ඔස්ට්‍රේලියාවේ පැවැති ලෝක කුසලාන තරගාවලිය අතරතුර ක්‍රීඩක ගිවිසුමට අදාළ වගන්ති උල්ලංඝනය කිරීම සම්බන්ධයෙන් ශ්‍රී ලංකා ක්‍රිකට් ආයතනය විසින් පත් කළ ත්‍රිපුද්ගල පරීක්ෂණ කමිටුව විසින් සිදු කළ විනය පරීක්ෂණයේදී තුන් ඉරියව් ක්‍රීඩක චාමික කරුණාරත්නට එරෙහිව තිබූ සියලුම චෝදනාවලට ඔහු විසින් වරද පිළිගැනීම හේතුවෙන් ඒ පිළිබඳව සිය නිර්දේශ ඇතුළත් පරීක්ෂණ වාර්තාව එම කමිටුව විසින් ශ්‍රී ලංකා ක්‍රිකට් ආයතනය වෙත ලබා දී ඇත.
හිටපු මහාධිකරණ විනිසුරුවරයකු වන සිසිර රත්නායක මහතාගේ ප්‍රධානත්වයෙන් යුත් එම ත්‍රිපුද්ගල කමිටුවට නීතිඥයින් වන අසේල රැකව සහ නිරෝෂණ පෙරේරා යන මහත්වරු ඇතුළත්ව සිටියහ. චාමික විසින් සිදුකර ඇති විනය කඩකිරීම්වල බරපතලකම සැලකිල්ලට ගනිමින් යළිත් වරක් විනය කඩ නොකරන ලෙස තරයේ අවවාද කරන ලෙසත් හා ඔහුගේ ක්‍රීඩා දිවියට බලපෑමක් නොවන ආකාරයේ දඬුවමක් ඔහු වෙත ලබා දෙන ලෙස එම ත්‍රිපුද්ගල කමිටුව ශ්‍රී ලංකා ක්‍රිකට් විධායක කමිටුව වෙත නිර්දේශ කර තිබේ.
ඒ සියල්ල සැලකිල්ලට ගනිමින්, ශ්‍රී ලංකා ක්‍රිකට් විධායක කමිටුව විසින් චාමිකට එරෙහිව සියලුම ආකාරයේ ක්‍රිකට් තරග සඳහා වසරක තහනමක් පැනවීමටත්, එම තහනම වසරක කාලයකට අත්හිටුවීමටත් පියවර ගෙන තිබේ.
එම අත්හිටුවූ තරග තහනමට අමතරව ඔහුට ඇමරිකානු ඩොලර් 5000 ක දඩයක් නියම කිරීමටද ශ්‍රී ලංකා ක්‍රිකට් විධායක කමිටුව පියවර ගෙන තිබේ. එය වර්තමාන රුපියල් සමඟ සංසන්දනය කිරීමේදී දළ වශයෙන් ශ්‍රී ලංකා මුදලින් රුපියල් ලක්ෂ දහඅටහමාරකට ආසන්න මුදලක් වනු ඇත.
