වසරක ජාත්‍යන්තර තරග තහනමකට මුහුණ දී සිටි කුසල් මෙන්ඩිස්, ධනුෂ්ක ගුණතිලක සහ නිරෝෂන් දික්වැල්ල යන ක්‍රීඩකයින්ට එරෙහිව පනවා තිබූ තහනම වහාම ක්‍රියාත්මක වන පරිදි ඉවත් කිරීමට අද (07 දා) රැස්වූ ශ්‍රී ලංකා ක්‍රිකට් ආයතන විධායක සභාව තීරණය කළේය.
ඉකුත්දා නිමාවට පත් වුණු ලංකා ප්‍රිමියර් ලීග් තරගාවලියට ක්‍රීඩා කිරීමෙන් අනතුරුව තමන්ට එරෙහිව පනවා තිබෙන තහනම ඉවත් කරන මෙන් මොවුන් තිදෙනා විසින් සිදුකරන ලද ඉල්ලීමකට අනුව විධායක කමිටුව විසින් ඉහත තීරණය ගනු ලැබීය.
මෙම ඉල්ලීමට ප්‍රතිචාර දැක්වීමේදී තරග තහනමට ලක්ව සිටි කාලයේදී ඔවුන් වෙත උපදේශන ලබා දුන් වෛද්‍යවරයාගෙන්ද වාර්තාවක් කැඳවීමටද ශ්‍රී ලංකා ක්‍රිකට් විධායක කමිටුව පියවර ගනු ලැබූ අතර ඔවුන් තිදෙනාට එරෙහිව වූ තහනම ලිහිල් කිරීමේදී එම වාර්තාවේ කරුණුද සැලකිල්ලට ගනු ලැබීය.
කෙසේ වෙතත් අද ඉවත් කෙරුණු තහනම තවත් වසර දෙකක කාලයක් සඳහා අත්හිටුවනු ලබන අතර, එම කාලය තුළ යළිත් මොවුන් තිදෙනාගේ හැසිරීම ශ්‍රී ලංකා ක්‍රිකට් ආයතනය විසින් දැඩි ලෙස නිරීක්ෂණය කරනු ඇත.
මෙම තීරණයත් සමග, මොවුන් තිදෙනාට දේශීය ක්‍රිකට් ක්‍රීඩා කිරීමට හැකි වන අතර අනිවාර්ය යෝග්‍යතා ප්‍රමිතීන්ට අනුකූලව ජාතික තේරීම් සඳහා ද ඉදිරිපත්වීමේ හැකියාව පවතිනු ඇත.
