Featured India tour of Sri Lanka 2021 Media Centre News

වනිඳු නැති තෙවැනි තරගයේදී ඉන්දියාව පළමුව පන්දුවට පහර දෙයි

තරග 3 කින් සමන්විත එක්දින ක්‍රිකට් තරගාවලියේ තෙවැනි සහ අවසන් එක්දින තරගයේ කාසියේ වාසිය දිනූ ඉන්දීය කණ්ඩායමේ නායක ශිකර් ධවාන් කොළඹ ආර්. ප්‍රේමදාස තණතීරුවේදී ප්‍රථමයෙන් පන්දුවට පහර දීමට තීරණය කළේය. හදිසි ආබාධිත තත්ත්වයක් හේතුවෙන් ශ්‍රී ලංකා කණ්ඩායම අද තරගයට අවතීර්ණ වන්නේ හොඳම දඟ පන්දු යවන්නා වන වනිඳු හසරංගගේ සහභාගිත්වයෙන් තොරවය.

කාසියේ වාසිය දිනා ගැනීමත් සමඟ අදහස් දක්වා සිටි ඉන්දීය නායකයා තෙතමනය රහිත වුණු ආර්. ප්‍රේමදාස තණතිරුව පිතිකරුවන්ට යෝග්‍ය බැවින් තමන් පන්දුවට පහර දීමට තීරණය කළ බව සඳහන් කළ සිටියේය. ඒ අනුව ඉන්දීය කණ්ඩායම මෙම තරගයේදී වෙනස් කම් 6 ක් සිදු කරමින් අවතීර්ණ වන බවද සඳහන් කළ සිටි ධවාන් ඉන් 5 දෙනෙකුම අද දිනයේදී මංගල එක්දින වරම් ලබන ක්‍රීඩකයින් බවද සඳහන් කර සිටියේය.

නිතිෂ් රානා, රාහුල් චහර්, චේටන් සකරියා, කේ. ගෞතම් සහ සංජු සැම්සන් අද දිනයේදී එක්දින වරම් ලබන ක්‍රීඩකයින් වන අතර අනෙක් ක්‍රීඩකයා වන්නේ නව්දීප් සයිනිය. ශ්‍රී ලංකා කණ්ඩායම වෙනස් කම් 3 ක් සිදු කරමින් අවතීර්ණ වන අතර ආබාධිත වනිඳුගේ ස්ථානය තුන් ඉරියව් ක්‍රීඩක රමේෂ් මෙන්ඩිස්ට හිමිව තිබේ. දෙවැනි තරගයේදී දැඩි ප්‍රහාරයකට ලක් වුණු ලක්ෂාන් සඳකැන් වෙනුවට අකිල ධනංජය ද වේග පන්දු යවන කසුන් රජිත වෙනුවට වමත් දඟ පන්දු යවන ප්‍රවීන් ජයවික්‍රමද කැටුව ශ්‍රී ලංකා පිල අද තරගයට අවතීර්ණව සිටියි.

මෙම තරගය ඉතිරිව තිබියදීම 2-0 ක් ලෙස තරගාවලිය ජය ගැනීමට ඉන්දියාව සමත්ව සිටින නමුත් ලෝක කුසලාන ක්‍රිකට් තරගාවලිය සඳහා සුදුසුකම් ලැබීම සඳහා වන ප්‍රසාද ලකුණු එක්කාසු කර ගැනීම වෙනුවෙන් අද තරගයේ ජයග්‍රහණය වුවද ශ්‍රී ලංකාවට ඉතා වැදගත් වනු ඇත.

සුපර් ලීග් ක්‍රිකට් තරගාවලිය යටතේ ශ්‍රී ලංකාව සහභාගිවන සිව්වැනි තරගාවලිය වන මෙම තරගාවලිය වන විටත් ශ්‍රී ලංකා කණ්ඩායම එක් ජයග්‍රහණයක් පමණක් වාර්තා කර ගනිමින් එම ප්‍රසාද ලකුණු සටහනේ 12 වැනි ස්ථානයේ රැඳී සිටියි. දෙවැනි තරගය වන විට ශ්‍රී ලංකාව ප්‍රසාද ලකුණු 12 ක් ලබා සිටි නමුත් එම තරගයේදී එක් පන්දුවාරයක් ප්‍රමාදව යැවීමට වරද පිළිගැනීම හේතුවෙන් අයි.සී.සී. ලෝක කුසලාන සුපර් ලීගයේ කොන්දේසිවලට අනුව ශ්‍රී ලංකා කණ්ඩායමේ ප්‍රසාද ලකුණක්ද අඩුවිය. ඒ අනුව මේ වන විට ශ්‍රී ලංකාවේ ප්‍රසාද ලකුණු සංඛ්‍යාව 11 දක්වා පහත බැස තිබේ.

ශ්‍රී ලංකාව – 1. අවිෂ්ක ප්‍රනාන්දු, 2. මිනෝද් භානුක,3. භානුක රාජපක්ෂ, 4. ධනංජය ද සිල්වා, 5. චරිත් අසලංක, 6. දසුන් ශානක (නායක), 7. චාමික කරුණාරත්න, 8. රමේෂ් මෙන්ඩිස්, 9. අකිල ධනංජය, 10. දුෂ්මන්ත චමීර, 11. ප්‍රවීන් ජයවික්‍රම

ඉන්දියාව – 1. ශිකර් ධවාන් (නායක), 2. ප්‍රිතිව් ෂෝ, 3. සංජු සැම්සන්, 4. මනීෂ් පාන්ඩේ, 5. සූර්යකුමාර් යාදව්, 6. හර්දික් පාණ්ඩ්‍යා, 7. නිතීස් රානා, 8. ක්‍රිෂ්නප්පා ගෞතම්, 9. රාහුල් චහර්, 10. නව්දීප් සයිනි, 11. චේතන් සකරියා.

Related posts

දෙවැනි LPL තරගාවලියේ තරග සුප්‍රීම් නාළිකාව ඔස්සේ

Chamila Karawita

පාකිස්තානු සංචාරය සඳහා කණ්ඩායම් නම් කෙරෙයි

Web Admin

U19 ASIA CUP: Sri Lanka beat Pakistan by 22 runs to set up final Vs India tomorrow

Web Admin