slc
logo
Home   |    News
ජූනි 11, 2024
කාන්තා ක්‍රිකට් දියුණු වෙන්නේ ක්‍රීඩිකාවන්ගේ කැපවීම නිසයි – චමරි අතපත්තු

sinhala editor

කාන්තා ක්‍රිකට් ක්‍රීඩාව ක්‍රමයෙන් දියුණු තත්ත්වයකට ගෙන ඒමට හැකි වූයේ සියලු දෙනාගේ කැපවීම හේතුවෙන් බව ශ්‍රී ලංකා ක්‍රිකට් නායිකා චමරි අතපත්තු පැවැසූවාය. පසුගිය වසර එකහමාරක කාලය තුලදී ප්‍රබල කණ්ඩායම්වන එංගලන්තය, නවසීලන්තය, දකුණු අප්‍රිකාව ඔවුන්ගේ භූමියේදීම පරාජය කරමින් ඉදිරියට පැමැණීමට හැකි වුයේ ක්‍රීඩිකාවන්ගේ එම කැපවීමේ ප්‍රතිඵලය නිසා බව ද ඇය සඳහන් කළාය.

ශ්‍රී ලංකා ක්‍රිකට් නායිකා චමරි අතපත්තු වසරේ අයිසීසී කාන්තා එක්දින ක්‍රිකට් ක්‍රීඩිකාව ලෙස ජාත්‍යන්තර ක්‍රිකට් කවුන්සිලයේ සම්මානයට ද පාත්‍ර වූවාය. ලොව ජාත්‍යන්තර පිටියේ සියලුම ක්‍රිකට් ක්‍රීඩිකාවන් අතුරින් චමරි අතපත්තු එක්දින තරගවලදී දක්වන ලද සුවිශේෂී දක්ෂතා වෙනුවෙන් මෙම උසස්ම සම්මානයෙන් ඇය පිදුම් ලැබුවාය.

ශ්‍රී ලංකා ක්‍රිකට් ආයතනය විසින් ශ්‍රී ලංකා කාන්තා කණ්ඩායමේ අනුග්‍රාහකයා හඳුන්වා දීම වෙනුවෙන් ඊයේ (10) කොළඹදී පැවති මාධ්‍ය හමුවකදී චමරි අතපතක්තු අදහස් දැක්වූවාය. මෙරටට පැමිණ සිටින බටහිර ඉන්දීය කොදෙව් කාන්තා ජාතික කණ්ඩායම හා ශ්‍රී ලංකා කාන්තා පිල අතර, එක්දින තරග 3ක් හා විස්සයි20 තරග 3ක් මේ 15 වැනිදා සිට හම්බන්තොටදී පැවැත්වීමට කටයුතු යොදා ඇත.

“බටහිර ඉන්දීය කොදෙව් පිල සමඟ තරගාවලිය ඉතා හොදින් අවසන් කිරීමට සූදානම්. කොදෙව් පිල පසුගිය කාලයේ ඉතා හොදින් දස්කම් දක්වා තිබෙනවා. කාන්තා ලෝක කුසලානයට පෙර අපට තරග 6ක් තිබෙනවා. එයින් 5ක් දිනා ගත්තොත් සෘජුවම ලෝක කුසලාන තරගාවලියට සුදුසුකම් ලබන්න පුඵවන්. අපට හොඳ යොවුන් ක්‍රීඩිකාවන් ඉන්නවා. විශ්මි ගුණරත්න, කවීෂා දිල්හාරි, හර්ෂිතා, නිලක්ෂි වගේ අය පැහැදිලි අනාගතයක් ඇති ක්‍රීඩිකාවන්. තරග දිනවිය හැකි පළපුරුදු ක්‍රීඩිකාවන් අප සතුයි. අප මුහුණ දෙන හැම තරගයක්ම අලුත් දවසක්“ චමරි පැවැසූවාය.

“අපේ කාන්තා ටීම් එක ඇතුලේ කාටවත් නෙගිටිව් දේවල් කතා කරන්න තහනම්. ඒක ක්‍රීඩිකාවන්ට පමණක් නොවෙයි. පුහුණුකරුවන්ගේ ඉදලා සියලු දෙනාටම පොදුයි. කණ්ඩායම තුළ අසුබවාදී දේ කතා නොකිරීමත් සාර්ථකත්වයට හේතුවක්“ චමරි අතපත්තු පැවැසූවාය.

“පසුගිය විස්සයි20 ලෝක කුසලානයේදී අපට අවසන් පූර්ව වටයට එන්න බැරි වුණා. මෙවර විස්සයි20 ලෝක කුසලානයට පෙර අපට තරග 12ක් තිබෙනවා. කොදෙව් සමඟ තරග 3ක්, අයර්ලන්තය සමඟ තරග 2ක් හා ආසියා කුසලානයේදී තරග 7ක් ලෝක කුසලානයට පෙර තියෙනවා. බංග්ලාදේශයේ ලෝක කුසලාන තරගාවලිය පැවැත්වෙන නිසා දඟ පන්දුවට තරමක් වාසි ලැබෙයි. අපේ දඟ පන්දු යැවීමේ අංශය හොදයි. පිතිකරණය තව ටිකක් දියුණු මට්ටමට ගෙන ආ යුතුයි“ ශ්‍රී ලංකා නායිකාව සඳහන් කළාය.

