Sinhala Column Womens Cricket

කාන්තා ලෝක කුසලානට ශ්‍රී ලංකා කණ්ඩායම කඳවුරු බඳිති

නවසීලන්තයේ පැවැත්වීමට නියමිත මීළඟ එක්දින කාන්තා ලෝක කුසලාන ක්‍රිකට් තරගාවලියට සහභාගි වන ශ්‍රී ලංකා කණ්ඩායම තෝරා ගැනීම සදහා ක්‍රීඩිකාවන් 40 කුගෙන් සමන්විත සංචිතයක් මේ දිනවල සිය නිවෙස්වල සිට ශාරීරික සුවතා ව්‍යායාම් වල නිරතව සිටින අතර ඔවුනගේ දක්ෂතා (Skills) පුහුණුව ජුනි 8 වැනිදායින් පසු ආරම්භ කිරීමට නියමිතය.

මීළග කාන්තා ලෝක කුසලාන ක්‍රිකට් තරගාවලිය ලබන වසරේ මාර්තු 03 සිට අප්‍රේල් 04 දක්වා මාසයක කාලයක් තුළ නවසීලන්තයේ දී පැවැත්වීමට නියමිතය. මේ සදහා කණ්ඩායම් පහක් දැනටමත් සුදුසුකම් ලබා සිටින අතර ඉතිරි කණ්ඩායම් තුන තෝරා ගනු ලබන්නේ ලබන දෙසැම්බරයේ ශ්‍රී ලංකාවේදී පැවැත්වෙන ලෝක කුසලාන සුදුසුකම් ලැබීමේ තරගාවලියකට පසුවය.

ලෝක කුසලානයට සුදුසුකම් ලැබීමේ තරගාවලිය මෙම ජුනි මස ශ්‍රී ලංකාවේ පැවැත්වීමට නියමිතව තිබුණත් කොවිඩ් – 19 වසංගත තත්ත්වය උග්‍ර අතට හැරීම මත තරගාවලිය දෙසැම්බර් දක්වා කල්දැමීමට පියවර ගැනිණ. දොළොස් වැනි වරට පැවැත්වෙන කාන්තා ලෝක කුසලාන තරගාවලිය මේ වසරේ (2021) පෙබරවාරි 6 වැනිදා සිට මාර්තු 7වැනිදා දක්වා නවසීලන්තයේ පැවැත්වීමට නියමිතව තිබුණත් කොවිඩ් – 19 ආසාධනය මත එය කල්දැමිණි.

ලෝක කුසලාන තරගාවලියට සත්කාරක රට ලෙස නවසීලන්තය නිතරගයෙන්ම ඊට සුදුසුකම් ලබා සිටී. මේ වන විට මීට සුදුසුකම් ලබා සිටින සෙසු රටවල් වනුයේ එංගලන්තය, ඕස්ට්‍රේලියාව, දකුණු අප්‍රිකාව සහ ඉන්දියාවය. තරගාවලියට සුදුසුකම් ලබා ගන්නා සෙසු කණ්ඩායම් තුන තෝරා ගැනීමට දෙසැම්බරයේ ශ්‍රී ලංකාවේ පැවැත්වෙන තරගාවලියට සත්කාරක ශ්‍රී ලංකාවට අමතරව බටහිර ඉන්දීය කොදෙව් දූපත්, පාකිස්තානය සහ බංග්ලාදේශය ඇතුළු කණ්ඩායම් දහයක් තරග කිරීමට නියමිතය.

ක්‍රයිස්චර්ච්, ඕක්ලන්ඩ් සහ හැමිල්ටන් යන නගරයන්හිදී තරග 31ක් 12 වන කාන්තා ලෝක කුසලාන තරගාවලියට අයත් වන අතර පරාජිතයන් පිට දැකීමේ ක්‍රමයට තරගාවලිය පැවැත්වෙනු ඇත. ශ්‍රී ලංකා කණ්ඩායම තේරීම සඳහා පිහිටුවා ඇති 40 දෙනෙකුගෙන් සමන්විත සංචිතයේ ක්‍රීඩිකාවන්ගේ පුහුණුවීම් කාන්තා ක්‍රීඩිකාවන් වෙනුවෙන් වනාතමුල්ල සරවනමුත්තු ක්‍රීඩාංගණයේ ස්ථාපනය කර ඇති කාන්තා ක්‍රිකට් අධි කාර්යය සාධන මධ්‍යස්ථානයේදී පැවැත්වෙනු ඇත. 

බන්දුල මොල්ලිගොඩ

Related posts

ශ්‍රී ලංකාව 20-20 හත්වන ස්ථානයට ශ්‍රේණිගතවේ

Web Admin

තරගාවලියේ අඩක් නිමවද්දී ජැෆ්නා ස්ටැලියන්ස් අපරාජිතව පෙරමුණේ

Web Admin

කමිදු මෙන්ඩිස් 169යි: ‘ඒ’ තරගය ජයපරාජ නෑ

Web Admin