හොංකොං සික්සස් ක්‍රිකට් තරගාවලියේ අද (2)පැවැති අර්ධ අවසන් පූර්ව වටයේ තරගය ජයගත් ශ්‍රී ලංකා කණ්ඩායම හෙට (3) පැවැත්වෙන අවසන් පූර්ව තරගයට සුදුසුකම් ලබා ගත්තේය. ශ්‍රී ලංකාව හෙට දෙවැනි අවසන් පූර්ව තරගයේදී බංග්ලාදේශය හමුවන අතර, පළමු අවසන් පූර්ව තරගයේදී ඔස්ට්‍රේලියාව හා පාකිස්තානය තරග වදිති.

මෙම අවසන් පූර්ව තරග දෙකෙන් ජය ගන්නා කණ්ඩායම් දෙක හෙට අවසන් මහා තරගයේදී මෙවර හොංකොං සික්සස් ක්‍රිකට් ශූරතාව වෙනුවෙන් සටන් බිමට පිවිසේ. එම අවසන් මහා තරගය හෙට පස්වරු 2.15ට හොංකොං මොන්ග් කොක් ක්‍රීඩාංගණයේදී පැවැත්වේ.

මෙම තරගාවලියේදී ශ්‍රී ලංකා කණ්ඩායම ‘ඩී‘ කාණ්ඩයෙන් මූලික වටයේ තරග සඳහා එක්වූ අතර, ඊයේ ඕමාන කණ්ඩායම කඩුලු 4කින් හා බංග්ලාදේශය ලකුණු 18කින් පරාජයට පත් කරමින් එම කාණ්ඩයේ පෙරමුණ ගත්තේය.

ශ්‍රී ලංකාව හා නේපාලය අතර අද පැවැති අර්ධ අවසන් පූර්ව වටයේ තරගයෙන් ලකුණු 40ක පහසු ජයක් ලැබීමට ශ්‍රී ලංකා ක්‍රීඩකයෝ සමත් වූහ.

කාසියේ වාසිය දිනාගත් නේපාලය මුලින් පන්දු රැකීමට තීරණය කළ හෙයින් ශ්‍රී ලංකා ක්‍රීඩකයෝ ඕවර් 6 අවසානයේ කඩුලු 2ක් දැවී ලකුණු 132ක් ලබාගත් අතර, පිළිතුරු ඉනිම ක්‍රීඩා කළ නේපාල සය සාමාජික කණ්ඩායම ඕවර් 5කදී සියලු දෙනා දැවී ලකුණු 83ක් ලබා ගත්තේය.

ආරම්භක පිතිකරු සඳුන් වීරක්කොඩි පන්දු 14කදී හයේ 5ක් හා හතරේ 4ක් සමඟ ලකුණු 50ක් ලබා සිටියදී පිටියෙන් ඉවත්ව ගිය අතර, තනුක දාබරේ පන්දු 9කදී හතරේ 3ක් සමඟ ලකුණු 18ක්, ළහිරු මධුසංඛ පන්දු 8කදී හයේ පහර 4ක් හා හතරේ 1ක් සමඟ නොදැවී ලකුණු 31ක් හා ළහිරු සමරකෝන් පන්දු 5කදී හයේ පහර 3ක් හා හතරේ පහරක් සමඟ ලකුණු 22ක් ලබා  ගත්හ.

පන්දු යැවීමේදී නොපාල පිතිකරුවන් අසරණ කළ  ළහිරු සමරකෝන් හා තරිඳු රත්නායක කඩුලු 2 බැගින් බිදහෙලා ගත්හ.