ක්‍රීඩකයින් 20 දෙනෙකුගෙන් යුත් ආසියානු කුසලාන සංචිතයට නම් කරන ලද වේග පන්දු යවන දුෂ්මන්ත චමීර, පුහුණුවීම් අතරතුර වම් පාදයේ ආබාධයකට ලක්ව ඇති බැවින් ඔහුට ආසියානු කුසලාන තරගාවලියට සහභාගිවීමේ අවස්ථාව මඟ හැරෙනු ඇත.
ආසියානු කුසලාන තරගාවලිය සඳහා නම් කර ඇති සංචිතයට අතිරේක ක්‍රීඩකයකු ලෙසින් ලසිත් මාලිංගගේ ඉරියව්වට සමාන ඉරියවෙන් පන්දු යවන නුවන් තුෂාරව එක් කිරීමට තේරීම් කමිටුව පියවර ගෙන තිබේ.
කෙසේ වෙතත් අදාළ තරග සංචාරය සඳහා නම් කරන ලද ක්‍රීඩකයින් 20 දෙනෙකුගෙන් යුත් සංචිතයෙන් ක්‍රීඩකයින් 17 දෙනෙකු පමණක් ලබන 24 වැනිදා සංචාරය සඳහා පිටත්ව යනු ඇත. දිනේෂ් චන්දිමාල්, නුවනිඳු ප්‍රනාන්දු සහ නුවන් තුෂාර ආසියානු කුසලාන තරගාවලිය සඳහා වන සංචිතයට ඇතුළත් වුවත් ඔවුන් අතිරේක ක්‍රීඩකයින් ලෙස කණ්ඩායම සමඟ ගමන් නොකරනු ඇත. මේ වන විටත් නුවන් තුෂාරගේ නම ක්‍රීඩා අමාත්‍යවරයාගේ අනුමැතිය සඳහා ක්‍රීඩා අමාත්‍යාංශය වෙත ඉදිරිපත් කර ඇත.
ආසියානු කුසලාන සඳහා පිටත්ව යන ක්‍රීඩකයින් 17 දෙනා මෙසේය – දසුන් ශානක (නායක), චරිත් අසලංක (උප නායක), ධනුෂ්ක ගුණතිලක, පැතුම් නිස්සංක, කුසල් මෙන්ඩිස්, භානුක රාජපක්ෂ, අෂේන් බණ්ඩාර, ධනංජය ද සිල්වා, වනිඳු හසරංග, මහීෂ් තීක්ෂණ, ජෙෆ්රි වැන්ඩර්සි, ප්‍රවීන් ජයවික්‍රම, චාමික කරුණාරත්න, ඩිල්ෂාන් මදුශංක, මතීෂ පතිරණ, අසිත ප්‍රනාන්දු සහ ප්‍රමොද් මදුශාන්.
