අනිද්දා (19 දා) ආරම්භ වන නැෂනල් සුපර් ලීග් සිව්දින ක්රිකට් තරගාවලිය සඳහා ප්රකාශයට පත් කරන ලද පුහුණු කාර්යය මණ්ඩලයට පිට පිටම තෙවතාවක් ලංකා ප්රිමියර් ලීග් ශූරතාව ජැෆ්නා පිලට දිනා දුන් තිළිණ කණ්ඩම්බිවද ඇතුළත් කර තිබේ. ඒ අනුව ඔහුට මෙම තරගාවලියේදීද ජැෆ්නා කණ්ඩායමේ ප්රධාන පුහුණුකරු ධුරය ලබාදී තිබේ.
පළමු වතාවට පැවැති නැෂනල් සුපර් ලීග් සිව්දින තරගාවලියේදීද ජැෆ්නා පිලේ ප්රධාන පුහුණුකරු ලෙසින් කටයුතු කරන ලද කණ්ඩම්බි එම තරගාවලියේදී අනුශූරතාව දක්වා ජැෆ්නා පිල රැගෙන යෑමට සමත්වූවේය. කෙසේ වෙතත් එම තරග වාරයේ අවසන් මහ තරගයේ ඔවුන්ගේ ප්රතිවාදීන් වෙමින් ශූරතාව දිනා ගන්නා ලද කැන්ඩි කණ්ඩායමේ පුහුණුකරු ධුරය යළිත් මලින්ද වර්ණපුරට ලබාදීම විශේෂත්වයකි.
ඔහුට අමතරව කලම්බු කණ්ඩායමට රුවින් පීරිස්, ගෝල් කණ්ඩායමට රුවන් කල්පගේ සහ දඹුල්ල කණ්ඩායමට අවිශ්ක ගුණවර්ධනව ප්රධාන පුහුණුකරුවන් ලෙසින් නම් කර තිබේ. මේ අතර මෙවර තරගාවලිය සඳහා සහාය ප්රධාන පුහුණුකරුවන් තිදෙනෙකුද පත් කර තිබෙන අතර ඔවුන වන්නේ ධම්මික සුදර්ශන (ජැෆ්නා), උපුල් චන්දන (දඹුල්ල) සහ මනෝජ් අබේවික්රම (කැන්ඩි)ය.
