Sinhala Column

සමාරම්භක තරගයෙන් ඕමානයට කඩුලු දහයක ජය

ආරම්භක පිතිකරුවන් දෙදෙනා වන ජටින්දර් සිං සහ අකිබ් ඉලියාස් එක්ව පළමු කඩුල්ල වෙනුවෙන් පවත්වන ලද ලකුණු 131 ක සම්බන්ධතාව හේතුවෙන් විස්සයි-20 ලෝක කුසලාන ක්‍රිකට් තරගාවලියේ සමාරම්භක තරගයේදීම කඩුලු 10 ක පහසු ජයක් වාර්තා කිරීමට සත්කාරක ඕමාන් පිල සමත්විය. 

ඕමානයේ මස්කට් නුවර අල් අමෙරට් ක්‍රීඩාංගණයේ පැවැති මේ තරගයේදී පැපුවා නිව්ගිනිවා කණ්ඩායම පන්දු වාර 20කදී කඩුලු නවයකට ලබාගත් ලකුණු 129ට පිළිතුරු ලෙස ඕමානය පන්දු වාර 13.4කදී කිසිවෙකු නොදැවී ලබාගත් ලකුණු සංඛ්‍යාව 131කි.

ආරම්භක පිතිකරුවන් දෙදෙනා වන ජටින්දර් සිං පන්දු 42කදී හතරේ පහර හතක් හයේ පහර හතරක් සමඟ නොදැවී ලකුණු 73ක්ද අකිබ් ඉලියාස් පන්දු 43කදී හතරේ පහර පහක් සහ හයේ පහරක් සමඟ නොදැවී ලකුණු 50ක්ද ලබා ඕමානයට මේ පහසු ජයග්‍රහණයට අවස්ථාව උදාකළේ පළමු කඩුල්ලට ලකුණු 131ක් රැස්කරමිනි.

පැපුවා නිව්ගිනිවා කණ්ඩායමේ කිසිඳු පන්දු යවන්නෙකුට තර්ජනාත්මක ලෙස ඕමාන පිතිකරුවන් දෙදෙනා වෙත පන්දු යැවීමට අවස්ථාව උදානොවීය. මේ තරගයේ කාසියේ වාසිය හිමිකරගත් ඕමානය තීරණය කළේ මුලින් පන්දුවට පහරදීම පැපුවා කණ්ඩායමට පැවරීමටය.

පැපුවා නිව්ගිනිවා කණ්ඩායමේ ආරම්භක පිතිකරුවන් දෙදෙනා ටෝනි උරා (00) තරගයේ ප්‍රථම පන්දු වාරයේත් ලෙගා සියාකා (00) දෙවන පන්දු වාර්යෙත් දැවීයාමෙන් එම කණ්ඩායමේ ප්‍රථම කඩුලු දෙක දැවීගියේ කිසිදු ලකුණක් ලබා නොසිටියදීය.

පැපුවා කණ්ඩායමේ නායක අසාඩ් වාලා (ලකුණු 56යි පන්දු 43යි හතරේ හතරයි හයේ තුනයි) සහ චාල්ස් අමිනි (ලකුණු 37යි පන්දු 26යි හතරේ හතරයි හයේ එකයි) තෙවන කඩුල්ලට ලකුණු 81ක් රැස් කිරීමෙන් (පන්දු වාර දහයකදී) එම කණ්ඩායමට මඳක් සාර්ථක වීමට අවස්ථාව උදාවිණි. මොවුන් දෙදෙනා දැවී යාමෙන් පසු අවසාන කඩුලු හතම දැවීගියේ ලකුණු 27ක් පමණක් එක්වද්දීය. ඕමාන නායක සීසාන් මක්ෂුඩ් කඩුලු හතරක්ම දවාලූවේ ලකුණු 20ක් පමණක් ලබාදෙමිනි. මක්ෂුඩ් තරගයේ වීරයා ලෙසද නම්කෙරිණි.

ලකුණු සාරාංශය –  පැපුවා නිව්ගිනිවා පන්දු වාර 20කදී කඩුලු 9ක් දැවී 129යි – (අසාඩ් වාලා 56, චාල්ස් අමිනි 37, සෙසේ බාවු 13, සීසාන් මක්ෂුඩ් 20/4යි, බිලාල් ඛාන් 16/2, කලී මුල්ලා 19/2)

ඕමානය පන්දු වාර 13.4කදී කිසිවෙකු නොදැවී 131යි (ජටින්දර් සිං නොදැවී 73, අකිබ් ඉලියාස් නොදැවී 50)

Related posts

19න් පහළ පිල දඹුල්ලේ පුහුණු තරගවල – 9වැනිදා දකුණු අප්‍රිකාව බලා පිටත්වෙති

Web Admin

ඩුබායි 10-10 අවසාන තරගයේ සූරතාව ලසිත්, කසුන් හා දසුන් ක්‍රීඩා කළ මරතා ඇරබියන්ස් කණ්ඩායමට

Web Admin

විශිෂ්ඨ ක්‍රිකට් පරිපාලක එම්.රාජසිංහම් ජීවන ඉනිමට සමුදෙයි

Web Admin