Featured Media Centre News West Indies Test tour of Sri Lanka 2021

අයහපත් කාලගුණය තෙවැනි දිනට බාධා කරයි

Chamila Karawita reporting from Galle

අයහපත් කාලගුණය තෙවැනි දිනට හරස්වීම නිසා තේ පානය වේලාසනින් හෙවත් ප.ව. 2.20 වන විටම ලබා ගැනීමට විනිසුරුවන් තීරණය කර තිබේ. දිවා ආහාරයෙන් මිනිත්තු 25 කට පමණ පසු තරගයට වර්ෂාව ඇද හැළීම නිසා දිනය අවසන් වීමට මත්තෙන් යැවීමට තවත් පන්දුවාර 52 ක් ඉතිරිව තිබේ. කෙසේ වෙතත් හෝරා දෙකකට වැඩි කාලයක් තරගය ආරම්භ කිරීමට නොහැකිවීම නිසා තෙවැනි දිනයේදී සැලකිය යුතු පන්දුවාර සංඛ්‍යාවක් අහිමිවනු ඇත.

මේ වන විට වර්ෂාව නැවතී ඇතත් ක්‍රීඩාංගණය අවට මන්දාරම් අහස් කුසකි. තරගය කොයි මොහොතේ ආරම්භ කෙරෙනු ඇත්දැයි දිමුත් කරුණාරත්න ප්‍රමුඛ ශ්‍රී ලංකා ක්‍රීඩකයෝ ක්‍රීඩා ගාරයට වී අහස දෙස බලා සිටිති. පිටිය භාර සිව්වැනි විනිසුරුත්, තණතීරුව පිළිබඳ වගකීමැති තණතීරු සකසන්නන් දෙදෙනාත් පිටිය මැද රැඳී සිටිති. ක්‍රීඩාංගණයේ කටයුතු වලට යොදවා සිටින සේවක පිරිස වැසි ආවරණ සමඟ කාර්ය බහුලය.

ඒ අතරතුර කාලයේදී ප්‍රධාන විනිසුරුවන් දෙදෙනාද ක්‍රීඩාංගණයට පැමිණ තත්ත්වය පරීක්ෂා කළද තරගය ආරම්භ කිරීමේ හැකියාව පිළිබඳව තක්සේරුවක් ලබා දීමට අයහපත් අහස් කුස ඊට ඉඩ නොතැබීය. ප.ව. 4.00 වන විට මුළු ක්‍රීඩාංගණයම වැසි ආවරණ වලින් වසා තැබීමට සේවක පිරිස කටයුතු යොදා තිබේ.

අවසන් කඩුලු 4 ඉක්මනින් දවා ගනිමින් පළමු ඉනිමේ වැඩි වාසියක් ලබා ගැනීමට සැලසුම් කර තිබුණද ඊට වඩා හොඳින් තරගයට අවතීර්ණ වූ සද්දන්ත සිරුරැත් රැකීම් කෝන්වෝල් ප්‍රමුඛ බටහිර ඉන්දීය කොදෙව් පසු පෙළ පිතිකරුවෝ සත්කාරකයින්ගේ බලාපොරොත්තු සුන් කළහ. කඩුලු රකින්නා වන ජොෂුවා දා සිල්වා සමඟ එක්වූ කෝන්වෝල් 8 වැනි කඩුල්ල වෙනුවෙන් ලකුණු 49 ක සම්බන්ධතාවක් තබමින් මුලු ලකුණු සංඛ්‍යාව 200 ඔබ්බට රැගෙන ගියහ.

සුරංග ලක්මාල් යැවූ 80 වැනි පන්දුවාරයේ අවසන් පන්දුවේදී කෝන් වෝල්ගේ ඉනිම ලකුණු 39 කදී හමාර වුවත් තරගයද නවතා දැමීමට සිදුවූයේ වර්ෂාවෙන් බාධා ඇතිවීම නිසාය. එම අවස්ථාවේ සංචාරකයින්ගේ ලකුණු පුවරුව කඩුලු 9 කට ලකුණු 224 ක් ලෙසින් සටහන්ව තිබුණත් සත්කාරකයෝ ලකුණු 162 පරතරයකින් පෙරමුණ ගෙන සිටිති. වර්ෂාව හේතුවෙන් තරගය අතර මඟ නවතා දමන විට තෙවැනි දිනට තවත් පන්දුවාර 52 ක් යවා අවසන් කළ යුතු වේ.

කෝන්වෝල් පිටියට පැමිණීමට පෙර හත්වැනි කඩුල්ලට එක් වූ ජේසන් හෝල්ඩර් සහ කයිල් මේයර්ස් ලකුණු 63 ක සම්බන්ධතාවක් ගොඩ නංවමින් පිට පිටම දෙවැනි වතාවටත් පන්දුවට පහරදීමේ අවධානමෙන් සිය කණ්ඩායම මුදවා ගැනීමේ මූලික මෙහෙයුම සිදුකළහ.

