Australia tour of Sri Lanka 2022 Featured Media Centre News

ශ්‍රී ලංකාව පන්දුවට පහර දෙයි – වැන්ඩර්සිට ටෙස්ට් වරම්

By Chamila Karawita

ගාල්ල ජාත්‍යන්තර ක්‍රීඩාංගණයේ පැවැත්වෙන ටෙස්ට් තරගයකදී තීරනාත්මක සාධකය වන කාසියේ වාසිය තමන් සතු කරගැනීමට ශ්‍රී ලංකා නායක දිමුත් කරුණාරත්න සමත්වද්දී ශ්‍රී ලංකා කණ්ඩායම ප්‍රධාන දඟ පන්දු යවන්නන් තිදෙනෙකු සමඟින් අවතීර්ණව සිටියි.

පළමුව පන්දුවට පහර දීම පුදුමයක් නොවන ගාල්ල තණතීරුවේදී ශ්‍රී ලංකා නායකයාගේ තීරණය වූයේ පළමුව පන්දුවට පහර දීමය. දඟ පන්දු යවන්නන්ට පාරාදීසයක් බඳු ගාල්ල තණතීරුවේදී පා දඟ පන්දු යවන ජෙෆ්රි වැන්ඩර්සි අද දිනයේදී ටෙස්ට් වරම් දිනා ගැනීමට සමත්වූවේය. ශ්‍රී ලංකාව වෙනුවෙන් ටෙස්ට් වරම් දිනාගත් 158 වැනි ක්‍රීඩකයා බවට පත්වූ දකුණත් පා දඟ පන්දු යවන්නා එක්දින තරගාවලියේදී ඔස්ට්‍රේලියානු පිලට තර්ජනාත්මක පන්දු යැවීමක නිරත වීම නිසා ටෙස්ට් දොරටුව විවර කර ගැනීමට සමත්වූවේය.

වැන්ඩර්සිට අමතරව ලසිත් ඇඹුල්දෙණිය සහ පිට දඟ පන්දු යවන රමේෂ් මෙන්ඩිස් සෙසු ප්‍රධාන දඟ පන්දු යවන්නෝ වෙති. කෙසේ වෙතත් ධනංජය ද සිල්වාටද පිට දඟ පන්දු යවන්නකු ලෙස කැපී පෙනෙන මෙහෙයක් කණ්ඩායම වෙනුවෙන් ලබාදීමට ඇති හැකියාව නිසා, විශේෂඥ දඟ පන්දු යවන්නන් සිව් දෙනෙකුගේ සේවය ලබා ගැනීමට ශ්‍රී ලංකා නායකයාට අවස්ථාව උදාවී තිබේ. ශ්‍රී ලංකා කණ්ඩායම සතු එකම වේග පන්දු යවන්නා වන්නේ අසිත ප්‍රනාන්දුය.

කාසියේ වාසිය පරාජයට පත්වීමේදී ඔස්ට්‍රේලියානු නායක පැට් කමින්ස් සඳහන් කර සිටියේ කාසියේ වාසිය දිනාගැනීමට සමත්වූයේ නම් තමන්ද පළමුව පන්දුවට පහර දීමට කැමැත්තෙන් සිටි බවයි.

එක්දින තරගාවලිය අතරතුරදී ආබාධයකට ලක්වුණු මැද පෙළ පිතිකරු ට්‍රෙවිස් හෙඩ් අද තරගය සඳහා පූර්ණ සුවය ලබා සිටින බැවින් ග්ලෙන් මැක්ස්වෙල්ට අවසන් 11 දෙනා අතරට පැමිණීමට තිබූ ඉඩ කඩ ඇහිරී තිබේ. මේ අතර ඔස්ට්‍රේලියානු පිල මෙම තරගයට ප්‍රධාන දඟ පන්දු යවන්නන් දෙදෙනෙකු වන නේතන් ලයන් සහ මිචෙල් ස්වෙප්සන්ව කැඳවමින් තරගයට අවතීර්ණ වද්දී නායක පැට් කමින්ස් සහ මීචෙල් ස්ටාර්ක් වේග පන්දු යවන්නන් ලෙස ක්‍රීඩා කරති.

ශ්‍රී ලංකාව – දිමුත් කරුනාරත්න (නායක), 2. පැතුම් නිස්සංක, 3. කුසල් මෙන්ඩිස්, 4. ඇන්ජලෝ මැතිව්ස්, 5. ධනංජය ද සිල්වා, 6. දිනේෂ් චන්දිමාල්, 7. නිරෝෂන් දික්වැල්ල, 8. රමේෂ් මෙන්ඩිස්, 9. ජෙෆ්රි වැන්ඩර්සි, 10. ලසිත් ඇඹුල්දෙණිය, 11. අසිත ප්‍රනාන්දු

ඔස්ට්‍රේලියාව – 1. ඩේඩිඩ් වෝනර්, 2. උස්මාන් කවාජා, 3. මානස් ලබුෂේන්, 4. ස්ටීවන් ස්මිත්, 5. ට්‍රෙවිස් හෙඩ්, 6. කැමරන් ග්‍රීන්, 7. ඇලෙක්ස් කේරි, 8. පැට් කමින්ස් (නායක), 9. මිචෙල් ස්ටාර්ක්, 10. නේදන් ලයන්, 11. මිචෙල් ස්වෙප්සන්.

Related posts

කොදෙව්වන් අන්ත පරාජයකට ඇද දමමින් ශ්‍රී ලංකා යෞවනයෝ අපරාජිත බව රැක ගනිති

Web Admin

ජයග්‍රාහී ප්‍රවේශයකින් ශ්‍රී ලංකා යොවුන් පිල වැඩ අරඹයි

Web Admin

දැන් පීඩනය ඇත්තේ ශ්‍රී ලංකා කණ්ඩායමටයි – ටොම් ලෙතම්

Web Admin