Featured Media Centre News T-20 World Cup - UAE

වනිදු අංක 1 ට එයි

අන්තර්ජාතික ක්‍රිකට් ශ්‍රේණිගත කිරීම යටතේ විස්සයි-20 තරග අංශයේ ලොව හොඳම පන්දු යවන්නන් අතර අංක එකේ ස්ථානයට පැමිණීමට ශ්‍රී ලංකාවේ දඟ පන්දු යවන ක්‍රීඩක වනිඳු හසරංග සමත්ව සිටියි. ගෙවී ගිය මාස කීපයේදී දකුණු අප්‍රිකානු පිලේ ටබ්‍රේස් ශම්සි සමඟ කරට කර සටනක සිටි වනිඳු මෙවර ලෝක කුසලාන ක්‍රිකට් තරගාවලියේ වැඩිම කඩුලු ලාභියා බවට පත්වීමට සමත්වීමත් සමඟ ශම්සිව දෙවැනි තැනට ඇද දමමින් අංක 1 ස්ථානයට පැමිණීමට සමත්විය.

අන්තර්ජාතික ක්‍රිකට් කවුන්සිලයේ නවතම යාවත්කාලීනයට අනුව ප්‍රසාද ලකුණු 776 ක් ලබා වනිඳු අංක 1 ස්ථානයට පැමිණ සිටියි. දකුණු අප්‍රිකානු පිලේ ටබ්‍රේස් ශම්සි ප්‍රසාද ලකුණු 770 ක් ලබා දෙවැනි ස්ථානයේදී එංගලන්ත පිලේ අදෙල් රශීඩ් ප්‍රසාද ලකුණු 730 ක් ලබා තෙවැනි ස්ථානයේද පසුවෙති.

එංගලන්තයට එරෙහිව පැවැති තරගයේදී ලකුණු 22 කට කඩුලු 3 ක් දවා ගත් වනිඳු වසරක් ඇතුළත වැඩිම කඩුලු සංඛ්‍යාවක් දවාගත් පන්දු යවන්නාගේ ලෝක වාර්තාවටද ඉකුත්දා හිමිකම් කීවේය. දකුණු අප්‍රිකානු පිලට එරෙහිව පැවැති තරගයේදී ලද කඩුලු ත්‍රිත්වයද සමඟ මේ වසර ඇතුළතදී තරග 19 කට ක්‍රීඩා කර ඇති දකුණත් පා දඟ පන්දු යවන්නා බිඳ හෙළා ඇති කඩුලු සංඛ්‍යාව 34 කි. ඔහු පසු කරන ලද්දේ මෙම වසරේදී විස්සයි-20 තරග 20 කදී කඩුලු 32 ක් බිඳ හෙළීමට සමත්ව සිටි දකුණු අප්‍රිකානු පිලේ ටබ්‍රේස් ශම්සිව වේ.

විසි හතර හැවිරිදි වනිඳු ගාල්ල රිච්මන්ඩ් විදුහලින් ජාතික කණ්ඩායමට පැමිණීමට සමත්වී ඇති ක්‍රීඩකයෙකි. එංගලන්ත කණ්ඩායමට එරෙහිව පැවැති තරගයේදී විස්සයි-20 තරග අංශයේ කඩුලු 50 සීමාවද පසුකර යෑමට වනිඳු සමත්විය. කොළඹ සී.සී.සී. ක්‍රීඩා සමාජය නියෝජනය කරන වනිඳුට පෙර මෙම ශ්‍රේණිගත කිරීමේ පළමු ස්ථානයට පැමිණ සිටින අනෙක් ශ්‍රී ලාංකික පන්දු යවන්නා වන්නේ අජන්ත මෙන්ඩිස්ය. ඒ අනුව ශ්‍රී ලාංකික පන්දු යවන්නන් අතරින් දෙවැනියට අංක 1 ස්ථානයට පැමිණි වනිඳු විස්සයි-20 ජාත්‍යන්තර තරග 32 කට සහභාගිවෙමින් කඩුලු 50 ක් දවාගෙන තිබෙන්නේ කඩුල්ලක් දවා ගැනීමේ සාමාන්‍ය 13.88 ක් රඳවා තබා ගනිමිනි. පන්දුවාරයකට ලකුණු 6.27 ක දළවේගයක් රඳවා ගැනීමට සමත්ව සිටින වනිඳුගේ හොඳම පන්දු යැවීම ලෙසින් සටහන් වන්නේ ඉන්දියාවට එරෙහිව මේ වසරේදී කොළඹදී පැවැති තරගයේදී ලකුණු 09 ක් ඇතුළත දවා ගන්නා ලද කඩුලු 4 වේ.

Related posts

Annual Sri Lanka Cricket Awards 2019 – Award Winners List

Web Admin

Kandy on course to trophy glitter – Dismiss Jaffna for 227 – lead by 169 with 9 second innings wkts intact

Web Admin

ප්‍රධානතම විස්සයි-20 ආරම්භක දිනයේදී කුරුණෑගල තරුණයින්ගෙන් පෙරැළිකාර ජයක්

Chamila Karawita