Featured Media Centre News Sri Lanka test tour of Bangladesh - 2022

මැතිව්ස්  150 සීමාව ආසන්නයට

By Chamila Karawita

පළමු ටෙස්ට් තරගයේ දෙවැනි දිනය වූ අද (16 දා) උදෑසන සාර්ථක පිතිහරඹයක නිරත වීමට ශ්‍රී ලංකා පිතිකරුවන් සමත් වුවත්, දිවා ආහාරයට මිනිත්තු කීපයකට පෙර නයීම් හසන් විසින් පන්දු 5 ක් ඇතුළත කඩුලු 2 ක් දවා ගැනීමට සමත්වීම නිසා තරගය යළිත් දෙපිළටම විවෘත විය.

කඩුලු 4 කට දැවී ලකුණු 258 ක් තිබියදී  දිනය ආරම්භ කළ ශ්‍රී ලංකා පිල නයීම් හසන්ගේ දක්ෂ පන්දු යැවීම හේතුවෙන් දිවා භෝජනය සඳහා තරගය නිමා කරන විට කඩුලු 6 කට ලකුණු 327 ක් ලෙසින් සටහන් විය. දිනේෂ් චන්දිමාල් සහ කඩුලු රකින ක්‍රීඩක නිරෝෂන් දික්වැල්ල පළමු සැසිය ඇතුළත දැවී ගිය පිතිකරුවන් බවට පත්වූහ.

 පෙර දිනයේදී ශතකයක් වාර්තා කර ගැනීමට සමත්වූ ඇන්ජලෝ මැතිව්ස් සිය පෞද්ගලික ලකුණු සංඛ්‍යාව 147 දක්වා ඉහළ දමා ගනිමින් ලකුණු 150 සීමාව ආසන්නයට පැමිණ සිටිද්දී අනෙක් අන්තයෙන් රමේෂ් මෙන්ඩිස් එක් ලකුණක් ලබා පන්දුවට පහර දීමේ අවකාශ විවර කරගෙන සිටිති. පන්දු 288 කට මුහුණ දී සිටින මැතිව්ස් සිය ඉනිම හයේ පහරකින් සහ හතරේ පහර 18 කින් සරසාගෙන සිටියි.

දිනය ආරම්භයේ සිට මනා විශ්වාසයකින් පන්දුවට පහර දුන් මැතිව්ස් – චන්දිමාල් යුගල පිටියේ පාලනය මුලු මනින්ම නතු කර ගැනීමට සමත්වූහ. දුර්වල පන්දු දුටු සැනින් දෙවරක් නොසිතා පහර එල්ල කළ මොවුන් දෙපළ අතරින් චන්දිමාල්ගේ ඉවසීම බිඳී යෑම පස්වැනි කඩුල්ලේ සම්බන්ධතාව බිඳ වැටීමට හේතුවිය. ලකුණු 136 ක් ලෙසින් සටහන් වුණු ඔවුන් දෙදෙනාගේ සම්බන්ධතාවයේදී අනවශ්‍ය රිවර්ස්වීප් පහර චන්දිමාල්ට අවාසනාව ගෙන ආවේය. නයීම් හසන් විසින් පිට ඉන්නට මඳක් ඈත්න් වන සේ කඩුල්ල තුළට දඟ කව ඒවූ පන්දුවට එල්ල කරන ලද රිවර් ස්වීප් පහර වැරදී යෑමෙන් චන්දිමාල්ගේ වටිනා ඉනිම නිමාවට පත්වූවේය. පන්දු 148 කදී ගොඩනැංවුණු චන්දිමාල්ගේ ලකුණු 66 ක ඉනිම ඔහුගේ 21 වැනි අර්ධ ශතකය ලෙසින් සටහන් විය. හතරේ පහරවලට වඩා හයේ පහර වලින් ලකුණු රැස් කිරීමට රුචිකත්වයක් දැක්වූ චන්දිමාල් සිය ඉනිම හයේ පහර 3 කින් සහ හතරේ පහර 2 කින් වර්ණවත් කර ගත්තේය.

ඔහුගේ දැවී යෑමෙන් පසු පිටියට පිවිසි නිරෝෂන් දික්වැල්ල වැඩි යමක් පිටිය තුළ සිදුකිරීමට නොහැකි වූයේ නයීම්ගේ පන්දුවක් කළින්ම පිට ඉන්න සොයා කඩුල්ල බිඳී යෑම හේතුවෙනි. පෙර පන්දු කීපයට වඩා තරමක් වේගය මුසු කරමින් යොමු කරන ලද පන්දුවට දික්වැල්ල කට් පහරක් එල්ල කරද ඒම පහර ඒල්ල කරන ද වේගයට වඩා වේගයෙන් පන්දුව කඩුල්ල සොයා පැමිණීයේය. මෙම තත්ත්වය තුළ 114 වැනි පනදවාරයේදී කඩලු 4 ට ලකුණු 319 ක් ලෙසින් පැවැති ලකුණු පුවරුව ඊට පන්දු 5 කට පසු දිස්වූයේ ලකුණු 323 කට කඩුලු 6 ක්  ලෙසිනි. සැසියේ සමස්ථයක් ලෙස ශ්‍රී ලංකා පිතිකරුවන් ලකුණු 65 කින් සිය ඉනිම පෝෂණය කර ගනිද්දී බංග්ලාදේශ පිතිකරුවා අවශ්‍යම කඩුල 2 ක් දවා ගැනීමට සමත්වීම කැපී පෙනෙයි. පන්දු යැවීමේදී ඊයේ දින දවාගත් කඩුලු 2 ක් ද සමඟ නයීම් හසන්ගේ පන්දු යැවීම සටහන් වූයේ පන්දුවාර 20 කදී ලකුණු 87 කට කඩුලු 4 ක් ලෙසිනි.

Related posts

Sri Lanka Test squad for Zimbabwe tour 2020

Web Admin

‘ක්‍රිකට් ගමට’ ව්‍යාපෘතියෙන් ජාතික කණ්ඩායමට පැමිණි අළුත්ම තරුව – ඩිල්ෂාන් මධුශංක

Web Admin

පැරදුණත් ශ්‍රී ලාංකිකයන්ගේ හදවත් දිනූ ‘ඔස්ට්‍රේලියාව’

Chamila Karawita