එක්දින ලෝක කුසලාන ක්‍රිකට් තරග ඉතිහාසයේ ශ්‍රී ලංකා පිතිකරුවකු වාර්තා කරන ලද වේගවත්ම ශතකයට හිමිකම් කීමට ශ්‍රී ලංකා කණ්ඩායමේ අංක 3 පිතිකරු කුසල් මෙන්ඩිස් අද (10 දා) සමත්වූවේය. ලෝක කුසලාන ක්‍රිකට් තරගාවලිය යටතේ පාකිස්තානයට එරෙහිව හයිද්‍රාබාද්හි රජීව් ගාන්ධි ක්‍රීඩාංගණයේ පැවැත්වෙන තරගයේදී පන්දු 65 කදී ශතකය සම්පූර්ණ කරමින් එම වාර්තාවට හිමිකම් කීමට මෙන්ඩිස් සමත්වූවේය.

මීට පෙර එම වාර්තාවට හිමිකම් කියන ලද්දේ හිටපු නායක සුපිරි පිතිකරු කුමාර් සංගක්කාර වන අතර ඔහු 2015 වසරේ පැවැති ලෝක කුසලාන තරගාවලියේදී එංගලන්තයට එරෙහිව පන්දු 70 කදී ශතකයක් වාර්තා කරමින් එම වාර්තාවට මීට පෙර හිමිකම් කීවේය.

කුසල් අද දිනයේදී පන්දු 71 කට මුහුණ දෙමින් ලකුණු 122 ක් ලබා ගත්තේ තම ඉනිමට හයේ පහරක් 6 ක් සහ හතරේ පහර 16 ක්ද එල්ල කරමිනි. එමෙන්ම අද මෙන්ඩිස් වාර්තා කරන ලද්දේ පාකිස්තානු කණ්ඩායමට එරෙහිව ලෝක කුසලාන තරගාවලියකදී ශ්‍රී ලංකා පිතිකරුවකු වාර්තා කරන ලද පළමු ශතකය විය. මීට පෙර පාකිස්තානයට එරෙහිව ශ්‍රී ලංකා පිතිකරුවකු රැස් කරන  ලද ඉහළම ලකුණු සංඛ්‍යාව බවට පත්ව තිබුණේ 1987 ලෝක කුසලාන ක්‍රිකට් තරගාවලියේදී රොෂාන් මහානාම විසින් වාර්තා කරන ලද ලකුණු 89 විය.

කුසල් මෙන්ඩිස් අද රැස් කරන ශතකය ලෝක කුසලාන ඉතිහාසයේ පිතිකරුවකු වාර්තා කරන ලද වේගවත්ම ශතක අතර 6 වැනි ස්ථානයට  පත්විය. මීට පෙර ඒඩ්න් මාක්‍රම් (49), කෙවින් ඕබ්‍රියන් (50), ග්ලෙන් මැක්ස්වෙල් (51), ඒ.බී. ඩිවිලියර්ස් (52), එයන් මෝගන් (57) මෙන්ඩිස්ට පෙර අඩුම පන්දු සංඛ්‍යාවක් වැය කරමින් ශතකය රැස් කරන ලද පිතිකරුවෝ බවට පත්ව සිටිති. කුසල් අද රැස් කරන ලද ශතකයට පෙර දකුණු අප්‍රිකාවට එරෙහිව පැවැති තරගයේදීද පන්දු 42 කදී ලකුණු 76 ක් රැස් කිරීමට සමත්වූවේය.