A Team Media Centre News

ශ්‍රී ලංකා ‘ඒ’ පිතිකරුවෝ සටන්කාමී පිතිහරඹයක

ඉනිමක පරාජයෙන් බේරීමේ සටනේදී නායක සදීර සමරවික්‍රමරගේ වික්‍රමාන්විත පිති හරඹයත් කමිල් මිශාරගේ ධෛර්යවන්ත ඉනිමත් හේතුවෙන් පාකිස්තානු ‘ඒ’ පිලට එරෙහිව පල්ලකැලේ ජාත්‍යන්තර පිටියේදී අද (07 දා) නිමාවට පත් දෙවැනි සිව්දින ටෙස්ට් තරගය ජය පරාජයෙන් තොරව අවසන් කර ගැනීමට ශ්‍රී ලංකා ‘ඒ’ කණ්ඩායම සමත්විය.

සිව්වැනි සහ අවසන් දිනය වූ අද දිනයේදී අයහපත් ආලෝක තත්ත්වය මත තරගය නිමා කරන විට පන්දුවට පහර දෙමින් සිටි ශ්‍රී ලංකා ‘ඒ’ කණ්ඩායම දෙවැනි ඉනිම සඳහා කඩුලු 6 ක් දැවී ලකුණු 317 ක් රැස් කරගෙන සිටියේය. ඒ අනුව දෙරට අතර පැවැති සිව්දින තරගාවලිය 0-0 ක් ලෙසින් ජය පැරදුමෙන් තොරවිය.

පැවැති තරග දේකේදීම පාකිස්තානු පන්දු යවන්නන් හමුවේ ශ්‍රී ලංකා පිතිකරුවන් පළමු ඉනිමේදී දුර්වලතාවයක් පෙන්නුම් කළද දෙවැනි ඉනිමේදී ලකුණු අතරට පැමිණීම කැපී පෙනුණි. ඒ අතරින් කැපී පෙනුණු කමිල් මිශාර පළමු තරගයේ පරිදිම මේ තරගයේදීද ලකුණු 98 ක් ලබා ගත්තේය. ශතකය පෙනි පෙනී තිබියදී මිශාර දැවී යෑම කණගාටුදායක විය.

ලකුණු 102 කට කඩුලු 2 ක් දැවී තිබියදී සිව්වැනි දිනය ඇරැඹූ ශ්‍රී ලංකා කණ්ඩායම අද දිනයේදී කඩුලු 4 ක් ප්‍රතිවාදීන් හමුවේ ලබා දෙමින් තවත් ලකුණු 215 කින් දෙවැනි ඉනිම පෝෂණය කරගත්තේය. පන්දු 168 ක් පුරා පිටියේ රැඳී කමිල් හතරේ පහර 15 ක් සිය ඉනිමට ඇතුළත් කළේය. දිනයේ සුවිශේෂීම ඉනිම ක්‍රීඩා කළ නායක සදීර නියමිත වේලාවට කළින් තරගය නිමා කරන විටත් කඩුල්ල ආරක්ෂා කර ගනිමින් ලකුණු 151 ක් රැස් කරගෙන සිටියේය. පන්දු 223 ක් පුරා විහිදුණු සදීර හයේ පහරක් සහ හතරේ පහර 26 ක් සිය ඉනිමට ඇතුළත් කර ගත්තේය.

පාකිස්තානු පිල පළමු ඉනිම වෙනුවෙන් සියලු දෙනා දැවී ලබා ගත් ලකුණු 394 ට පිළිතුරු ඉනිම ක්‍රීඩා කළ ශ්‍රී ලංකා ඒ පිල පළමු ඉනිම ලකුණු 67 කට සීමා විය. දෙරට අතර පැවැත්වෙන තරග 3 කින් සමන්විත නිල නොවන එක්දින තරගාවලියේ පළමු තරගය ලබන 10 වැනිදා ආරම්භ වනු ඇත.

Related posts

ප්‍රවීන්ගේ වාර්තාගත පන්දු යැවීමෙන් ශ්‍රී ලංකාවට ලකුණු 209 ක ජයක්

Chamila Karawita

කලම්බු ස්ටාර්ස්හි හිමිකාරීත්වය ‘සොෆ්ට්ලොජික්’ට

Chamila Karawita

එංගලන්ත පන්දු යවන්නන් කිසිම ලිහිළක් දුන්නේ නෑ – මැතිව්ස්

Chamila Karawita