Media Centre News Under 19 Girl's Womens Cricket

ශ්‍රී ලංකා බාලිකාවෝ ලකුණු 12න් පරදිති

සිව්කොන් තරගාවලියකට සහභාගිවීම සඳහා ඉන්දියාවට ගොස් සිටින ශ්‍රී ලංකා වයස අවුරුදු 19 න් පහළ බාලිකා ක්‍රිකට් කණ්ඩායම එම තරගාවලිය යටතේ ඉන්දීය ‘බී’ පිලට එරෙහිව පැවැති තරගයෙන් ලකුණු 12 ක පරාජයකට මුහුණ දුන්නේය.

නොවැම්බර් 13 වැනිදා විසාග්හි පැවැති මෙම තරගයේදී පළමුව පන්දුවට පහර දුන් ඉන්දීය බාලිකා ‘බී’ කණ්ඩායම නියමිත පන්දුවාර 20 අවසනදී කඩුලු 5 ක් දැවී ලකුණු 125 ක් රැස් කළ නමුදු එය හඹා යෑමේදී ශ්‍රී ලංකා බාලිකා පිලට පන්දුවාර 20 අවසනදී කඩුලු 9 ක් දැවී රැස් කරගත හැකි වූයේ ලකුණු 113 ක් පමණි.

ශ්‍රී ලංකා පිල වෙනුවෙන් මනුදි නානායක්කාර පන්දු 30 කදී ලකුණු 33 ක් ලබා වැඩිම ලකුණු ලාභිණිය බවට පත්වූවාය. ජාත්‍යන්තර අත්දැකීම් ඇති කණ්ඩායමේ නායිකාව වූ විශ්ම ගුණරත්න ලකුණු 11 කට දැවී ගිය අතර ඇයගේ සහායක ආරම්භක පිතිකාරිණිය වූ සුමුදු නිසංසලා ලකුණු 12 ක් ලබා සිටියදී දුවද්දී දැවී යෑමකට හසුවූවාය.

පළමු කඩුලු 2 ලකුණු 29 කදී බිද වැටුණද රශ්මි නේත්‍රාංජලීට (20) එක්වූ මනුදි ශ්‍රී ලංකා පිලේ කොඳුනාරටිය බවට පත් වෙමින් පන්දුවට පහර දුන්නාය.පන්දු යැවීමේදී මනාට් කාශ්‍යප් ලකුණු 18 කට ශ්‍රී ලංකා පිතිකාරිණියන් සිව් දෙනෙකු දවාලූවාය.

මේ අතර ඉන්දීය ඉනිමේදී ජී ට්‍රිසා පන්දු 38 කදී වේගවත් ලකුණු 49 ක් රැස් කළ අතර ඇයට අමතරව ඉෂ්වාරී සවාකර් ලකුණු 30 ක් රැස් කලාය. ශ්‍රී ලංකා බාලිකා පිල මීළඟට සහභාගිවන තරගය ලබන 15 වැනිදා බටහිර ඉන්දීය කොදෙව් පිලට එරෙහිව තරග වදිනු ඇත.

ඉන්දීය බාලිකා ‘බී’ කණ්ඩායම පන්දුවාර 20 කදී කඩුලු 5 ට ලකුනු 125 යි – (ජී. ට්‍රීෂා 49, ඊෂ්වරී සව්කාර් 30, නිකී ප්‍රසාද් 22, මනාට් කාශ්‍යප් 10, දෙව්මි විහංග 35/2, රශ්මි නේත්‍රාංජලී 20/2)

ශ්‍රී ලංකා බාලිකා කණ්ඩායම පන්දුවාර 20 කදී කඩුලු 9 ට ලකුණු 113 යි – (මනුදි නානායක්කාර 33, රශ්මි නේත්‍රාංජලී 20, සංජනා කාවින්දි 14, සුමුදු නිසංසලා 12, විශ්මි ගුණරත්න 11, මනාප් කාශ්‍යප් 18/4)

Related posts

‘සෙන්චූරියන්හි සෙන්චරියක්’ ලද එකම ශ්‍රී ලාංකිකයා

Chamila Karawita

යොවුන් පිලේ වෙනස්කම් 5 ක්

Chamila Karawita

ශ්‍රී ලංකාව පන්දුවට පහර දෙයි – ප්‍රවීන්ට විස්සයි-20 වරම්

Chamila Karawita