ජාත්‍යන්තර ක්‍රිකට් කවුන්සිලය විසින් මෙහෙයවන ලද වයස අවුරුදු 19 න් පහළ ලෝක කුසලාන ක්‍රිකට් තරගාවලිය යටතේ ‘පළඟ’ ශූරතා අවසන් මහ තරගයේදී එංගලන්ත යොවුන් කණ්ඩායම හමුවේ ලකුණු 152 ක පරාජයක් ලැබීම නිසා 10 වැනි ස්ථානයේ රැඳී සිටිමින් 13 වැනි ලෝක කුසලාන ගමන නිමා කිරීමට ශ්‍රී ලංකා යොවුන් කණ්ඩායමට අද (03 දා) සිදුවිය.

බෙනෝනිහිදී පැවැති මෙම තරගයේදී ලකුණු 280 ක ඉලක්කයක් හඹා ගිය ශ්‍රී ලංකා කණ්ඩායමට එංගලන්ත පන්දු යවන්නන් හමුවේ රැස් කර ගත හැකි වූයේ පන්දුවාර 31 කදී ලකුණු 127 ක් පමණි. රටවල් 16 කගේ සහභාගිත්වයෙන් පැවැති මෙවර යොවුන් ලෝක කුසලාන ක්‍රිකට් තරගාවලියේදී පළඟ ශූරතාව අහිමිවීම නිසා ශ්‍රී ලංකාවට හිමිවූයේ 10 වැනි ස්ථානය වේ.

ලකුණු හඹා යෑමේදී පළමු කඩුල්ල ලෙස නවෝද් පරණවිතාන මුලු ලකුණු සංඛ්‍යාව 01 ක්ව තිබියදී දැවී ගියේය. අසාර්ථක ආරම්භයත් සමඟ පළමු පන්දුවාර 15 ව අවසන් වීමට මත්තෙන් පිතිකරුවන් යැයි සම්මත 5 දෙනෙකුම තරග නරඹන්නන් බවට පත්වීම මෙතරම් පරතරයකින් තරග පරාජයට මූලාශ්‍ර විය.

එහෙත්තම අන්තය ආරක්ෂා කර ගනිමින් පන්දුවට පහර දුන් රවිඳු රසාන්ත හුදෙකලා සටනක නිරත වෙමින් අර්ධ ශතකයක් රැස් කර ගත්තේය. පන්දු 81 කින් සමන්විත රවිඳු ලකුණු 66 කට දැවී ගියේ තම ඉනිම හතරේ පහර 9 කින් ඇතුළත් කරගෙන සිටියදීය.

ශ්‍රී ලංකා පිතිකරුවන්ගේදැවැන්තම හිසරදය බවට පත්වූ ලුවිස් ගෝල්ඩ්ස්වර්ත් ලකුණු 21 කට ශ්‍රී ලංකා පිතිකරුවන් 5 දෙනෙකු දවා ගනු ලැබුවේ මීට සති කීපයකට ඉහත බටහිර ඉන්දීය කොදෙව්හි පැවැති තුන්කොන් එක්දින තරගාවලියේදී ශ්‍රී ලංකාව හමුවේ ලද පරාජයේ වාඩුව ලබා ගනිමිනි.

රවිඳු රසාන්තට පසු ශ්‍රී ලංකා ඉනිම වෙනුවෙන් කමිල් මිශාර (15) සහ චමිඳු විජේසිංහ (11) පමණක් ලකුණු 10 සීමාව ඉක්මවාලූහ. තණකොළ රහිත වූ බෙනෝනි තණතීරුවේ කාසියේ වාසි දිනුවද ප්‍රථමයෙන් පන්දුවට පහර දීම සඳහා ශ්‍රී ලංකා නායකයා විසින් එංගලන්ත පිලට ආරාධනා කර සිටීමද තරමක පුදුමය දනවන්නක් විය.

කෙසේ වෙතත් ඉනිම ඇරඹූ එංගලන්තය වෙනුවෙන් සාර්ථක පිති ප්‍රහාරයක් දියත් කළ ආරම්භක පිතිකරු ඩෑන් මෞස්ලි පන්දු 135 කදී හතරේ පහර නවයක්සහ හයේ පහරක් සමඟින් ලකුණු 111 ක් රැස් කළේ ශ්‍රී ලංකා පන්දු යවන්නන් අසරණ භාවයට ඇද දමමිනි. ඔහුගේ ඉනිම ප්‍රධාන කොට එංගලන්ත කණ්ඩායම විටෙක ලකුණු 300 සීමාව පහසුවෙන් ඉක්මවා යෑමේ අවස්ථාවක් පැවැතියද ලකුණු 21 ක් තුළ කඩුලු 3 ක් දවා ගැනීමට ශ්‍රී ලංකා ක්‍රීඩකයින් සමත්වීම මත එම අවස්ථාව ඔවුන්ගෙන් ගිලිහී ගියේය.

මෞස්ලිට අමතරව ජැක් හේන්ස් ලකුණු 68 ක් රැස් කරන ලද්දේ තෙවැනි කඩුල්ල වෙනුවෙන් ලකුණු 142 ක සාර්ථක සම්බන්ධතාවයක්ද පැවැත්වීමට දායකත්වය දක්වමිනි.

ලකුණු සාරාංශය – එංගලන්ත යොවුන් පිල පන්දුවාර 50 කදී කඩුලු 7 ට ලකුණු 279 යි – (ඩෑන් මෞස්ලි 111, ජැක් හේන්ස් 68, ජෝයි එවිසන් 59, ජෝර්දන් කොක්ස් 17, ජෝර්ජ් බෝල්ඩ්සන් 13, ඩිල්ෂාන් මධුශංක 41/2, දිලුම් සුධීර 39/2)

ශ්‍රී ලංකා යොවුන් පිල පන්දුවාර 31 කදී සියලුදෙනා දැවී ලකුණු 127 යි – (රවිඳු රසාන්ත 66, කමිල් මිශාර 15, චමිඳු විජේසිංහ 11, ලුවිස් ගෝල්ඩ්ස්වර්ත් 21/5)