අන්තර්ජාතික ක්‍රිකට් සභාවේ මෙහෙයවීමෙන් පැවැත්වෙන අවු. 19න් පහළ ලෝක කුසලාන ක්‍රිකට් තරගාවලියේ අයර්ලන්තයට එරෙහිව වූ පුහුණු තරගයෙන් ලකුණු 128ක ජයක් ලබා ගත් දුනිත් වෙල්ලාලගේගේ නායකත්වයෙන් යුතු ශ්‍රී ලංකා යොවුන් කණ්ඩායම තරගාවලියට ජයග්‍රාහී ප්‍රවේශයක් අද (11 දා) ලබාගත්තේය.
ගයානාහි පැවැති මෙම තරගයේදී පළමුව පන්දුවට පහරදුන් ශ්‍රී ලංකාව නියමිත පන්දුවාර 50 අවසානයේ දී කඩුලු 7ක් දැවී ලකුණු 233ක් ලබාගැනීමට සමත්වද්දී ඊට පිළිතුරු ලෙස අයර්ලන්ත පිලට රැස් කරගත හැකිවූයේ පන්දුවාර 34.1 කදී සියලු දෙනා දැවී ලකුණු 105 ක් පමණි.
ශ්‍රී ලංකාව වෙනුවෙන් ෂෙවෝන් ඩැනියල් නොදැවී ලකුණු 75 ක් ලබාගෙන දස්කම් දක්වද්දී, රනුද සෝමරත්න සහ පවන් පතිරාජ පිළිවෙළින් ලකුණු 33ක් සහ ලකුණු 25ක් ලබා ගැනීමට සමත්වූහ.

ශ්‍රී ලංකාව වෙනුවෙන් ඉනිම ඇරැඹි චමිඳු වික්‍රමසිංහ සහ ශෙවෝන් ඩැනියල් පලමු කඩුල්ල වෙනුවෙන් ලකුණු 33ක  සබඳතාවක් පැවැත්වූහ.

මැද පෙළින් පන්දුවට පහර දුන් ශ්‍රී ලංකා මැදපෙළ පිතිකරුවන් සියලුම දෙනාම මේ තරගයේ දී ලකුණු අතරට පිවිසීමට සමත්වීම කැපී පෙනෙන සිදුවීමක් විය.

සෙසු ක්‍රීඩකයින්ටද පන්දුවට පහරදීමේ අවස්ථාව සලසාලමින් පන්දු 72කදී ලකුණු 75 ක් ලබාගෙන සිටි ශෙවෝන් පිටියෙන් ඉවත්ව ගිය අතර ඒ වන විටත් එම ඉනිමට හතරේ පහර 8ක් සහ එක් හයේ පහරක් ඇතුළත්ව තිබිණ.

මේ තරගයේ දී ශ්‍රී ලංකාවේ දැවී ගිය කඩුලු 7න් තුනක්ම දුවද්දී දැවී යාම්වීම කණගාටුුවට කරුණකි. .

පිළිතුරු ඉනිම දියත් කළ අයර්ලන්ත පිතිකරුවන් අතරින් තරමක් හෝ අභියෝගයක් එල්ල කළේ කඩුලු රකින පිතිකරු ජොෂුවා කොක්ස් වන අතර ඔහු පන්දු 86ක් සඳහා මුහුණ දෙමින් 4 පහර 3ක් සමඟ නොදැවී ලකුණු 44 ක් රැස් කර ගත්තේය. ඒ හැරෙන්නට ඔවුන්ගේ අනෙක් කිසිඳු පිතිකරුවෙක් හට ලකුණු 11 සීමාව පසුකිරීමට ශ්‍රී ලංකා පන්දු යවන්නන් අවස්ථාවක් ලබා නොදුන්හ.
වමතින් දඟපන්දු යවන වනුජ සහන් ලකුණු 5කට කඩුලු 3ක් දවාගෙන ශ්‍රී ලංකාව වෙනුවෙන් වැඩිම කඩුලු දවාගත් පන්දු යවන්නා බවට පත්වෙද්දී, චමිඳු, රවීන් ද සිල්වා සහ මතීෂ පතිරණ අතරේ කඩුලු 2ක බැගින් දවාගනු ලැබූහ.
පන්දු යැවීමේදී ශ්‍රී ලංකා පන්දු යවන්නන් අතින් අතිරේක ලකුණු 22 ක් පිරිනමා තිබුණු අතර ඉන් 19 ක්ම වයිඩ් පන්දු ලෙසින් සටහන්ව තිබේ.

ශ්‍රී ලංකාව සහභාගී වන දෙවන සහ අවසන් පුහුණු තරගය මේ මස 12 වැනිදා උගන්ඩාවට එාරහිව පැවැත්වෙනු ඇත.

ලකුණු සාරාංශය

ශ්‍රී ලංකා යොවුන් පිල පන්දුවාර 50දී කඩුලු  7 ට ලකුණු  – 233 යි (ශෙවෝන් ඩැනියල් 75*, රනුද සෝමරත්න 33, පවන් පතිරාජ 25, නේදන මැක්ගර් 20/2)

අයර්ලන්ත යොවුන් පිල පන්දුවාර 34.1 කදී ලකුණු 105 යි (ජොෂුවා කොක්ස් 44*, වනුජ සහන් 05/3චමිඳු වික්‍රමසිංහ 08/2, රවීන් ද සිල්වා 16/2, මතීෂ පතිරණ 16/2)