දිමුත් කරුණාරත්නගේ විශිෂ්ඨ උඩ පන්දු රැකීම නිසා එම සම්බන්ධතාවය බිඳ වැටිණ. දිනයේ බිඳ වැටුණු පළමු කඩුල්ල වූයේ ලකුණු 45 ක් ලබා සිටි කයිල් මේයර්ය. එම කඩුල්ල කඩුල්ල දවා ගැනීම වෙනුවෙන් සිය නුහුරු අතට පනිමින් ශ්‍රී ලංකා නායකයා රැක ගත් උඩ පන්දුව අග්‍රගන්‍යයේ විය. දිනෙන් දින දියුණුවෙන් දියුණුව කරා යමින් සිටින ශ්‍රී ලංකා කණ්ඩායමේ ක්‍රීඩකයින් තුළ වූ උනන්දුව, ඒ හරහා ලබා සිටින වර්ධනය කෙතරම්ද යන්න එම උඩ පන්දු රැකීමෙන් මොනවට පිළිබිඹු විය.

තෙවැනි දිනයේදී ශ්‍රී ලංකා පිලෙන් කැපී පෙනුණු පළමුවැනි අවස්ථාව ලෙස එම උඩ පන්දු රැකීම සටහන්විය. ඊට පසු කැපී පෙනුණේ ජේසන් හෝල්ඩර් දවා ගැනීම වෙනුවෙන් දුෂ්මන්ත චමීර ගුවනට පැණ රැක ගත් උඩ පන්දුව විය. දඟ පන්දු යවන්නන්ගේ අමතර ඉපිලීමකින් යුතු පන්දු හමුවේ මෙම කඩුලු 2 දැවී යෑමද කැපී පෙනිණ.

දැවී ගිය කඩුලු 2 ම අනපේක්ෂිත ඉපිලීමකින් යුතු පන්දු හමුවේ දැවී ගියා විනා වැටී තිබුණු තැනින් නැගී සිටීම එකම අරමුණ බවට පත්වී තිබුණු කොදෙව් පසු පෙළ පිතිකරුවන් එකම දුර්වල පහරක් එල්ල නොකිරීමට වග බලා ගත්හ.

කඩුලු අතර දිව යෑමට මැළිතාවයක් දැක්වන කෝන්වෝල්ගේ ඉනිම ප්‍රහාරාත්මක එකකි. ලකුණු 39 සඳහා  පන්දු 58 ක් වැය කළ කෝන්වෝල් හතරේ පහර 5 ක් සහ හයේ පහරකින් සිය ඉනිම පුරවා ගත්තේය. දඟ පන්දු යවන්නන් හමුවේ ප්‍රහාරාත්මක පිතිහරඹයක් පවත්වාගෙන ඒම නිසා කෝන්වෝල්ව නවතා ලීම අරමුණු කොට පරණ පන්දුවෙන් පන්දු යැවීම සඳහා ශ්‍රී ලංකා නායකයා වේග පන්දු යවන්නන් කැඳෙව්වේය. එහිදී සාර්ථක වුණු සුරංග ලක්මාල් කෝන්වෝල් දවා ගත්තේය. 

දෙවැනි දිනට සාපේක්ෂව තරමක වේගයෙන් පන්දුවට පහර දුන් හෝල්ඩර් සහ මේයර්ස් දුර්වල පන්දු හමුවේ පහර එල්ල කිරීමට නොපැකිළිණ. තියුණු ලෙසින් දඟ කැවෙන තණතීරුවේදී වඩාත් උපායශීලී වූ ජේසන්-මේයර් යුගල පහර එල්ල කිරීමේදී දඟ කැවීමට පෙර හෝ පන්දුවේ දඟ කැවීම අවසන් අවස්ථාව වන තෙක් සිට පහර එල්ල කළහ. ශ්‍රී ලංකා ක්‍රීඩකයින්ට හිස රදයක් බවට පත්ව සිටින ජොෂුවා දා සිල්වා පන්දු 70 කට මුහුණ දෙමින් ලකුණු 11 ක් ලබා කඩුල්ලේ රැඳී සිටියි.

Related posts

හලාවත මේරියන්ස්-සී.සී.සී. විස්සයි-20 අවසන් සටනට

Web Admin

එස්.එස්.සී. – යුද හමුදාව විස්සයි-20 අවසන් සටනට

Chamila Karawita

දසුන්ගේ පිල අපරාජිතව ඉදිරියට ඇදෙයි

Chamila Karawita