් ඉවත් වීමට සිදුවූවා. නැවතත් මා ක්‍රීඩා කළේ කොදෙව් සංචාරයේදීයි. එහිදී නැවත දක්ෂතා අතරට පිවිසීමට ලැබීම සතුටට කරුණකයැයි දුෂ්මන්ත චමීර ප්‍රකාශ කරයි.

බංග්ලාදේශය සමග තරගාවලියේ ලංකා කණ්ඩායමේ ආරම්භක පන්දු යවන්නා සහ හොදම පන්දු යවන්නා ලෙස දක්ෂතා පෙන්වීමට ලැබීම සතුටට කරුණකැයි කී දුෂ්මන්ත චමීර ඉදිරි තරගාවලියන්හිදී රටට ගෞරවයක් අත්කර දීම තම අපේක්ෂාව බව ද සදහන් කරයි. තරග පහක් එකදිගට පැරැදී සිටි අපට මෙය ජය ගැනීමට ලැබීම සතුටකැයිද ඔහු පවසයි.

1992 ජනවාරි 11 වැනිදා රාගමදී උපත ලද දුෂ්මන්ත චමීර මීගමුව මාරිස්ටෙලා විදුහලේ ආදි සිසුවෙකි. ඔහු ශ්‍රී ලංකාව වෙනුවෙන් ටෙස්ට්, එක්දින සහ 20-20 තරගාවලියන් තුනේදීම දක්ෂතා දක්වා ඇති තුන් ඉරියව්වේම දස්කම් පාන ක්‍රීඩකයෙකි.

2012 එන්.සී.සී ක්‍රීඩා සමාජයට එක්වී අන්තර් සමාජ ක්‍රිකට් පිටියට පිවිසි මොහු මේ වන තෙක්ම එම කණ්ඩායම නියෝජනය කරයි. ක්‍රිකට් පාලක මණ්ඩල සභාපතිගේ කණ්ඩායම සංවර්ධන කණ්ඩායම ඇතුලු කණ්ඩායම් රැසකම ඔහු ආරම්භක පන්දු යවන්නා විය.

ටෙස්ට් තරග 11කට සහභාගිවී ඇති දුෂ්මන්ත කඩුලු 32ක් දවා ඇත. ඉනිමක හොදම පන්දු යැවීම ලකුණු 47කට කඩුලු පහක්ද තරගයක හොදම පන්දු යැවීඹ ලකුණු 115කට කඩුලු 9ක්ද වේ. එක්දින තරග 28කදී කඩුලු 30ක් දවා ඇති අතර හොදම පන්දු යැවීම ලකුණු 16කට කඩුලු පහකි. 20-20 තරග 22කදී කඩුලු 20ක් දවා ඇත.

Related posts

බාලක 19න් පහළ II කොටසේ “බී” කාණ්ඩ සූරතාව පානදුර සුමංගලට

Web Admin

“වාසනාව තිබුණා නම් මීට වඩා ඉදිරියට යන්න තිබුණා” – කසුන් රාජිත

Web Admin

අපි සාග් යන්නේ රන් පදක්කම අපේක්ෂාවෙන් – ප්‍රධාන පුහුණුකරු ලංකා ද සිල්වා කියයි

Web Admin