Featured Media Centre News NSL 2022

ප්‍රියමාල්ගේ සුපිරි පිතිහරඹයෙන් ගාල්ල දිනයි

By Chamila Karawita

ශ්‍රී ලංකා ක්‍රිකට් ආයතනයේ මෙහෙයවීමෙන් අද (24 දා) ආරම්භ වුණු නැෂනල් සුපර් ලීග් එක්දින ක්‍රිකට් තරගාවලිය යටතේ කොළඹ කණ්ඩායමට එරෙහිව කොළඹ එස්. එස්. සී. ක්‍රීඩාංගණයේ පැවැති තරගයෙන් කඩුලු 3 ක ජයක් වාර්තා කිරීමට ගාල්ල කණ්ඩායම සමත්විය.

ජයග්‍රහණය සඳහා ලකුණු 214 ක ඉලක්කයක් හඹා යෑමේදී පන්දුවාර 42 කුත් පන්දු 4 කදී ගාල්ල කණ්ඩායම ඉලක්කය සපුරා ගන්නා ලද්දේ කඩුලු 7 ක් පමණක් ප්‍රතිවාදී පන්දු යවන්නන් හමුවේ පූජා කරමිනි. ගාල්ල පිල වෙනුවෙන් කැපී පෙනෙන පිතිහරඹයක නිරත වුණු ප්‍රියමාල් පෙරේරා පන්දු 122 කදී ලකුණු 98 ක් ලබා තරග ජයගහණය සනාථ වන තෙක්ම කඩුල්ලේ රැඳී සිටියේය. හයේ පහරක් සහ හතරේ පහර 11 කින් සමන්විත වුණු ප්‍රියමාල්ගේ ඉනිමේ වටිනා කම වූයේ ලකුණු 93 කට කඩුලු 5 ක් බිඳ වැටී තිබියදී එම ඉනිම දියත් කිරීම නිසා විය.

එම ජයග්‍රහණයේදී ගාලු පිලට කණස්සල්ලට කරුණක් වූයේ නම් ඒ ප්‍රියමාල් පෙරේරාට ශතකය ලබා ගැනීමට නොහැකිවීම පමණි. 43 වැනි පන්දුවාරය ආරම්භයේදී ජයග්‍රහණය සඳහා ලකුණු 4 ක් ලබා ගත යුතු වුවත් එක් ලකුණකින් පැති මාරු කර ගැනීමට ප්‍රියමාල් කටයුතු කළේ තවත් අවස්ථාවක් ලබා ගැනීමේ බලාපොරොත්තු ඇතිව විය. එහෙත් ඊළඟ පන්දුවට ජෙහාන් ඩැනියල් දැවී යෑමත් සමඟ පිටියට පිවිසි හේෂාන් හෙට්ටිආරච්චි එල්ල කරන ලද හතරේ පහරත් සමඟ ගාල්ලේ ජයග්‍රහණය සනාථවීම සිය ඉනිම ලකුණු 98 දී නොබිඳිව තබා ගැනීමට ප්‍රියමාල්ට සිදුවිය.

ප්‍රියමාල්ට අමතරව සාර්ථක පිතිහරඹයක නිරත වුණු රමේෂ් මෙන්ඩිස් හයවැනි කඩුල්ල වෙනුවෙන් ගොඩ නංවන ලද සම්බන්ධතාවය පන්දු 125 කදී ලකුණු 110 ක් විය. ලකුණු 37 ක් ලබා ගැනීමේදී පන්දු 62 ක් මෙන්ඩිස් විසින් වැය කර තිබුණද එම ඉනිමේ වටිනා කම ගාල්ල කණ්ඩායමට කියා නිම කළ නොහැකි මට්ටමක විය. මීට අමතරව ඉනිම ආරම්භ කළ ධනංය ලක්ෂාන් පන්දු 34 කදී ලකුණු 29 ක් එක් කරමින් ජයග්‍රහණයට දායකත්වය දැක්වූවේය.

කාසියේ වාසියත් සමඟ පළමුව පන්දුවට පහර දුන් කොළඹ කණ්ඩායම පන්දුවාර 47.3 කදී සියලු දෙනා ලකුණු 213 කට සීමා විය. ඒ වෙනුවෙන් කැපී පෙනෙන පන්දුයැවීමක නිරත වුණු මහීෂ් තීක්ෂන ලකුණු 42 කට කඩුලු 3 ක්ද, ධනංජය ලක්ෂාන් සහ රමේෂ් මෙන්ඩිස් කඩුලු 2 බැගින්ද බිඳ හෙලූහ.

ක්‍රිෂාන් සංජුල වැඩිම ලකුණු ලාභියා වූයේ ලකුණු 46 ක් රැස් කරමිනි. හතරේ පහර 4 ක් ඇතුළත් වුණු සංජුල කුසල් මෙන්ඩිස් සමඟ පළමු කඩුල්ල වෙනුවෙන් පන්දු 60 කදී ලකුණු 56 ක් රැස් කළේය. මෙන්ඩිස් ලකුණු 37 ක් ලබා සිටියදී පිටියෙන් ඉවත් විය. සිය සහායකයා පිටියෙන් ඉවත් වුවද තම ඉනිම නොනවැත්වූ සංජුල නුවනිඳු ප්‍රනාන්දු සමඟ එක්ව දෙැනි කඩුල්ල වෙනුවෙන් පන්දු 75 කදී ලකුණු 59 ක සම්බන්ධතාවක්ද පවත්වමින් කොළඹ පිලේ ලකුණු සංඛ්‍යාව ඉහළ දැමූහ.

ලකුණු සාරාංශය

ගාල්ල කණ්ඩායම පන්දුවාර 42.4 කදී කඩුලු 7 ට ලකුණු 215 යි – (ධනංජය ලක්ෂාන් 29, ප්‍රියමාල් පෙරේරා 98*, හිමාෂ ලියනගේ 18, රමේෂ් නේඩිස් 37, ප්‍රභාත් ජයසූරිය 40/2, කවිඳ නදීෂාන් 43/2)

කොළඹ කණ්ඩායම පන්දුවාර 47.3 කදී සියලු දෙනා දැවී ලකුණු 213 යි – (කුසල් මෙන්ඩිස් 37, ක්‍රිෂාන් සංජුල 46, නුවනිඳු ප්‍රනාන්දු 30, සම්මු අශාන් 21, අෂේන් බණ්ඩාර 34, කලන පෙරේරා 15*, මහීෂ් තීක්ෂණ 42/3, ධනංජය ලක්ෂාන් 25/2, රමේෂ් මෙන්ඩිස් 31/2)

Related posts

Sri Lanka ODI squad for Australia series

Web Admin

50-SIXES PHANTOM BATSMAN BHANUKA RAJAPAKSA SAYS, “My real dream is to represent Sri Lanka in Test Cricket”

Web Admin

කොදෙව් පළමු ටෙස්ට් තරගයේදී ‘රංජන් මඩුගල්ලේ’ගෙන් තවත් වාර්තාවක්

Chamila Karawita