සහජ දක්ෂතා ඇති සෑම ක්‍රිකට් ක්‍රීඩක ක්‍රීඩිකාවකටම ජාතික කණ්ඩායම නියෝජනය කිරීම සඳහා සමාන අවස්ථා ලබාදීමේ ශ්‍රී ලංකා ක්‍රිකට් “ජාතික සංවර්ධන ගමන් මඟ“ වැඩසටහන යටතේ ඉදි කිරීමට යෝජිත කළුතර දිස්ත්‍රික් ක්‍රිකට් ක්‍රීඩාංගණයේ පළමු අදියරේ ඉදි කිරීම් කටයුතු ශ්‍රී ලංකා ප්‍රජාතාන්ත්‍රික සමාජවාදී ජනරජයේ විධායක ජනාධිපති අති ගරු රනිල් වික්‍රමසිංහ මැතිතුමන්ගේ ආශිර්වාදයෙන්” සංචාරක, ඉඩම්, ක්‍රීඩා හා යෞවන කටයුතු අමාත්‍ය ගරු හරීන් ප්‍රනාන්දු මැතිතුමාගේ මඟපෙන්වීම යටතේ ධීවර කටයුතු රාජ්‍ය අමාත්‍ය ගරු පියල් නිශාන්ත මැතිතුමාගේ යෝජනාවකට අනුව ශ්‍රී ලංකා ක්‍රිකට් සභාපති ගරු ශම්මි සිල්වා මහතාගේ සහ විධායක කමිටුවේ ආරාධනයෙන් ශ්‍රී ලංකා ප්‍රජාතාන්ත්‍රික සමාජවාදී ජනරජයේ අග්‍රාමාත්‍ය ගරු දිනේෂ් ගුණවර්ධන මැතිතුමාගේ ප්‍රධානත්වයෙන් 2024 වසරේ ජූලි මස 27  වැනි සෙනසුරාදා දින පෙ.ව. 9.00 ට ආරම්භ කරන ලදී.

යෝජිත කළුතර දිස්ත්‍රික් ක්‍රිකට් ක්‍රීඩාංගණයේ පළමු අදියරේ ඉදිකිරීම් කටයුතු වල සිට ක්‍රීඩාංගණයේ ඉදි කිරීම් කටයුතු සම්පූර්ණ කිරීම දක්වා වන පූර්ණ වියදම ශ්‍රී  ලංකා ක්‍රිකට් ආයතනය විසින් දරණු ලබයි. මධ්‍ය තණතීරු 05 කින් සමන්විත මෙම ක්‍රීඩාංගණයේ ප්‍රධාන තණතීරුවේ සිට ක්‍රීඩාංගණය වටා මීටර 60 ක දුරින් හතරේ සීමාව එළීමේ හැකියාවෙන් යුක්ත වේ. මෙම ක්‍රීඩාංගණය ඉදි කිරීමෙන් පසුව  දිස්ත්‍රික්  සහ සියලුම පාසල් ක්‍රිකට් තරග පැවැත්වීමේ හැකියාව ලැබෙනු ඇත.

එමෙන්ම මෙම ක්‍රීඩාංගණ ඉදිකිරීමේ කටයුතු වලට සමගාමීව ශ්‍රී ලංකා ක්‍රිකට් ආයතනය විසින් කළුතර දිස්ත්‍රික්කයේ පාසල්  51 ක් සදහා කණිෂ්ඨ අංශයේ ක්‍රිකට් ක්‍රීඩා උපකරණ කට්ටල 59 ක් සහ පන්දු 1308 ක් ද, ජ්‍යෙෂ්ඨ කණ්ඩායම් සඳහා ක්‍රිකට් ක්‍රීඩා උපකරණ කට්ටල 32 ක් සහ පන්දු 384 ක් බෙදා දෙනු ලැබීය. මේ සදහා ශ්‍රී ලංකා ක්‍රිකට් ආයතනය විසින වැය කරන ලද මුදල රැපියල් මිලියන 27 ක් වේ.

මාධ්‍ය අංශය

ශ්‍රී ලංකා ක්‍රිකට්