ආසියානු ක්රිකට් කවුන්සිලයේ සභාපතිවරයා වශයෙන් පත් ශ්රී ලංකා ක්රිකට් ආයතන සභාපති ශම්මි සිල්වා මහතා අද (06 වැනිදා) සිය ධුරයේ වැඩ රාජකාරි භාරගනු ලැබීය. ශම්මි සිල්වා මහතා එම ධුරයේ නිල වශයෙන් කටයුතු භාර ගත් බව ආසියානු ක්රිකට් කවුන්සිලය නිවේදනයක් නිකුත් කරමින් සඳහන් කර සිටියේය.
ගෙවී ගිය වසර කීපයේදීම ආසියානු ක්රිකට් කවුන්සිල මූල්ය සහ අලෙවි කමිටුවේ සභාපතිවරයා ලෙස කටයුතු කළ ශම්මි සිල්වා මහතා, නව ධුරය ලැබීම පිළිබඳව අදහස් දක්වමින්, “ආසියානු ක්රිකට් කවුන්සිලයට නායකත්වය ලබා දීමට අවස්ථාව හිමිවීම විශාල ගෞරවයක්. ක්රිකට් කියන්නේ ආසියාවේ හද ගැස්ම වන අතර, ක්රීඩාව නඟා සිටුවීමට, නැගී එන දක්ෂතා සඳහා අවස්ථාව ලබා දීමට සහ මෙම සුන්දර ක්රීඩාව තුළින් අපව එක්සත් කරන බැඳීම් තවදුරටත් ශක්තිමත් කරමින් සියලුම සාමාජික රටවල් සමඟ සමීපව කටයුතු කිරීමට මම බලාපොරොත්තු වෙනවා“ යනුවෙන් සඳහන් කර සිටියේය.
මෙහිදී ආසියානු සභාපති තනතුරෙන් ඉවත්ව අන්තර්ජාතික ක්රිකට් සභාවේ සභාපති ධුරය භාරගත් හිටපු ආසියානු ක්රිකට් කවුන්සිල සභාපති ජේ ෂා මහතාගේ ධුර කාලයේදී කළ සේවය වෙනුවෙන් ඔහුටද ස්තූති කිරීමට ශම්මි සිල්වා මහතා අමතක නොකළේය. ආසියානු ක්රිකට් සභාව විසින් සංවිධානය කරනු ලබන ප්රධානතම තරගාවලිය වන ආසියානු කුසලාන තරගාවලිය වෙනුවෙන් 2024 වසරේ සිට 2031 වසර දක්වා ඉතිහාසයේ මෙතෙක් ලද ඉහළම අගය ලබා ගැනුණේ ජේ ෂා මහතාගේ සභාපති ධුරය හොබවන අවධියේ වීම නිසා ඒ පිළිබඳව සිල්වා මහතා සිය කෘතඥතාවය පළ කර සිටියේය.
