ලෝක ශූරතා ටෙස්ට් තරගාවලියට අයත් බංග්ලාදේශයට ඒරෙහි තරග 2 කින් සමන්විත ටෙස්ට් තරගාවලියට සහභාගිවීම සඳහා ශ්‍රී ලංකා කණ්ඩායම මැයි 08 වැනිදා බංග්ලාදේශය බලා පිටත්ව ගියේය.

මෙම සංචාරය සඳහා ක්‍රීඩකයින් 18 දෙනෙකුගෙන් යුත් කණ්ඩායමක් නම් කර සිටියද නායක දිමුත් කරුණාරත්න සහ තුන් ඉරියව් ක්‍රීඩක චාමික කරුණාරත්න මේ වන විට විදෙස් ගතව සිටින බැවින් ක්‍රීඩකයින් 16 දෙනෙකු සමන්විත විය. දිමුත් කරුණාරත්න මේ වන විටත් ඒංගලන්ත ප්‍රාන්ත ක්‍රිකට් තරගාවලිය නියෝජනය කරන අතර චාමික කරුණරත්න ඉන්දීය ප්‍රිමියර් ලීග් තරගාවලිය නියෝජනය කිරීම සදහා පිටව ගොස් සිටියි. කෙසේ වෙතත් ඔවුන් දෙදෙනාම ලබන සඳුදා (09 වැනිදා) ශ්‍රී ලංකා කණ්ඩායම සමඟින් ඒකතුවීමට නියමිතව ඇත.

ශ්‍රී ලංකා කණ්ඩායමේ පුහුණුකරු තනතුරට පත් ක්‍රිස් සිල්වර්වුඩ් මහතා මෙන්ම සහාය පුහුණුකරු නවීඩ් නවාස් මහතා පුහුණකරු තනතුරට පත්වීමෙන් පසු ශ්‍රී ලංකා කණ්ඩායම සහභාගිවන පළමු තරගාවලිය වන්නේ ලබන 15 වැනිදා චැටෝග්‍රෑම්හි ආරම්භ වන ටෙස්ට් තරගාවලිය වේ. 19 වැනිදා දක්වා පැවැත්වෙන පළමු ටෙස්ට් තරගයෙන් අනතුරුව මැයි 23 වැනිදා සිට 29 වැනිදා දක්ව දෙවැනි ටෙස්ට් තරගය ඩකාහි පැවැත්වෙනු ඇත.

ලෝක ටෙස්ට් ශූරතාවලිය යටතේ මේ දක්වා තරග 4 කට ක්‍රීඩා කර ඇති ශ්‍රී ලංකා කන්ඩායම ඉන් තරග 2 ක් ජයගෙන තරග 2 ක් පරාජයට පත්ව ප්‍රසාද ලකුණ 24 ක් ලබා ලකුණු සටහනේ 5 වැනි ස්ථානයේ පසුවන්නේය.