ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන අන්තර් සමාජ වයස අවුරුදු 23 න් පහළ ප්‍රධානතම ක්‍රිකට් තරගාවලියේ නොසිතූ පෙරැළියක් සිදුකරමින් බදුරලිය ක්‍රීඩා සමාජය අවසන් කණ්ඩායම් 4 අතර හෙවත් අර්ධ අවසන් තරග වටයට සුදුසුකම් ලැබීමට සමත්විය. ඒ අනුව අදාළ අර්ධ අවසන් තරග වටයේදී බදුරලිය ක්‍රීඩා සමාජය එස්. එස්. සී. පිල සමගත් ලන්කන් ක්‍රීඩා සමාජය කෝල්ට්ස් ක්‍රීඩා සමාජය සමගත් තරග වැදීමට නියමිතව සිටිති.

තරගාවලියේ 6 වැනි සතිය අවසන් වන තෙක්ම ඒ කාණ්ඩයේ පෙරමුණ ගෙන සිටියේ යුද හමුදා කණ්ඩායම වූ නමුත්, දෙවැනි තරග වටයට සුදුසුකම් ලැබීමට ජයග්‍රහණය අනිවාර්ය වූ පොලිසියට එරෙහි තරගයේදී කඩුලු 5 ක ජයක් ලද බදුරලිය ක්‍රීඩා සමාජය ඒ කාණ්ඩයේ පෙරමුණට පැමිණෙමින් අවසන් 4 දෙනාගේ තරග වටයට සුදුසුකම් ලැබීය.

මේ අතර අවසන් කණ්ඩායම් 4 ට සුදුසුකම් ලබා සිටින කණ්ඩායම් අතර අවම ජයග්‍රහණ සංඛ්‍යාවක් වාර්තා කරමින් සුදුසුකම් ලබා සිටින්නේ බී කාණ්ඩය යටතේ තරග වැදි ලන්කන් ක්‍රීඩා සමාජයයි. ඔවුන් මූලික වටය යටතේ තරග වැදි තරග 5 න් 3 ක් ජයගනිමින් එම අවස්ථාව දිනා ගනිද්දී සී සහ ඩී කාණ්ඩ  යටතේ තරග වැදි කෝල්ට්ස් සහ එස්. එස්. සී. තරග වැදි සියළුම තරග ජය ගනිමින් අපරාජිතව අර්ධ අවසන් තරග වටයට සුදුසුකම් ලබා සිටිති.

මෙම අර්ධ අවසන් තරග වටය ඔක්තෝම්බර් 07 වැනිදා පැවැත්වෙන අතර එහිදී එහිදී බදුරලිය – එස්. එස්. සී, සී. සී. සී. පිටියේදීද ලන්කන් සහ කෝල්ට්ස් එන්. සී. සී. පිටියේදීද තරග වදිනු ඇත. මෙම තරගාවලියේ අවසන් මහ තරගය ලබන 11 වැනිදා කොළඹ එස්. එස්. සී. පිටියේදී පැවැත්වේ.