පන්දුවාර විස්සයි-20 ලෝක කුසලාන ක්‍රිකට් තරගාවලියට සහභාගිව සිටින ශ්‍රී ලංකා කාන්තා ක්‍රිකට් කණ්ඩායම තරග වැදි පළමු ඇඟ උණුසුම් කිරීමේ තරගයෙන් බංග්ලාදේශ පිලට එරෙහිව පහසු ජයක් වාර්තා කර ගනිමින් තරගාවලියට ජයග්‍රාහී ප්‍රවේශයක් ලබා ගැනීමට සමත්විය. ලකුණු 33 ක ජයග්‍රහණයක් ලෙසින් සනිටුහන් වුණු මෙම තරගයේදී ශ්‍රී ලංකා පිලේ ක්‍රීඩිකාවන් තුන් ඉරියව්වෙන්ම දක්ෂතා දැක්වීම කැපී පෙනිණ.

තරගයේ පළමුව පන්දුවට පහර දුන් ශ්‍රී ලංකා කාන්තා පිල නියමිත පන්දුවාර 20 අවසනදී කඩුලු 7 කට ලකුණු 143 ක් රැස් කර ගැනීමට සමත්වූවේය. මෙහිදී පිත්තෙන් දස්කම් දැක්වූ හසිනි පෙරේරා ලකුණු 43 ක් සහ නිලක්ෂි ද සිල්වා ලකුණු 30 වශයෙන් රැස් කළහ. ඊට අමතරව හර්ෂිතා සමරවික්‍රම ලකුණු 29 ක් ලබා ගත්තාය.

පන්දුවාර 20 ක් ඇතුළතදී ලකුණු 144 ක ඉලක්කයක් ආරක්ෂා කර ගැනීමේ අභියෝගය සහිතව පිටියට පිවිසි ශ්‍රී ලංකා පන්දු යවන්නියෝ බංග්ලාදේශ කාන්තා පිල අසරණ කරන ලද්දේ නියමිත පන්දුවාර 20 අවසනදී කඩුලු 9 කට එම ඉනිම ලකුණු 110 කට නවතාලමිනි.

පන්දු යැවීමේදී කැපී පෙනුණු සුගන්දිකා කුමාරි කඩුලු ත්‍රිත්වයක් ලබා ගැනීමට සමත්වීම කැපී පෙනිණය. 14 වැනි පන්දුවාරය යැවීමට පැමිණි සුගන්දිකා පළමු පන්දුවේදී ෂොර්නා අක්ටර් (08, දෙවැනි පන්දුාවේදී රිටූ මෝනි (00) සහ තෙවැනි පන්දුවේදී රෙබෙයා ඛාන් (00) දවා ගනිමින් එම කඩුලු ත්‍රිත්වයට හිමිකම් කීවාය. මෙහිදී කඩුලු ත්‍රිත්වය ලබා ගැනීම වෙනුවෙන් කඩුලු රැකි අනුෂ්කා සංජීවනී ස්ටම්ප් කිරීමකට දායකත්වය ලබාදීම කැපී පෙනුණි.

එම පන්දුවාරය යැවීම පෙර ලකුණු 61 කට කඩුලු 4 ක් ලෙසින් කියැවුණු බංග්ලාදේශ ලකුණු පුවරුව එක වරම ලකුණු 61 කට කඩුලු 7 ක් ලෙස කියැවිණි. උදේශිකාට අමතරව ඉනෝෂි ප්‍රියදර්ශනී කඩුලු 2 ක් දවා ගත්තාය.

ශ්‍රී ලංකා කාන්තා කණ්ඩායම පන්දුවාර 20 කදී කඩුලු 7 ට ලකුණු 143 යි

හසිනි පෙරේරා 43, නිලක්ෂි ද සිල්වා 30, හර්ෂිතා සමරවික්‍රම 29, ෂොර්නා අක්ටර් 19/2

බංග්ලදේශ කාන්තා කණ්ඩායම පන්දුවාර 20 කදී කඩුලු 9 ට ලකුණු 110 යි

නිගර් සුල්තානා 30*, දීසා බිස්වාස් 25, සුගන්දිකා කුමාරි 08/3, ඉනෝෂි ප්‍රියදර්ශනී 11/2