ශ්‍රී ලංකා ක්‍රිකට් ආයතනයේ සංවිධානයෙන් පවත්වනු ලබන කාන්තා ක්‍රිකට් සුපිරි කණ්ඩායම් 4 අතර තරගාවලිය ආරම්භ කරමින් අද (16 දා) පැවැති තරගයේදී බ්ලූස් පිලට එරෙහිව ලකුණු 124 ක දැවැන්ත තරග ජයක් වාර්තා කරමින් තරගාවලියට සාර්ථක ප්‍රවේශයක් ලබා ගැනීමට ග්‍රේස් කණ්ඩායම සමත්විය.

සත්‍යා සංදීපනීගේ නායකත්වයෙන් යුතු බ්ලූස් කණ්ඩායම කාසියේ වාසියත් සමඟ පළමුව පන්දුවට පහර දීමේ අවස්ථාව ග්‍රේස් පිලට ලබා දුන් අතර එහිදී නියමිත පන්දුවාර 50 අවසනදී කඩුලු 8 කට ලකුණු 201 ක් ලබා ගැනීමට ඔවුහු සමත්වූහ.

පිළිතුරු ඉනිම ක්‍රීඩා කිරීමේදී ඉනෝෂි ප්‍රනාන්දු සහ ඉනෝකා රණවීර කඩුලු 3 බැගින් දවා ලමින් බ්ලූස් ඉනිම විනාශ කර දැමීමට සමත්වූහ. එම දක්ෂ පන්දු යැවීම් හේතුවෙන් බ්ලූස් ඉනිම පන්දුවාර 36.3 කදී ලකුණු 77 කට සීමා විය.

ග්‍රේස් පිල වෙනුවෙන් අංක 4 පිතිකාරිණිය ලෙසින් පිටියට පිවිසි හංසිමා කරුණාරත්න ලකුනු 36 ක් ලබා ගනිමින් එම ඉනිමේ වැඩිම ලකුණු ලාභිණිය බවට පත් වද්දී සෑම කඩුල්ලකටම සාර්ථක සම්බන්ධතා පැවැත්වීමට හැකිවීම නිසා ලකුණු 200 සීමාවෙන් ඔබ්බට ග්‍රේස් ලකුනු සංඛ්‍යාව රැගෙන යෑමට අවස්ථාව උදාවිය. ඇයට අමතරව කඩුලු රකිණ්නිය වන කෞෂානි නුත්‍යාංගනා ලකුණු 35 ක් ලබා ගැනීමට සමත්වූාය.

ග්‍රේස් පන්දුවාර 50 කදී කඩුලු 8 ට ලකුණු 201 යි – (හංසිමා කරුණාරත්න 36, කෞෂානි නුත්‍යාංගනා 35, නිලක්ෂණා සඳමිනී 34, තරුෂි රාජකරුණා 31/2, සත්‍යා සංදීපන් 39/2, හෂිනි ලියනගේ 51/2)

බ්ලූස් පන්දුවාර 36.3 කදී සියලු දෙනා දැවී ලකුණු 77 යි – (සතයා සංදීපනී 25, ඉනෝෂි ප්‍රනාන්දු 13/3, ඉනෝකා රණවීර 17/3)