A Team Featured Media Centre News

ශ්‍රී ලංකා ‘ඒ’ පිතිකරුවෝ හිස ඔසවති

පාකිස්තානු ‘ඒ’ කණ්ඩායමට එරෙහිව පල්ලකැලේ ජාත්‍යන්තර ක්‍රීඩාංගණයේ පැවැති පළමු නිල නොවන සිවුදින ටෙස්ට් තරගයේ අවසන් දිනයේදී ලකුණු අතරට පැමිණීමට ශ්‍රී ලංකා පිතිකරුවන් සමත්වූහ. සමස්ථ තරගයේ වැඩි කාලයක් වර්ෂාවට සේදී යෑම නිසා තරගය ජය පැරදුමෙන් තොරව නිමාවට පත්විය.

සිව්වැනි සහ අවසන් දිනය වූ ඔක්තෝබර් 31 වැනිදා තරගය නිමාවට පත් කරන විට නැවතත් සිය දෙවැනි ඉනිම ක්‍රීඩා කරමින් සිටි ශ්‍රී ලංකා ‘ඒ’ කණ්ඩායම කඩුලු 2 ක් දැවී ලකුණු 144 ක් ලබා සිටියේය. අවසන් හෝරාව එළැඹෙත්ම ශ්‍රී ලංකා පිලේ ආරම්භක පිතිකරු කමිල් මිශාර ලකුණු 98 කට දැවී යෑමත් සමඟ දෙපිළේ නායකයින්ගේ එකඟතාවය මත තරගය නතර කර දැමීය.

වේගවත් පිතිහරඹයක නියැළි කමිල් මිශාර තම ඉනිම සඳහා පන්දු 97 ක් පමණක් වැය කළ අතර ඊට හතරේ පහර 19 ක් එල්ල කළේය. ඔහු සමඟ ඉනිම ඇරැඹි ළහිරු උදාර ලකුණු 28 ක් ලබා සිටියදී දැවී ගියේය. මිශාර දැවී යන විට කඩුල්ලේ රැඳී සිටි ඕෂද ප්‍රනාන්දු ලකුණු 18 ක් රැස් කරගෙන සිටියේය.

එක් කඩුල්ලකට ලකුණු 187 ක්ව තිබියදී සිව්වැනි දිනය ඇරැඹූ පාකිස්තානු ‘ඒ’ කණ්ඩායම සිව්වැනි දිනයේදී ලකුණු 324 ක් දක්වා ලකුණු පුවරුව ඉහළ දමා ගත්තේ තවත් කඩුල්ලක් පමණක් ලබා දෙමිනි. පාකිස්තානු පිල වෙනුවෙන් නායක සවුද් ශකීල් ලකුණු 118 ක් ලබා පිටියෙන් ඉවත්ව ගියේය. ඒ වන විට පන්දු 223 කට මුහුණ දු් ශකීල් හතරේ පහර 13 ක් සිය ඉනිමට ඇතුළත් කර තිබුණේය. ඔහුට අමතරව ඔමායිර් යුසුෆ් (93) සහ කම්රන් ගුලාම් (58) අර්ධ ශතක රැස් කරමින් පාකිස්තානු ලකුණු පුවරුව පෝෂණය කළහ. පන්දු යවන්නන් 7 දෙනෙකුගේ සහාය ශ්‍රී ලංකා නායකයා අපේක්ෂා කළද ඉනි කඩුල්ල බැගින් දවා ගැනීමට සමත්වූයේ අසිත ප්‍රනාන්දු සහ ලසිත් ඇඹුල්දෙණිය පමණි. දෙරට අතර පැවැත්වෙන දෙවැනි සිව්දින තරගය ලබන 04 වැනිදා පල්ලකැලේ ක්‍රීඩාංගණයේදීම පැවැත්වේ.

Related posts

චන්දිමාල් විශිෂ්ඨ පිතිහරඹයක නිරත වුවත් ‘කොළඹට’ වේදනාත්මක පරාජයක්

Chamila Karawita

SLC President Shammi Silva appointed Asian Cricket Council Finance & Marketing Committee Chairman

Web Admin

Niroshan Dickwella 135, Lahiru Udara 106, Ashian Daniel 4/46 in Kandy’s routing of Galle; Dhananjaya de Silva 79 & 2 wkts in Jaffna’s 4-wkt win over Colombo

Web Admin