Featured Media Centre News Sri Lanka tour of India 2023

සූර්යකුමාර්ගේ ශතකයෙන් ශ්‍රී ලංකාවට ලකුණු 229 ක ඉලක්කයක්

ඉන්දීය ඉනිම සූර්යකුමාර් යාදව්ගේ සංදර්ශනයක් විය. 6 වැනි පන්දුවාරයේදී පන්දුවට පහර දීමට පැමිණි දකුණත් පිතිකරුවා ඉනිමේ අවසන් පන්දුවාරය තෙක්ම සිය කඩුල්ල ආරක්ෂා කර ගත්තේ ශ්‍රී ලංකා පන්දු යවන්නන් හමුවේ අනුකම්පා විරහිත ලෙස පිත්ත හසුරුවමිනි. මිස්ටර් 360 ලෙසින් නම් දරා සිටින යාදව් අද දිනයේදී නොදැවී ලකුණු 112 ක් ලබා ගත්තේ පන්දු 51 කට පමණක් මුහුණ දෙමිනි.

තණතීරුව දෙපසින් වූ හතරේ සීමාව පිතිකරුවාට ආසන්නයෙන්ම පිහිටා ඇති බැවින් එහි වාසිය ලබා ගත් යාදව් ප්‍රමුඛ ඉන්දීය පිතිකරුවෝ නියමිත පන්දුවාර 20 අවසනදී කඩුලු 5 කට ලකුණු 229 ක ඉලක්කයක් ශ්‍රී ලංකාවට ලබාදුන්හ.

ඉන්දීය ඉනිමේදී වාර්තා වුණු හයේ පහර 14 න් 9 කටම හිමිකම් කී යාදවු සිය ඉනිමට හතරේ පහර 7 ක්ද එල්ල කළේය. 46 වැනි ජාත්‍යන්තර විස්සයි-20 තරගයට අද දිනයේ සහභාගිවුණු යාදව් අද රැස් කර ගන්නා ලද්දේ තෙවැනි විස්සයි-20 ජාත්‍යන්තර ශතකයයි. ඒ හැරුණු කොට අර්ධ ශතක 13 කටද හිමිකම් කියන දකුණත් පිතිකරුවාගේ සාමාන්‍යා 46.71 ක් සහ ප්‍රහාරාත්මක වේගය 180.34 ක් තරම් ඉහළ අගයක පවත්වාගෙන යෑමද කැපී පෙනෙයි.

පළමු පන්දුවාරයේදී ඉෂාන් කිශාන් දවා ගැනීමට ඩිල්ෂාන් මදුශංක සමත් වුවත්, ශුබ්මන් ගිල්ට එක්වූ රාහුල් ට්‍රිපාටි දෙවැනි කඩුල්ලට පන්දු 31 කදී ලක්ණු 49 ක් එක් කරමින් ස්ථාවරත්වයක් ලබා දුන්හ. ඉනිමේ ප්‍රාහරාත්මක කඩුලු සම්බන්ධතාවය ආරම්භ වූයේ ට්‍රිපාටිගේ දැවී යෑමත් සමඟය. පන්දු 16 කදී ලකුණු 35 ක් ලබා සිටි ට්‍රිපාටික චාමිකගේ පන්දුවක් හමුවේ මදුශංක අතට උඩ පන්දුවක් දී දැවී යෑමෙන් පසු ගිල්ට එකතු වුණු සූර්යකුමාර් යාදව් ඉනිමේ සාර්ථකම සම්බන්ධතාව වූ ලකුණු 111 ක් රැස් කළේ පන්දු 53 ක් වැය කරමිනි. එම සම්බන්ධතාවේදී ගිල්ගේ දායකත්වය පන්දු 19 කදී ලකුණ 32 ක් වුවත් ඊට වඩා දෙගුණයක් ප්‍රහාරාත්මක වුණු යාදව් පන්දු 34 කදී වේගවත් ලකුණු 77 ක් රැස් කළේය.

ඉන්දීය ඉනිමේ හරි අඩක් අවසන් වන විට ඔවුන් කඩුලු 2 කට ලබා සිටියේ ලකුණු 92 ක් පමණි. එහෙත් යාදව්ගේ පිබිදීමත් සමඟ අවසන් පන්දුවාර 10 දී ලකුණු 136 ක් රැස් කර ගැනීමට ඔවුහු සමත් වූහ. ඉන්දීය පිතිකරුවන් හමුවේ ශ්‍රී ලංකා පන්දු යවන්නන් දරුණු ප්‍රහාරයකට ලක් වූවත් ඒ අතරින් නිලකුණු පන්දුවාරයක් යැවීමට කසුන් රජිත සමත්විය. ඉනිමේ කැපී පෙනෙනම පන්දු යවන්නා බවටද පත්වූ රජිත පන්දුවාර 4 ලකුණු 35 කට සීමා කරමින් කඩුල්ලක් දවා ගනිද්දී වනිඳු හසරංග තම පන්දුවාරය 4 ලකුණු 36 කට සීමා කොට එක් කඩුල්ලක් දවා ගැනීමට සමත්වූවේය. සෙසු පන්දු යවන්නන්ට රිද්මය සොයා ගැනීමට අසමත් වද්දී පන්දුවාරයකට ලකුණු 12 ට වඩා සාමාන්‍ය රඳවා ගැනීමට ඉන්දීය පිතිකරුවෝ සමත්වූහ.

Related posts

ක්‍රීඩකයින් ගැන සිතා වැස්සෙන් හානිවූ තරග නැවතත් පවත්වයි  

Chamila Karawita

කුසල් මෙන්ඩිස්, දික්වැල්ල සහ ගුණතිලකට තහනමක්

Chamila Karawita

Colts CC down SL Air Force SC, Badureliya SC thrash Galle CC by 5 wkts., NCC thump Lankans CC by 120, SSC outshine Moors SC by 3 wkts

Web Admin