චීනයේ හංජෝ නුවර පැවැති ආසියානු ක්‍රීඩා තරගාවලියේ කාන්තා ක්‍රිකට් තරග ඉසව්වේ රිදී පදක්කම දිනාගැනීමට හැකිවීම පිළිබඳව තමන් ඇතුළු කණ්ඩායම දැඩි සතුටට පත්ව සිටින බව ශ්‍රී ලංකා කාන්තා කණ්ඩායමේ නායිකාව වන චමරි අතපත්තු සඳහන් කර සිටියාය.
ඉකුත් බ්‍රහස්පතින්දා රාත්‍රියේදී කටුනායක ගුවන් තොටුපළින් ශ්‍රී ලංකාවට පැමිණි අවස්ථාවේදී ශ්‍රී ලංකා නායිකාව එසේ සදහන් කර සිටියාය.
“ඇත්තටම මේ ජයග්‍රහණය පිළිබඳව මට ගොඩක් සතුටුයි. අපි කණ්ඩායමක් විදියට මේ ගැන ගොඩක් සතුටට පත් වෙනවා. මේ වසර අපිට ඉතා හොඳ වසරක්“ යැයි අතපත්තු සඳහන් කර සිටියාය.
“අපි එංගලන්තය පරාජය කොට විස්සයි-20 තරගාවලිය ජයග්‍රහණය කළා. ඊට අමතරව බංග්ලාදේශය සහ නවසීලන්තයත් අපිට පරාජය කිරීමට හැකියාව ලැබුණා. අපේ බලාපොරොත්තුව ලෝක කුසලාන තරගාවලිය ජය ගැනීමටයි. අපේ පන්දු යැවිම සහ පන්දු රැකීම මේ වන විට ඉතා හොද මට්ටමක සිටිනවා. පිතිහරඹයත් දියුණු කරලා හදා ගත්තොත් අපිට ලෝක කුසලාන දිනා ගන්න හැකියාව තියෙනවා‘ යැයි අතපත්තු සදහන් කර සිටියාය.
ආසියානු ක්‍රීඩා තරගාවලියේ අවසන් මහ තරගයේදී ශ්‍රී ලංකාවේ ප්‍රතිවාදීන් බවට පත් වුණු ඉන්දීය කාන්තා පිල හමුවේ ලද පරාජය හේතුවෙන් ශ්‍රී ලංකා කාන්තා කණ්ඩායමට අනුශූරතාව හෙවත් රිදී පදක්කමෙන් සෑහීමට පත්වීමට සිදුවූවාය.