“ක්‍රිකට් ක්‍රීඩාව ඉතා අවිනිශ්චිත ක්‍රීඩාවක්. තරග පැවැත්වෙන ඇතැම් දිනවලදී කණ්ඩායමට අවශ්‍ය දේ වගේම අපි බලාපොරොත්තු වන දේ සිදු වන්නේ නෑ. ශ්‍රී ලංකාව ක්‍රිකට් ලෝක කුසලාන දිනූ රටක්. ඒ නිසා ශක්තිමත් මානසිකත්වයක් ගොඩ නැඟී තිබෙනවා. දැන් අමෙරිකාවේ විස්සයි20 ලෝක කුසලානයට සහභාගීවී සිටින ශ්‍රී ලංකා ක්‍රිකට් පිලට ඉදිරි තරග ජයග්‍රහණය කිරීම වෙනුවෙන් සියලු දෙනා සුබ පැතුම් එක්කළ යුතුයි. ඉදිරි තරග ක්‍රීඩා කරන විලාශය අනුව ඉදිරියට යම තීරණය වෙනවා “ චමරි සඳහන් කළාය.

මෙම මාධ්‍ය හමුවට එක්වූ ශ්‍රී ලංකා කාන්තා ක්‍රිකට් පුහුණුකරු රැමේෂ් රත්නායක මහතා පවැසූවේ කණ්ඩායමේ වෙනස්කම් ඉතා ක්‍රමානුකූලව සිදුවන බවයි.“ අපි නිතරම අලුත් ක්‍රීඩිකාවන්ට තැනක් දිය යුතුයි. ඒක හරිම පරිස්සමෙන් කළ යුතු දෙයක්. එංගලන්ත සංචාරයට ක්‍රීඩිකාවන් 17ක් ගියා. ඒ සියලු දෙනා ක්‍රීඩා කළා. එංගලන්ත සංචාරයේදීත් ගිය ක්‍රීඩිකාවන් සියලු දෙනාට තැනක් දුන්නා. මම නම් සඳහන් කරන්නේ නෑ. ඉතාම දක්ෂ තරුණ ක්‍රීඩිකාවන් අපට සිටිනවා. ඒ සියලු දෙනාට තැනක් දීම අපේ යුතුකමක්. අනාගතය බලලා ක්‍රීඩිකාවන් ආදේශ කරනවා“ රත්නායක මහතා පැවැසීය.

Active filters

Recent Posts

  • සී.සී.සී. අපරාජිතව පෙරමුණේ
    ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන අන්තර් සමාජ සීමිත ඕවර් ක්‍රිකට් තරගාවලියේ අද (16) නිමාවූ සීසීසී හා මුවර්ස් ක්‍රීඩා සමාජය අතර බ්ලූම්ෆීල්ඩ් ක්‍රීඩාංගණයේ පැවැති තරගයේදී ලකුණු 74ක ජයක් […]
  • මැතිව්ස් ජනතාව වෙත කණගාටුව පළ කරයි
    ලෝක කුසලාන විස්සයි 20 ක්‍රිකට් තරගාවලියේ මූලික වටයේදී ශ්‍රී ලංකා කණ්ඩායම ඉවත් වීමට සිදුවීම පිළිබඳව කණ්ඩායම වෙනුවෙන් තමා ශ්‍රී ලංකාවාසීනට කණගාටුව පළ කරන බව හිටපු නායක ඇන්ජලෝ මැතිව්ස් […]
  • ශ්‍රී ලංකා ක්‍රීඩිකාවෝ එක්දින තරගාවලියේ පෙරමුණ ගනිති
    ලබන වසරේ පැවැත්වෙන කාන්තා ලෝක කුසලාන තරගාවලියට සුදුසුකම් ලබා ගැනීම සදහා බටහිර ඉන්දීය කොදෙව් සහ ශ්‍රී ලංකා කණ්ඩායම් දෙකටම ඉතාමත් තීරණාත්මක තරගාවලියක් ලෙසින් අද (15 දා) හම්බන්තොටදී ආරම්භ […]
  • චමෝද් සඳරුගේ තුන් ඉරියව් දදක්ෂතා මේරියන්ස් පිලට ජය ගෙනෙයි
    මෙට්ලන්ඩ් පෙදෙසේ එන්.සී.සී. ක්‍රීඩාංගණයේ අද (14) පැවැති මේජර් අන්තර් සමාජ එක්දින සීමිත ඕවර ක්‍රිකට් තරගාවලියේ එන්.සී.සී. සහ චිලව් මේරියන්ස් අතර ක්‍රිකට් තරගයේදී චිලව් මේරියන්ස් කණ්ඩායමේ චමෝද් සඳරු ලකුණු […]
  • ඒස් කැපිටල් පිට පිට දෙවැනි ජය ලබයි
    ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන අන්තර් සමාජ සීමිත ඕවර් ක්‍රිකට් තරගාවලියේ ඒස් කැපිටල් ක්‍රීකට් සමාජය හා එස්එස්සී අතර, ශ්‍රී ලංකා යුද හමුදා යුධෝපකරණ බළකා ජාත්‍යන්තර ක්‍රිකට් ක්‍රීඩාංගණයේ […]

Pin It on Pinterest

LKR Sri Lankan rupee