Featured Media Centre News Under 19

යොවුන් පිලෙන් ලකුණු 229 ක අභියෝගයක්

යොවුන් එක්දින වරම් දිනූ පළමු තරගයේදීම අර්ධ ශතකයක් වාර්තා කර ගනිමින් අමතක නොවන ආරම්භයක් සනිටුහන් කරගත් පවන් පතිරාජගේ ලකුණු 67 ක ඉනිම ප්‍රධාන කොට සිව්වැනි සහ පස්වැනි කඩුලු අතර ගොඩනැංවුණු අර්ධ ශතක සම්බන්ධතා හේතුවෙන් බංග්ලාදේශයට එරෙහිව අද (ඔක්තෝබර් 15) රංගිරි දඹුලු අන්තර්ජාතික ක්‍රීඩාංගණයේ ඇරැඹි පළමු එක්දින තරගයේදී ලකුණු 229 ක ඉලක්කයක් ලබා දීමට ශ්‍රී ලංකා කණ්ඩායම සමත්විය.

ලෝක කුසලාන තරගාවලියට පෙර සූදානමක් ලෙසින් තරග 5 කින් සමන්විත මෙම තරගාවලියේ පළමු තරගයේදී මුල් කඩුලු 3 ම ලකුණු 32 කදී දවා ගැනීමට බංග්ලාදේශ පන්දු යවන්නන් සමත්වද්දී ශ්‍රී ලංකාවට සැනසිල්ලක් ගෙන ආ පතිරාජ ලකුණු ශ්‍රී ලංකා ඉනිමේ ගැලවුම් කරුවා බවට පත්විය. දැඩි පීඩනකාරී තත්ත්වයක් යටතේ පන්දුවට පහර දීමට පැමිණි ශරීරයෙන් කුඩා වමත් පිතිකරුවා 6 වැනි කඩුල්ල වෙනුවෙන් දැවී යනවිට ලබා ගත් ලකුණු 67 සඳහා පන්දු 88 ක් වැය කර තිබුණේය.

හතරේ පහර 5 කින් ඉනිම වර්ණවත් කරගත් මහනුවර ත්‍රිත්ව විදුහල නියෝජනය කරමින් පැමිණ සිටින පතිරාජ, සදීෂ රාජපක්ෂ සමඟ සිව්වැනි කඩුල්ල වෙනුවෙන් ලකුණු 53 ක්ද පස්වැනි කඩුල්ල වෙනුවෙන් උප නායක රවීන්ද සිල්වා සමඟ ලකුණු 80 ක්ද ගොඩනංවමින් ශ්‍රී ලංකාව අසීරුතාවෙන් මුදවා ගත්හ. පීඩනය අතරින් තමන්ගෙන් ඉටුවිය යුතු වගකීම කුමක්ද යන්න හරි හැටි වටහා ගනිමින් පන්දුවට පහර දුන් රවීන් ලකුණු 29 ක් ලබා ගත්තේ පතිරාජට පසු ඉනිමේ වැඩිම ලකුණු ලාභියා බවට පත් වෙමිනි.

ආරම්භයේ සිටම ඉතාම නිවැරදි ඉලක්කට පන්දු යැවී බංග්ලාදේශ පන්දු යවන්නන්ට එරෙහිව පිති මුවහත් කළ ශ්‍රී ලංකා පිතිකරුවන් අතර සදීෂ රාජපක්ෂට පසු අංක 10 පිතිකරණ ස්ථානයෙන් පැමිණි ඉසුරු රොඳ්‍රගෝ කැපී පෙනුණ. ඉනිමේ වැඩිම ප්‍රහාරාත්මක වේගයකට හිමිකම් කියූ (166.66)  ගල්කිස්ස ශාන්ත තෝමස් විදුහල නියෝජනය කරනු ලබන යසිරු පන්දු 15 කදී හයේ පහරක් සහ හතරේ පහර 3 ක් සමඟින් නොදැවී ලකුණු 25 ක් ලබා ගත්තේය. පන්දු යැවීමේදී රිපොන් මොන්ඩොල් ලකුණු 59 කට කඩුලු 3 ක් සහ අශිකුර් සමාන් ලකුණු 43 කට කඩුලු 2 ක් දවා ගනිමින් කැපී පෙනුණි.

Related posts

පන්දු රැකීමෙන් වැළකුණු චන්දිමාල් අවධානමෙන් මිදෙයි

Web Admin

තරුණ ජවය අපි ඉදිරියේ ජාතික කණ්ඩායමට දෙනවා – 19න් පහළ කළමණාකරු ෆර්විස් මහ්රුෆ්

Web Admin

ශ්‍රී ලංකාව ඉනිම අත්හිටුවීම නිසා අරවින්දගේ වාර්තාව ධනංජයට නූලෙන් මිස්වෙයි

Web Admin