ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන අන්තර් සමාජ නැගී එන කණ්ඩායම් අතර තරගාවලියේ අවසන් පූර්ව තරග වටයට සුදුසුකම් ලබාගැනීමට සෙබස්තියනයිට්ස් සහ කෝල්ට්ස් ක්‍රීඩා සමාජ සමත්වූහ.

‘ඒ’ කාණ්ඩය යටතේ තරග වැදුණු සෙබස්තියනයිට්ස් ක්‍රීඩා සමාජ පළමු වටයේදී සහභාගිවූ තරග 6 න් 5 ක් ජය වාර්තා කොටද ‘ඩී’ කාණ්ඩය යටතේ තරග වැදුණු කෝල්ට්ස් ක්‍රීඩා සමාජ තරග 6 න් 5 ක් ජය ගනිමින් අපරාජිතව අවසන් කණ්ඩායම් 4 අතර තරග වටයට සුදුසුකම් ලබා සිටිති.

මෙම කණ්ඩායම් අතර පැවැත්වෙන අවසන් පූර්ව තරගය අප්‍රේල් 08 වැනිදා සිට 10 වැනිදා දක්වා කොළඹ පී. සරා ක්‍රීඩාංගණයේදී පැවැත්වෙනු ඇත. ‘බී’ කාණ්ඩයෙන් නිගම්බු කණ්ඩායමත් ‘සී’ කාණ්ඩයේ ටැමිල් යුනියන් කණ්ඩායමත් පෙරමුණ ගනිමින් පෙරමුණට පැමිණෙමින් පළමු අවසන් පූර්ව තරගය සඳහා සුදුසුකම් ලබාගත් අතර එහිදී මීගමුව පරදවා අවසන් මහ තරග වරම දිනා ගැනීමට ටැමිල් යුනියන් පිල සමත්ව සිටියි. ඒ අනුව ඉදිරි සති අන්තයේ පැවැත්වීමට නියමිත සෙබස්තියනයිට්ස් සහ කෝල්ට්ස් ක්‍රීඩා සමාජය අතර සටනේ ජයග්‍රාහකයින් ශූරතා කුසලාන වෙනුවෙන් වූ අවසන් මහ තරගයේදී එදිරිවාදීන් බවට පත්වනු ඇත.