මෙම මස 21 වැනිදා ඔස්ට්‍රේලියාවේදී ආරම්භ වීමට නියමිත විස්සයි-20 කාන්තා ලෝක කුසලාන ක්‍රිකට් තරගාවලිය යටතේ ශ්‍රී ලංකා කාන්තා පිලට හිමි දෙවැනි සහ අවසන් පුහුණු තරගයෙන් එංගලන්ත කණ්ඩායමට එරෙහිව කඩුලු 10 ක ජයක් වාර්තා කළ ශ්‍රී ලංකා කාන්තා ක්‍රීඩිකාවෝ ලෝක කුසලාන තරගාවලිය සඳහා ජයග්‍රාහී ප්‍රවේශයක් ලබා ගැනීමට සමත්වූහ.

ඇඩිලේඩ්හි පැවැති මෙම තරගයේදී ප්‍රථමයෙන් පන්දුවට පහර දුන් එංගලන්ත කාන්තා කණ්ඩායම නියමිත පන්දුවාර 20 ඇතුළත කඩුලු 9 ක් දවා ගත් ශෂිකලා සිරිවර්ධන සහ චමරි අතපත්තු ප්‍රමුඛ ශ්‍රී ලංකා කාන්තා පිල එංගලන්ත ඉනිම ලකුණු 122 කදී නවතාලීමට සමත්වූහ. ඒ අනුව එම ලකුණු සංඛ්‍යාව හඹා ගිය ශ්‍රී ලංකා කණ්ඩායම කණ්ඩායමේ ආරම්භක පිතිකාරියන් දෙපළ වූ චමරි අතපත්තු සහ හසිනි පෙරේරා 13 වැනි පන්දුවාරයේ තෙවැනි පන්දුවේදී ජයග්‍රහණය සනාථ කර ගන්නා විට ලකුණු පුවරුවේ කඩුලු 10 ක් සහ පන්දු 45 ක් ඉතිරිව තිබිණේ ශ්‍රී ලංකාවට විශිෂ්ඨ ජයග්‍රහණයකට මං විවර කරමිනි.

ශ්‍රී ලංකා පිල වෙනුවෙන් අනගි පිතිහරඹයක් දියත් කරන ලද චමරි අතපත්තු හයේ පහර 5 ක් සහ හතරේ පහර 8 ක් සමගින් පන්දු 50 කදී වේගවත් ලකුණු 78 ක් ලබා වැඩිම ලකුණු ලාභිනිය ඉයට පත්වූවාය. පන්දු යැවීමෙන්ද ලකුණු 21 කට කඩුලු 3 ක් දවා ගත් චමරි තුන් ඉරියව්වෙන්ම දක්ෂතා දක්වමින් ශ්‍රී ලංකා පිලේ ජයග්‍රහණය සඳහා දැවැන්ත කාර්යය භාරයක් ඉටු කළාය. ඇයට අමතරව අනගි සහායක් ලබා දුන් හසිනි පෙරේරා හතරේ පහර 4 ක් සමඟින් පන්දු 25 කදී වේගවත් ලකුණු 29 ක් ලබා ගත්තාය.

කාසියේ වාසිය දිනූ ශ්‍රී ලංකා නායිකාව ප්‍රථමයෙන් පන්දුවට පහර දීම සඳහා එංගලන්ත පිලට ආරාධනා කර සිටි නමුත් දෙවැනි කඩුල්ල වෙනුවෙන් ලකුණු 35 ක් එක් කිරීමට ඇමී ජෝන්ස් සහ ෆ්‍රිනේ ජෝන්ස් සමත්වූහ. එහිදී අමා කාංචනා විසින් ලකුණු 18 ක් ලබා සිටි ෆ්‍රාන් විල්සන්ව දුවද්දී දවා ගැනීමකට හසු කර ගැනීමත් සමඟ එංගලන්ත පිතිකාරිණියන් එකා පිට එකා දැවී යෑම ඇරැඹිණ. එහිදී ක්‍රියාත්මක වුණු ශෂිකලා සිරිවර්ධන ඉනිමේ වැඩිම ලකුණු ලද පිතිකාරිණියන් දෙදෙනාගෙන් එක් ක්‍රීඩිකාකාවක වූ ඇමී ජෝන්ස්ව ලකුණු 23 කට දවාළමින් එංගලන්ත ඉනිම තවත් අසීරුවට පත් කළාය.

ලෝක කුසලාන ක්‍රිකට් තරගාවලිය යටතේ ශ්‍රී ලංකා කණ්ඩායම සහභාගිවන පළමු තරගය ලබන 22 වැනිදා නවසීලන්තය සමඟ පර්තිහි වකා ක්‍රීඩාංගණයේදී පැවැත්වෙනු ඇත.

Image Courtesy: ICC