ශ්‍රී ලංකා ක්‍රිකට් ආයතනය විසින් සංවිධානය කරනු ලබන අන්තර් සමාජ ප්‍රධානතම තුන් දින ලීග් ක්‍රිකට් තරගාවලිය යටතේ මග්ගොන සරේ විලේජ් ක්‍රීඩාංගණයේ පැවැත්වෙන තරගයේදී පළමු ඉනිම ක්‍රීඩා කරමින් සිටින හලාවත මේරියන්ස් ක්‍රීඩා සමාජය දිනය අහවර වන විට කඩුලු 9 ක් දැවී ලකුණු 259 ක් ලබා සිටියේය.

රාගම ක්‍රීඩා සමාජයට එරෙහිව පැවැත්වෙන මෙම තරගයේදී පළමුව පන්දුවට පහර දෙන හලාවත මේරියන්ස් කණ්ඩායමේ පළමු කඩුලු 3 ම ලකුණු 26 ක් වද්දී දැවී ගියද සිව්වැනි කඩුල්ලට එක් වුණු කසුන් විදුර සහ රවීන් යසස් පන්දු 200 කදී ලකුණු 83 ක සම්බන්ධතාවක් පවත්වමින් කණ්ඩායමට ජීවයක් එක් කළහ. මෙහිදී කසුන් විදුර පන්දු 118 කදී ලකුණු 60 ක් රැස් කරන ලද්දේ හතරේ පහර 9 ක්ද සිය ඉනිමට ඇතුළත් කරමිණි. ඔහුට අනගි සහායක් ලබා දුන් රවීන් යසස් ලකුණු 45 ක් රැස් කරන ලද්දේ පන්දු 129 කට මුහුණ දෙමිනි.

අනතුරුව හොඳම කඩුලු සම්බන්ධතාව 7 වැනි කඩුල්ල වෙනුවෙන් රැස් කිරීමට සුමින්ද ලක්ෂාන් සහ චමෝද් සඳරු සමත්වූහ. ඔවුන් දෙදෙනා පන්දු 177 කදී ලකුණ 96 ක සම්බන්ධතාවක් එක් කරමින් හලාවත මේරියන්ස් කණ්ඩායමේ ලකුණු සංඛ්‍යාව 250 ක් ඔබ්බට රැගෙන ගියහ. මෙහිදී චමෝද් සඳරු  පන්දු 111 කට මුහුණ දෙමින් හතරේ පහර 3 ක් සහ හයේ පහරක් සමගින් ලකුණු 46 ක්ද සුමින්ද ලක්ෂාන පන්දු 106 කට මුහුණ දෙමින් හතරේ පහර 11 ක් සමගින් ලකුණු 73 ක් රැස් කළේය.

පන්දු යැවීමේදී හරීන් රත්නමුදලි සහ ශෂික දුල්ෂාන් කඩුලු 3 බැගින් දවාලීමට සමත්වූ අතර සංතුෂ් ගුණතිලක කඩුලු 2 ක් දවාලූවේය.

හලාවත මේරියන්ස් පන්දුවාර 87 කදී කඩුලු 9 ක් දැවී ලකුණු 259 යි – (කසුන් විදුර 60, රවීන් යසස් 45, චමෝද් සඳරු 46, සුමින්ද ලක්ෂාන් 73, සංතුෂ් ගුණතිලක 32/2, හරීන් රත්නමුදලි 37/3, ශෂික දුල්ෂාන් 84/3)