Chamila Karawita reporting from Katunayake

තරග 2 කින් සමන්විත ටෙස්ට් තරගාවලියට ප්‍රථම එංගලන්ත ක්‍රිකට් කණ්ඩායමට හිමි පළමු නිල නොවන තුන් දින පුහුණු තරගයේදී පළමු දිනය ඇතුළත සංචාරකයින්ගේ පළමු ඉනිම ලකුණු 316 කට සීමා කිරීමට ළහිරු සමරකෝන් ප්‍රමුඛ ශ්‍රී ලංකා ක්‍රිකට් ආයතන පන්දු යවන්නෝ අද (07 දා) සමත්වූහ.

හලාවත මේරියන්ස් ක්‍රීඩා සමාජ පිටියේ පැවැති මෙම තරගයේදී කාසියේ වාසියත් සමඟ පන්දුවට පහර දුන් එංගලන්ත කණ්ඩායම අවසන් වරට දකුණු අප්‍රිකාවට එරෙහිව ක්‍රීඩා කරන ලද තරගයේ මුල් පිතිකරුවන් 7 දෙනා පන්දුවට පහර දුන් පිළිවෙළටම මෙම තරගයේදීත් පන්දුවට පහර දුන්හ. ඒ අතරින් කැපී පෙනුණු නායක ජෝ රූට් සහ ජොස් බට්ලර් අර්ධ ශතක වාර්තා කිරීමට සමත්වීම දිනයේ කැපී පෙනුණි.

බදුරලිය ක්‍රීඩා සමාජය නියෝජනය කරනු ලබන ළහිරු සමරකෝන් දිනයේ කැපී පෙනෙන පන්දු යවන්නා බවට පත් වෙමින් ලකුණු 63 කට කඩුලු 3 ක් දවා ගත්තේය. දකුණතින් වේග පන්දු යවන ළහිරු සංචාරකයින්ගේ අවසන් පිතිකරුවා වූ ක්‍රිස් වෝක්ස්ව (00) දවා ගැනීමට ප්‍රථම ආරම්භක පිතිකරු සැක් ක්‍රෝව්ලි සහ ජොස් බට්ලර්ගේ කඩුලු දවාගැනීමට සමත්වූවේය.

සැක් ක්‍රෝව්ලි සහ ඩොබ් සිබ්ලි එක්ව ඉනිම ආරම්භ කරන ලද මෙම තරගයේදී පළමු කඩුල්ල වෙනුවෙන් ගොඩනංවන ලද සම්බන්ධතාව 52 දී බිඳ හෙළන ලද්දේ නවක පන්දු යවන්නකු වන කවිෂ්ක අංජුල විසිනි. කඩුල්ල මුවා කිරීමේ වරදට සිබ්ලිව දවා ගැනීමට කණිෂ්ක සමත් වද්දී මුලු ලකුණු සංඛ්‍යාව 69 ක්ව තිබියදී සෙසු ආරම්භක පිතිකරුවා ව දවා ගැනීමට ළහිරු සමරකෝන් සමත්විය.

තෙවැනි කඩුල්ලට එක්වූ ජෝ රූට් සහ ජෝ ඩෙන්ලි තෙවැනි කඩුල්ල වෙනුවෙන් ලකුණු 55 ක් එක් කරමින් සිටියදී නිසල තාරක විසින් ඩෙන්ලිව ලකුණු 32 කට දවා ගත්තේය. එතැන් පටන් ලකුණු පුවරුවට ලකුණු 18 ක් එක් වන අතර වාරයේ එංගලන්ත කණ්ඩායමේ කඩුලු 3 ක් දැවී යෑම තරගය තරමක් මන්දගාමී ස්වරූපයක් එක් කරවන සිදුවීමක් බවට පත්විය. දැවී ගිය පිතිකරුවන් තිදෙනා අතරට එංගලන්ත කණ්ඩායම සතු ප්‍රබලම තුන් ඉරියව් ක්‍රීඩකයා වන බෙන් ස්ටෝක්ස් (03) ගේ කඩුල්ලද ඇතුළත්ව තිබීම ශ්‍රී ලංකා කඳවුරට කිසියම් උද්දීපනයක් එක් කරවන සිදුවීමක් බවට පත්විය.

සමස්ථයක් ගත් විට එංගලන්ත පිලට අභියෝගයක් වෙමින් පන්දු යැවූ කවිෂ්ක අංජුල ඔහුගේ දෙවැනි කඩුල්ල ලෙසින් නායක ජෝ රූට්වද දවා ගත්තේද සිබ්ලිව දවා ගත් අන්දමේ කඩුල්ල මුවා කිරීමේ වරදට හසු කර ගනිමිනි. මුහුණ දුන් 93 වැනි පන්දුවේදී  එංගලන්ත නායකයාගේ ඉනිම ලකුණු 78 කදී අවසන් වන විට අලංකාර ඩ්‍රයිව් පහර 9 කින් සිය ඉනිම සරසාගෙන සිටියේය.

සෙසු අර්ධ ශතක ලාභියා වූ ජෝස් බට්ලර් ඉනිමේ 9 වැනි පිතිකරුවා ලෙසින් දැවී ගියේය. පන්දු 159 ක් පුරා විහිදුණු බට්ලර්ගේ ලකුණු 79 ක ඉනිම සඳහා හතරේ පහර 5 ක් සහ ඉනිමේ වාර්තා වුණු එකම හයේ පහර ඇතුළත් කර ගත්තේය.

හෙට තරගයේ දෙවැනි දිනය වන අතර ශ්‍රී ලංකා ක්‍රිකට් ආයතන XI දිනය ආරම්භයේ පන්දුවට පහර දීමට නියමිතය.