තමා තම මල්ලී වනිඳු සමඟ එක්ව ක්‍රීඩා කරන සෑම අවස්ථාවකදීම සතුටකින් සහ උනන්දුවකින් ක්‍රීඩා කරන බවත් එහි ප්‍රතිඵල අද (13) දිනයේ සැමට දැකගැනීමට හැකිවූ බවත් සඳුදා පැවැති ජැෆ්නා කින්ග්ස් – දඹුල්ල ජයන්ට්ස් තරගයේ වීරයා ලෙස නම් කැරැණු ජැෆ්නා කින්ග්ස් කණ්ඩායමේ තුන් ඉරියව් ක්‍රීඩක චතුරංග ද සිල්වා තරගයෙන් පසුව ප්‍රකාශ කළේය.
තමා සෑමවිටම ඕනෑම තරගයකදී ක්‍රීඩාකරන්නේ කණ්ඩායම් හැඟීමෙන් යුතුව. කණ්ඩායම ජයග්‍රහණය කරාගෙන යාමේ එකම අරමුණින් බව පවසන චතුරංග ඒ අයුරින් කණ්ඩායම් හැඟීමෙන් තරග වැදීමෙන් ජයග්‍රහණය අපහසු නොවන දෙයක් බවද සඳහන් කළේය.
පන්දු යැවීමේදී හෝ පන්දුවට පහරදීමේදී මගෙන් ඉටුවිය යුතු සේවය සීයයට සියයක්ම කණ්ඩායමට ලබාදීම යුතුකමක් ලෙස තමා සළකන බවත් අද දිනයේ දඹුල්ල ජයන්ට්ස් සමඟ තරගයේදී තම කණ්ඩායමේ ක්‍රීඩකයන් කිහිපදෙනෙකු තුළින්ම එය දැකගැනීමට ලැබුණු බවත් චතුරංග ද සිල්වා වැඩිදුරටත් පැවසීය.
කණ්ඩායමේ ක්‍රීඩකයන් සියල්ලගේ අපේක්ෂාව මේ ලබන ජයග්‍රහණ අවසාන තරගය නිමවන තෙක්ම පවත්වාගෙන යාම යැයි කී චතුරංග තම සහෝදරයා සහ තමා අතර ක්‍රිකට් සබඳතා පවතින්නේ ඉතාමත් කුඩාකළ සිටම යැයිද කියයි.
ජයග්‍රාහී ජැෆ්නා කින්ග්ස් කණ්ඩායමේ නායක තිසර පෙරේරා අදහහස් දක්වමින් ප්‍රකාශ කළේ මීළඟ තරගයට අනිවාර්යෙන්ම යාපනය ප්‍රදේශයේ ක්‍රීඩකයෙකු ක්‍රීඩා කරන බවත් එම ප්‍රදේශයේ තරුණ ක්‍රීඩකයනට ඉදිරියේදී හැකි තරමි අවස්ථාව දීමට අපේක්ෂා කරන බවත්ය.
මේ තරගාවලියේ බොහෝ අවස්ථාවන්හි මට එතරම් දෙයක් කිරීමට ඉතිරිව තිබුණේ නැහැ සෙසු සියලු ක්‍රීඩකයන් තම කාර්යයන් මැනවින් ඉටුකිරීම මත සියල්ල පහසුවූවා. තමාට පැවරී තිබුණේ කණ්ඩායමට නායකත්වය දීම පමණකැයිද තිසර පෙරේරා පැවසීය.
දඹුල්ල ජයන්ට්ස් කණ්ඩායමේ නායක දසුන් ශානක පවසන්නේ තරග ආරම්භයේදීම කාසියේ වාසිය අහිමිවිම පරාජයට ආරම්භයක්වූ බවය.
ඉදිරි තරගවලදී තම අපේක්ෂාව ඉදිරිපෙළ පිතිකරුවන් ලෙස පළපුරුදු ජ්‍යෙෂ්ටයනට වැඩි අවස්ථාවක් දීම යැයි කී ශානක අතිරේක ක්‍රීඩකයන් කිහිපදෙනෙකුටද මීළඟ තරගවලදී ක්‍රීඩා කිරීමට අවස්ථාව උදාවනු ඇතැයිද කීය.
තම අපේක්ෂාව අවසාන පූර්ව තරගයට සුදුසුකම් ලබා අවසාන තරගයට සහභාගිවීම යැයිද දසුන් ශානක පැවසීය.
බන්දුල මොල්ලිගොඩ
